22
―Leꞌ beṉꞌ bishꞌ, naꞌ leꞌ beṉꞌ gol, ḻi wzenag dillꞌ c̱haꞌni wiꞌa.
2 Naꞌ beṉꞌkaꞌ, ka bengakileꞌ chṉe Páblonaꞌ dillꞌ hebrewaꞌ naꞌ wlleꞌgakeꞌ llizə. Naꞌ Páblonaꞌ chiꞌe ḻegakeꞌ:
3 ―Nadꞌ nakꞌ beṉꞌ Israel naꞌ goljꞌ yell Társonaꞌ ganaꞌ mbani Cilícianaꞌ, per bgolꞌ Jerusalénni, naꞌ bliꞌ bsedi maestro Gamalielaꞌ nadꞌ kwasḻoḻ ka na ley c̱he dii x̱ozxtoꞌchokaꞌ, naꞌ toshiizi choeꞌḻ-lallaa chonꞌ ka chazlallꞌ Chiozaꞌ do yic̱hj do lallaa, ka chonkzle leꞌ ṉaanlla.
4 Naꞌ bc̱hiꞌ bsakaa beṉꞌkaꞌ ba wyoo lo nez ḻi nez shaoꞌ c̱he Jesucrístonaꞌ naꞌ goklallaa guetgakeꞌ. Naꞌ bex̱aa ka nool ka beṉꞌ byo, naꞌ wloꞌa ḻegakeꞌ lillyanaꞌ.
5 Beenaꞌ nak bx̱oz choo bx̱oz xen naꞌ yogꞌ beṉꞌ golkaꞌ chṉabiaꞌ beṉꞌ Israelkaꞌ ṉezgakileꞌ ka benꞌ. Naꞌ ḻegakeꞌ beṉgakeꞌ nadꞌ yish daa bex̱aa ka wzaa zyaa yell Damásconaꞌ, gokidꞌ lljex̱aa yogꞌḻoḻ beṉꞌkaꞌ nogakeꞌ xtillꞌ Jesucrístonaꞌ naꞌ yic̱heꞌgakee Jerusalénni kwenc̱he sakꞌziꞌgakeꞌ.
Beꞌ Páblonaꞌ dillꞌ ka gok benḻilallee Jesúzaꞌ
6 ’Naꞌ ka do gobill, ka ba zoa illinꞌ Damásconaꞌ, tokonganzi wyalj to yiꞌ dii zaꞌ yabanaꞌ lo nezaꞌ ganaꞌ zyaa.
7 Naꞌ to wzoatishzꞌ lo yonaꞌ. Naꞌch benidꞌ shii to beṉꞌ wneꞌ nadꞌ: “Saulo, Saulo, ¿berac̱he chc̱hiꞌ chsakꞌzoꞌ nadꞌ?”
8 Naꞌ wṉabidee, chepee: “¿No liꞌ, beṉꞌ?” Naꞌ wneꞌ: “Nadaan Jesús, beṉꞌ Nazaretaꞌ, beenaꞌ chc̱hiꞌ chsakoo.”
9 Naꞌ beṉꞌkaꞌ zyaalenꞌ txen bleꞌgakileꞌ yiꞌnaꞌ daa wyalj naꞌ bllebgakeꞌ, per aga bengakileꞌ daa wna beenaꞌ nadꞌ.
10 Naꞌch goshee: “¿Beran chiyaḻꞌ gonꞌ, X̱anꞌ?” Naꞌ wneꞌ nadꞌ: “Biyas naꞌ wyaj Damásconaꞌ, naꞌ naꞌ iṉagakeꞌ liꞌ yogꞌ daa chiyaḻꞌ gonoꞌ.”
11 Naꞌ beeniꞌ walaꞌ bc̱hoḻan nadꞌ, naꞌ beṉꞌkaꞌ zyaalenꞌ txen biyox̱ꞌgakeꞌ naꞌnaꞌ naꞌ bc̱heꞌgakeꞌ nadꞌ Damásconaꞌ.
12 ’Naꞌ Damásconaꞌ zoa to beṉꞌ le Ananías, naꞌ zoeꞌ choneꞌ yogꞌ daa na leyaꞌ, naꞌ yogꞌ beṉꞌ Israelkaꞌ zoa Damásconaꞌ nagakeꞌ c̱heꞌ nakeꞌ to beṉꞌ chon dii wen.
13 Naꞌ Ananíazaꞌ bideꞌ bidwieꞌ nadꞌ, naꞌ ka blee, wneꞌ nadꞌ: “Saulo, beṉ bishꞌ, ṉaa yileꞌiloꞌ sto shii.” Naꞌ kate wneꞌ kaꞌ, lii bileꞌteidꞌ, naꞌch gok bleꞌidee.
14 Naꞌch wneꞌ nadꞌ: “Chiozaꞌ, beenaꞌ beꞌlaꞌo dii x̱ozxtoꞌchokaꞌ, ba wlejeꞌ liꞌ kwenc̱he gombiꞌo daa cheenileꞌ gonoꞌ, naꞌ kwenc̱he bleꞌiloꞌ beenaꞌ nak ḻiizelozi beṉꞌ wen, naꞌ benteiloꞌ kwineꞌn ba bshaljleneꞌ liꞌ.
15 Naꞌ liꞌ wiꞌo xtilleenaꞌ doxen yell-lioni, naꞌ weꞌlenoꞌ beṉꞌ dillꞌ yogꞌḻoḻ diikaꞌ ba ben bleꞌiloꞌ.
16 Naꞌ ṉaa, bibi wsej wllonan c̱hoategoꞌ nisaꞌ naꞌ wṉabi X̱ancho Jesúzaꞌ yisol yiṉiteꞌ saaxya c̱hoꞌkaꞌ.”
17 ’Naꞌ ka biyedꞌ Jerusalénni, wyaa yoodoꞌnaꞌ jeꞌḻwillꞌ Chiozaꞌ, naꞌ Chiozaꞌ beneꞌ ka bleꞌdoꞌidꞌ.
18 Naꞌ bleꞌidꞌ Jesúzaꞌ, beenaꞌ nak X̱anꞌ, naꞌ wneꞌ nadꞌ: “Btalalloo bchej Jerusalénni, ḻaꞌ aga no wzenag xtillaanaꞌ daa weꞌlengakoꞌneꞌ.”
19 Naꞌch chepee: “X̱anꞌ, ḻegakeꞌ ṉezgakileꞌ ka wyaꞌ to to ganaꞌ chdop chllagntoꞌ choeꞌḻwillntoꞌ Chiozaꞌ jex̱aa beṉꞌkaꞌ nonḻilallꞌ liꞌ, naꞌ bet wdingakee naꞌ bic̱heꞌgakee ni, bsejgakee lillyanaꞌ.
20 Naꞌ kanaꞌ betgakeꞌ dii Estébannaꞌ beenaꞌ beꞌ xtilloonaꞌ, lenꞌ biꞌa latj betgakeꞌneꞌ, naꞌ wdapꞌ xa beṉꞌkaꞌ bet ḻeꞌ.”
21 Naꞌ Jesúzaꞌ, beenaꞌ nak X̱anꞌ, wneꞌ nadꞌ: “Wloo nez, wyaj yell zitꞌkaꞌ naꞌ jeꞌlen beṉꞌkaꞌ bi nak beṉꞌ Israel xtillaanaꞌ.”
Páblonaꞌ gokeꞌ lo naꞌ beṉꞌ wṉabiaꞌ c̱he soldadkaꞌ
22 Zeelo diikaꞌz bzenaggakeꞌ c̱he Páblonaꞌ, naꞌch wzolo chosyaagakeꞌ cheꞌgakeꞌ:
―¡Bisol biṉittegueꞌ yell-lioni! ¡Aga chiyaḻꞌ soach ka ḻeꞌ!
23 Naꞌ bikzə bsangakeꞌ chosyaagakeꞌ daa ḻe chllaagakeꞌ. Ax̱t no xeꞌkaꞌ chzaḻꞌgakeꞌ kaꞌlə naꞌ no bishte yonaꞌ chashgakeꞌn chzaḻꞌgakeꞌn chaꞌlə.
24 Naꞌ beṉꞌ wṉabiaꞌ c̱he soldadkaꞌ beneꞌ mandad wloogakeꞌ Páblonaꞌ ganaꞌ zoa lill soldadkaꞌ naꞌ wit c̱hingakeꞌneꞌ kwenc̱he wiꞌe dillꞌ bin beneꞌ daa ziꞌte chllaa beṉꞌkaꞌ ḻeꞌ.
25 Naꞌ ka ba nc̱hejgakeꞌneꞌ kwenc̱he wit c̱hingakeꞌneꞌ, Páblonaꞌ golleꞌ x̱an soldadkaꞌ:
―¿Ade lsens wit c̱hinle to beṉꞌ nde kwent Rómanaꞌ ḻaꞌkzi biṉꞌ yiyiljyoll-le bin beneꞌ?
26 Naꞌ ka goll Páblonaꞌ x̱an soldadkaꞌ kaꞌ, naꞌch jelleꞌ beṉꞌ wṉabiaꞌ c̱heꞌkaꞌ:
―Wsakꞌshkiloꞌ, nde beeni kwent yell Rómanaꞌ, na.
27 Naꞌ beṉꞌ wṉabiaꞌ c̱he soldadkaꞌ wyajeꞌ kwit Páblonaꞌ naꞌ wṉabileꞌneꞌ, chiꞌeneꞌ:
―¿Aḻin ndioꞌ kwent yell Rómanaꞌ?
Naꞌ Páblonaꞌ chiꞌeneꞌ:
―Awe.
28 Naꞌch beṉꞌ wṉabiaꞌ c̱he soldadkaꞌ chiꞌe Páblonaꞌ:
―Nadꞌ mech xen wxakidaan kwenc̱he ndiaꞌ kwent yell Rómanaꞌ.
Naꞌ Páblonaꞌ golleꞌneꞌ:
―Nadꞌ dezd ka goljtiaꞌ ndiaꞌ kwent yell Rómanaꞌ.
29 Naꞌ daa goll Páblonaꞌ kaꞌ, beṉꞌkaꞌ nan wit c̱hingakeꞌneꞌ lii bikwastegakeꞌ kwiteꞌnaꞌ. Naꞌ ax̱t beenaꞌ chṉabiaꞌ soldadkaꞌ, ka gokbeꞌileꞌ Páblonaꞌ ndieꞌ kwent yell Rómanaꞌ, ḻe bllebeꞌ daa beneꞌ mandad bc̱hejgakeꞌneꞌ gdenkaꞌ.
Bzegakeꞌ Páblonaꞌ lao beṉꞌkaꞌ chṉabiaꞌ beṉꞌ Israelkaꞌ
30 Naꞌ betiyo, beṉꞌ wṉabiaꞌ c̱he soldadkaꞌ btopeꞌ bx̱ozkaꞌ chṉabiaꞌ naꞌ yogꞌḻoḻ beṉꞌkaꞌ chṉabiaꞌ beṉꞌ Israelkaꞌ. Naꞌ bselleꞌ gdenkaꞌ daa nchej ṉiꞌa naꞌ Páblonaꞌ, naꞌ wlejeꞌneꞌ bzieꞌneꞌ lao beṉꞌkaꞌ daa cheenileꞌ iṉezileꞌ bic̱he chao beṉꞌ Israelkaꞌ xya c̱heꞌ.