Biyaj Páblonaꞌ Jerusalénnaꞌ
21
Naꞌ ka bilaantoꞌ beṉꞌ Éfesokaꞌ, naꞌch biyoontoꞌ ḻoo barkwaꞌ ziyajntoꞌ shḻicha yell-lio Cozaꞌ daa llia lo nisdoꞌnaꞌ, naꞌ betiyo billinntoꞌ yell-lio Ródazaꞌ daa llia lo nisdoꞌnaꞌ, naꞌ bizaꞌntoꞌ billinntoꞌ yell Pátaranaꞌ.
2 Naꞌ ka billinntoꞌ Pátaranaꞌ bleꞌintoꞌ to barkw dii shaj ganaꞌ mbani Fenícianaꞌ, naꞌ biyoontoꞌn.
3 Naꞌ ka zejntoꞌ ḻoo barkwaꞌ bleꞌintoꞌ yell-lio Chíprenaꞌ daa llia lo nisdoꞌnaꞌ naꞌ to wdezntoꞌ shḻaanaꞌlə zejntoꞌ yell Tíronaꞌ daa llia ganaꞌ mbani Sírianaꞌ. Naꞌ ka billin barkwaꞌ Tíronaꞌ, biḻetjgakeꞌ yoaꞌnaꞌ noaꞌn naꞌ biyetjntoꞌ.
4 Naꞌ jadiljntoꞌ beṉꞌkaꞌ nonḻilallꞌ Jesúzaꞌ naꞌ bigaaṉlenntoꞌ ḻegakeꞌ to xman. Naꞌ Espíritu Sántonaꞌ golleꞌ ḻegakeꞌ bi chiyaḻꞌ yiyaj Páblonaꞌ Jerusalénnaꞌ.
5 Naꞌ ka gok to xman bizaꞌntoꞌ. Naꞌ yogꞌ beṉꞌkaꞌ ba nonḻilallꞌ Jesúzaꞌ yell Tíronaꞌ, do xiiṉ xoolgakeꞌ, wzaꞌlengakeꞌ netoꞌ choꞌa yellaꞌ. Naꞌ ka bllinntoꞌ choꞌa nisdoꞌnaꞌ, bc̱hekꞌ xibntoꞌ beꞌḻwillntoꞌ Chiozaꞌ.
6 Naꞌch biḻaa ljwellntoꞌ dillꞌ, naꞌ biyoontoꞌ ḻoo barkwaꞌ, naꞌ beṉꞌkaꞌ biyajgakeꞌ lill c̱he c̱hegakeꞌ.
7 Naꞌ bizaꞌntoꞌ Tíronaꞌ billinntoꞌ yell Tolemáidanaꞌ, naꞌ bwapntoꞌ chiox beṉꞌkaꞌ nonḻilallꞌ Jesúzaꞌ naꞌ, naꞌ bigaaṉlenntoꞌ ḻegakeꞌ shlla.
8 Naꞌ betiyo bizaꞌntoꞌ Tolemáidanaꞌ naꞌ billinntoꞌ yell Cesareanaꞌ. Naꞌ wyajntoꞌ lill Felípenaꞌ beenaꞌ choeꞌ dillꞌ wen dillꞌ kob c̱he Crístonaꞌ, naꞌ nakeꞌ txen beṉꞌkaꞌ gall chaklengakeꞌ postlkaꞌ, naꞌ bigaaṉntoꞌ lilleꞌnaꞌ.
9 Naꞌ zoa tap biꞌ nool wewꞌ c̱heꞌ, naꞌ chyix̱jeꞌgakbꞌ daa cheꞌ Chiozaꞌ ḻegakbꞌ.
10 Naꞌ ka ba gok shoṉ tap lla zoantoꞌ lilleꞌnaꞌ, naꞌ blaꞌ to beṉꞌ Judea lieꞌ Ágabo, beṉꞌ chyix̱jee daa cheꞌ Chiozaꞌ ḻeꞌ.
11 Bidwieꞌ netoꞌ naꞌ wṉabeꞌ xpachḻee Páblonaꞌ naꞌ bic̱hej ṉiꞌa naꞌ kwineꞌ, naꞌ chiꞌe:
―Ba bzajnii Espíritu Sántonaꞌ nadꞌ neꞌ beṉꞌ wlallkaꞌ lleꞌ Jerusalénnaꞌ wc̱hejgakeꞌ ṉiꞌa naꞌ x̱an bachḻeeni ka ba nc̱hejꞌ ṉiꞌa naꞌni, naꞌ gongakeꞌneꞌ lo naꞌ beṉꞌkaꞌ bi nak beṉꞌ Israel.
12 Naꞌ ka benintoꞌ wna Ágabonaꞌ kaꞌ, netoꞌ len beṉꞌ Cesareakaꞌ gotꞌyointoꞌ Páblonaꞌ bi yiyajeꞌ Jerusalénnaꞌ.
13 Naꞌ Páblonaꞌ wneꞌ netoꞌ:
―Bi kwell-le c̱haꞌ, bi gonle ka gakyeshidꞌ. Zoakzꞌ wtiḻꞌ diikaꞌ, aga toz daa wc̱hejgakeꞌ nadꞌ, san wakte witgakeꞌ nadꞌ daa nonḻilallaa X̱ancho Jesucrístonaꞌ.
14 Naꞌ ka gokbeꞌintoꞌ bi chzenag Páblonaꞌ daa cheꞌntoꞌneꞌ bi yiyajeꞌ Jerusalénnaꞌ, naꞌch wnantoꞌ:
―Gakshga ka cheeni X̱ancho Jesúzaꞌ.
15 Naꞌ ka wde, bisiniꞌa c̱hentoꞌ kwenc̱he bizaꞌntoꞌ ziyajntoꞌ Jerusalénnaꞌ.
16 Naꞌ baḻ beṉꞌ Cesareakaꞌ nonḻilallꞌ Jesúzaꞌ wzaꞌlengakeꞌ netoꞌ. Naꞌ bc̱heꞌgakeꞌ netoꞌ lill to beṉꞌ le Mnasón, ganaꞌ yigaaṉntoꞌ. Beeni nakeꞌ beṉꞌ Chipre naꞌ ssha ba gok nonḻilallee Jesúzaꞌ.
Páblonaꞌ jawieꞌ Jacóbonaꞌ Jerusalénnaꞌ
17 Naꞌ ka billinntoꞌ Jerusalénnaꞌ, ḻe chibayi beṉꞌkaꞌ nakntoꞌ txen nonḻilallꞌntoꞌ Jesúzaꞌ.
18 Naꞌ betiyo wzaꞌlen Páblonaꞌ netoꞌ jawiantoꞌ Jacóbonaꞌ. Naꞌ ka bllinntoꞌ, ba lleꞌ yogꞌ beṉꞌkaꞌ ngoo lo naꞌgakeꞌ beṉꞌkaꞌ nonḻilallꞌ Jesúzaꞌ Jerusalénnaꞌ.
19 Naꞌ biyoll bwap Páblonaꞌ ḻegakeꞌ chiox, naꞌ golleꞌ ḻegakeꞌ to to diikaꞌ goklen Chiozaꞌ ḻeꞌ daa beneꞌ ladj beṉꞌkaꞌ bi nak beṉꞌ Israel.
20 Naꞌ ka wde bzenaggakeꞌ diikaꞌ wna Páblonaꞌ, beꞌlaꞌogakeꞌ Chiozaꞌ. Naꞌch gollgakeꞌneꞌ:
―Liꞌ, beṉꞌ bishꞌ, ṉezkziloꞌ beṉꞌ zan wal inlleb beṉꞌ Israelkaꞌ ba nonḻilallꞌgakeꞌ Jesúzaꞌ, naꞌ yoguee nagakeꞌ chonan byen goncho daa na leyaꞌ.
21 Naꞌ ba bengakileꞌ rson ka chonoꞌ, naꞌ nagakeꞌ chzajniiloꞌ yogꞌ beṉꞌ Israelkaꞌ lleꞌ yell zitꞌkaꞌ bich gongakeꞌ ka na ley c̱he dii Moisézaꞌ, ni bi koo biꞌ c̱heꞌkaꞌ seṉ daa le circuncisión, naꞌ bich gongakeꞌ daa yoolocho choncho.
22 ¿Nakra gonchon, lla? Ḻaꞌ lii idop illagte beṉꞌ katꞌ iṉezgakileꞌ ba biyedoꞌ.
23 Waklja gonoꞌn ki: Ladjntoꞌni zoa tap beṉꞌ nc̱hebeꞌ to dii nc̱hebeꞌ lao Chiozaꞌ, naꞌ chonan byen wdelazgakeꞌ daa nc̱hebgakeꞌ.
24 Chiyaḻꞌ wc̱hiꞌo ḻegakeꞌ yoodoꞌnaꞌ kwenc̱he txen yixi yiyechle. Naꞌ liꞌ c̱hixjoꞌ daa chiyaḻꞌ c̱hixjgakeꞌ kwenc̱he gak wshib yic̱hjeꞌkaꞌ ka nllia leyaꞌ biaꞌ. Naꞌ shi gonoꞌ kaꞌ, yogꞌ beṉꞌ iṉezgakileꞌ bi nakan ka nagakeꞌ c̱hoꞌ, naꞌ gakbeꞌgakileꞌ ḻekzkaꞌ chzenagoꞌ daa na leyaꞌ.
25 Naꞌ ka nak beṉꞌkaꞌ bi nak beṉꞌ Israel naꞌ ba nonḻilallꞌgakeꞌ Jesúzaꞌ, ba bzejntoꞌ ḻegakeꞌ bi kweꞌ yic̱hjgakeꞌ diikaꞌ zejlencho choꞌ beṉꞌ Israel. Naꞌ gollntoꞌgakeꞌ daa chiyaḻꞌ gongakeꞌ: bi gaogakeꞌ yeḻꞌ wao daa ba bllia beṉꞌ lao lwaa lsakꞌ daa choeꞌlaꞌogakeꞌ, naꞌ bi gaogakeꞌ xc̱hen bayix̱aa, ni xpelꞌ banaꞌ bi wlalj xc̱hemaꞌ, naꞌ bi iṉelenzgakeꞌ xiiṉ xool beṉꞌ.
Bex̱ꞌgakeꞌ Páblonaꞌ yoodoꞌnaꞌ
26 Naꞌ betiyo ka bixi biyech Páblonaꞌ len beṉꞌkaꞌ zi tap, naꞌ wyajgakeꞌ yoodoꞌnaꞌ kwenc̱he wzenileꞌ bx̱ozkaꞌ bi llan sheelo daa ba nc̱hebgakeꞌ kwenc̱he ka yiyoll yixi yiyechgakeꞌ ka nllia leyaꞌ biaꞌ naꞌ weꞌgakeꞌ bayix̱ꞌdoꞌkaꞌ witgakeꞌ.
27 Naꞌ ba zoa izaa gall lla chongakeꞌ daa chiyaḻꞌ gongakeꞌ kwenc̱he yixi yiyechgakeꞌ, naꞌ baḻ beṉꞌ Israelkaꞌ, beṉꞌkaꞌ zaak Ásianaꞌ, bleꞌgakileꞌ Páblonaꞌ ḻoo yoodoꞌnaꞌ. Naꞌch bta bṉegakeꞌ beṉꞌkaꞌ lleꞌ naꞌ, kwenc̱he bex̱ꞌgakeꞌ Páblonaꞌ.
28 Naꞌ wṉegakeꞌ zilljə cheꞌgakeꞌ:
―Leꞌ, beṉꞌ Israel, ḻi gaklen netoꞌ. Beeni chdeꞌ doxen chliꞌ chsedileꞌ beṉꞌ kwenc̱he gakzbangakileꞌ choꞌ beṉꞌ Israel, len ley c̱hechonaꞌ naꞌ yoodoꞌ c̱hechoni. Naꞌ ṉaa sto dii zban wal ba bizoneꞌ, ba wloꞌe to c̱hop beṉꞌ griego yoodoꞌ c̱hechoni, ḻaꞌ bi de lsens shoꞌ beṉꞌki lill xḻatj Chios c̱hechonaꞌ.
29 Wnagakeꞌ kaꞌ daa ba bleꞌgakileꞌ Trófimonaꞌ, to beṉꞌ yell Éfeso, chdaleneꞌ Páblonaꞌ txen Jerusalénnaꞌ, naꞌ gokgakileꞌ ḻekzkaꞌ bc̱heꞌ Páblonaꞌneꞌ yoodoꞌnaꞌ.
30 Yogꞌz beṉꞌ lleꞌ yellaꞌ bllesh bcheeṉgakeꞌ zejdogakeꞌ. Naꞌch bigoyogakeꞌ Páblonaꞌ ax̱t de xṉezeꞌ bibejgakeꞌneꞌ yoodoꞌnaꞌ, naꞌ lii bsejtegakeꞌ puertkaꞌ.
31 Naꞌ ba llagdiaꞌgakeꞌ Páblonaꞌ cheengakileꞌ wittekzgakeꞌneꞌ ka bllin dillaa lao beṉꞌ wṉabiaꞌ c̱he soldadkaꞌ nan chak daṉe nlleb doxen yell Jerusalénnaꞌ.
32 Naꞌ lii btoptieꞌ soldadkaꞌ naꞌ beṉꞌkaꞌ ngoo lallꞌ naꞌ ḻegakeꞌ naꞌ wyajdogakeꞌ ganaꞌ lleꞌ beṉꞌkaꞌ. Naꞌ beṉꞌkaꞌ chit Páblonaꞌ ka bleꞌgakileꞌ beṉꞌ wṉabiaꞌnaꞌ len soldad c̱heꞌkaꞌ, naꞌch bsangakeꞌ bich bet wdingakeꞌneꞌ.
33 Naꞌch jabigꞌ beṉꞌ wṉabiaꞌnaꞌ, naꞌ bex̱ee Páblonaꞌ naꞌ beneꞌ mandad bc̱hejgakeꞌneꞌ c̱hop gden. Naꞌch wṉabileꞌ beṉꞌkaꞌ no beenaꞌ naꞌ bin beneꞌ.
34 Naꞌ beṉꞌkaꞌ kon chosyaagakeꞌ naꞌ chiya dii na to toeꞌ, naꞌ bi wyajnii beṉꞌ wṉabiaꞌnaꞌ daa ziꞌte chongakeꞌ sshag. Naꞌch beneꞌ mandad bic̱heꞌ soldadkaꞌ Páblonaꞌ ganaꞌ zoagakeꞌ.
35 Naꞌ ka bllingakeꞌ choꞌa shkwiakaꞌ lleꞌ choꞌa lill soldadkaꞌ benan byen bḻen soldadkaꞌ Páblonaꞌ daa zej beṉꞌ Israelkaꞌ cheengakileꞌ wṉizgakeꞌneꞌ.
36 Naꞌ beṉꞌ zan nogakeꞌneꞌ chosyaagakeꞌ, cheꞌgakeꞌ:
―¡Ḻii wittegueꞌ!
Páblonaꞌ choꞌe dillꞌ lao beṉꞌ Israelkaꞌ
37 Naꞌ ka ba zoa lljḻoogakeꞌ Páblonaꞌ ganaꞌ zoa lill soldadkaꞌ, naꞌch golleꞌ beṉꞌ wṉabiaꞌnaꞌ:
―¿Awak weꞌlenꞌ liꞌ to c̱hop choꞌa dillꞌ?
Naꞌ beṉꞌ wṉabiaꞌnaꞌ golleꞌneꞌ:
―¿Achakoꞌ dillꞌ griegonaꞌ?
38 ¿Aaga linꞌ beṉꞌ Egíptonaꞌ beenaꞌ wzoshyiꞌ beṉꞌ wṉabiaꞌkaꞌ kani batzə, naꞌ bc̱hiꞌe tapa mil beṉꞌ wen xyakaꞌ latjaꞌ ganaꞌ bibi chashj chḻeb?
39 Naꞌch goll Páblonaꞌneꞌ:
―Aga ḻeꞌ nadꞌ. Nadꞌ nakꞌ to beṉꞌ Israel, beṉꞌ yell Tarso dii nak to yell xen ganaꞌ mbani Cilícianaꞌ. Ben goklen beꞌ latj weꞌlenꞌ beṉꞌki dillꞌ.
40 Naꞌ beṉꞌ wṉabiaꞌnaꞌ biꞌe lsens. Naꞌch wze Páblonaꞌ lo shkwiakaꞌ naꞌ bze neenaꞌ laweꞌkaꞌ kwenc̱he soagakeꞌ llizə. Naꞌch ka wcheꞌlligakeꞌ naꞌ wzoloeꞌ beꞌleneꞌ ḻegakeꞌ dillꞌ hebrewaꞌ daa nak xtillꞌgakeꞌ, chiꞌe: