Biyaj Páblonaꞌ Macedónianaꞌ naꞌ Grécianaꞌ
20
Naꞌ ka bibeꞌlli daa ben beṉꞌ Éfesokaꞌ, naꞌch gox Páblonaꞌ beṉꞌkaꞌ nonḻilallꞌ Jesúzaꞌ naꞌ beꞌleneꞌ ḻegakeꞌ to c̱hop dillꞌ dii gaklenan ḻegakeꞌ naꞌ wdeḻeꞌ to togakeꞌ, naꞌ biḻee ḻegakeꞌ dillꞌ. Naꞌ bizee zjadeꞌ ganaꞌ mbani Macedónianaꞌ.
2 Naꞌ bidieꞌ to to yellkaꞌ llia Macedónianaꞌ naꞌ beꞌleneꞌ beṉꞌkaꞌ nonḻilallꞌ Jesúzaꞌ zan dillꞌ dii btipan lallꞌgakeꞌ. Naꞌ biyollaꞌ billineꞌ Grécianaꞌ,
3 naꞌ shoṉ beoꞌ wzoeꞌ naꞌ. Naꞌ ba zoa yiyoꞌe ḻoo barkwaꞌ kwenc̱he yiyajeꞌ ganaꞌ mbani Sírianaꞌ, ka wṉezileꞌ ba chino beṉꞌ Israelkaꞌ ḻeꞌ. Naꞌ bc̱hoglallee bigwee nez kon ṉiꞌaze ziyajeꞌ Macedónianaꞌlə.
4 Naꞌ beṉꞌ zan zejlengakeꞌ Páblonaꞌ Ásianaꞌ. Ladjeꞌkaꞌ len Sópateraꞌ xiiṉ Pírronaꞌ, beṉꞌ Bereanaꞌ; naꞌ Aristárconaꞌ len Segúndonaꞌ, beṉꞌ Tesalónicakaꞌ; naꞌ Gáyonaꞌ, beṉꞌ Dérbenaꞌ; Timotewaꞌ, naꞌch Tíquiconaꞌ len Trófimonaꞌ, beṉꞌ Ásiakaꞌ.
5 Naꞌ yogꞌ beṉꞌki wllialogakeꞌ laontoꞌnaꞌ, naꞌ wlezgakeꞌ netoꞌ yell Tróazaꞌ.
6 Naꞌ ka wde lṉi Paskwaꞌ katꞌ chaogakeꞌ yetxtilaꞌ daa bi nc̱hix̱ levadúranaꞌ, naꞌch bizaꞌntoꞌ yell Filípozaꞌ biyoontoꞌ to ḻoo barkw. Naꞌ ka gok to xman bizaꞌntoꞌ naꞌ billinntoꞌ yell Tróazaꞌ ganaꞌ ba chbez beṉꞌkaꞌ netoꞌ. Naꞌ wzoantoꞌ naꞌ gall lla.
Billin Páblonaꞌ yell Tróazaꞌ
7 Naꞌ ka bllin lla dmiwaꞌ, lla nech c̱he xmannaꞌ, bdop bllagntoꞌ weej wdaontoꞌ txen len beṉꞌkaꞌ nonḻilallꞌ Jesúzaꞌ, naꞌ Páblonaꞌ bliꞌ bsedileꞌ ḻegakeꞌ. Naꞌ daa ba nakan yizee yetiyo, ax̱t chelch wyeelo beꞌleneꞌ ḻegakeꞌ dillꞌ.
8 Naꞌ ndop nllagntoꞌ to ḻoo yoo dii llia shkwia chaꞌlə, naꞌ nakan bido yiꞌzi.
9 Naꞌ to biꞌ wewꞌ lliabꞌ choꞌa ventannaꞌ, naꞌ lebꞌ Eutico. Naꞌ daa bshaljlen Páblonaꞌ beṉꞌkaꞌ ssha, bex̱ꞌkza bishgalaꞌ ḻebꞌ naꞌ bxopbꞌ choꞌa ventan c̱he yoo de shoṉ kwianaꞌ ganaꞌ lliabꞌ, naꞌ ka biḻisgakeꞌbꞌ ba witbꞌ.
10 Naꞌch biyetj Páblonaꞌ, naꞌ ka bllineꞌ ganaꞌ jadix̱jgakeꞌbꞌ bchekee wdeḻeꞌbꞌ. Naꞌ golleꞌ beṉꞌkaꞌ:
―Bi illeble; mbankzbaꞌn.
11 Naꞌch biyep Páblonaꞌ dii yoblə, bxoxjeꞌ yetxtilaꞌ naꞌ wdaogakeꞌn. Naꞌtech bizoloeꞌ choeꞌleneꞌ ḻegakeꞌ dillꞌ ni ka wyeeniꞌteyi. Naꞌch bizee.
12 Naꞌ ka billesh beṉꞌkaꞌ, chibagakileꞌ bic̱heꞌgakeꞌ biꞌ wewaa shiꞌa shbamꞌ.
Bizaꞌ Páblonaꞌ Tróazaꞌ
13 Naꞌch netoꞌ bibialontoꞌ biyoontoꞌ to ḻoo barkw wyajntoꞌ yell Asónnaꞌ ganaꞌ yillagntoꞌ Páblonaꞌ ka bgaaṉntoꞌ dillꞌ, naꞌ bigwee nez ṉiꞌazeꞌ.
14 Naꞌ ka billagntoꞌ Páblonaꞌ Asónnaꞌ, naꞌ biyooleneꞌ netoꞌ ḻoo barkwaꞌ naꞌ wyajntoꞌ yellaꞌ le Mitilene.
15 Naꞌch bizaꞌntoꞌ Mitilénenaꞌ, naꞌ betiyo bidentoꞌ gaozə yell-lio Quíonaꞌ daa llia lo nisdoꞌnaꞌ. Naꞌ gok lillj billinntoꞌ yell-lio Sámozaꞌ daa llia lo nisdoꞌnaꞌ, naꞌ llanaꞌ sto wyajchntoꞌ yell Milétonaꞌ.
16 Kaꞌ benntoꞌ, ḻaꞌ Páblonaꞌ bi goonileꞌ shajchntoꞌ Éfesonaꞌ kwenc̱he bi shaꞌileꞌ Ásianaꞌ, daa ba chakbyenileꞌ yillineꞌ Jerusalénnaꞌ daa ba zoa gaḻꞌ lṉi Pentecostézaꞌ.
Billag Páblonaꞌ beṉꞌkaꞌ ngoo lo naꞌgakeꞌ beṉꞌkaꞌ nonḻilallꞌ Jesúzaꞌ Éfesonaꞌ
17 Naꞌ ka zoantoꞌ Milétonaꞌ, Páblonaꞌ bseḻee rson naꞌ goxeꞌ beṉꞌkaꞌ ngoo lo naꞌgakeꞌ beṉꞌkaꞌ nonḻilallꞌ Jesúzaꞌ Éfesonaꞌ.
18 Naꞌ ka bllingakeꞌ, goll Páblonaꞌ ḻegakeꞌ:
―Leꞌ ṉezile nak bsaꞌ c̱haꞌ dezd nechte ka wzoalenꞌ leꞌ Ásiani.
19 Ba wzoaꞌ ba benꞌ xshin Chiozaꞌ do yic̱hj do lallaa, naꞌ zan shii gokyeshidꞌ naꞌ wchellꞌ, naꞌ biya dii ben bleꞌidꞌ daa bc̱hiꞌ bsakꞌ beṉꞌ Israelkaꞌ nadꞌ.
20 Naꞌ aga ni c̱he kaꞌ bsanꞌ bich wniaꞌ leꞌ daa chiyaḻꞌ iṉezile, san bliꞌ bsedchkzidꞌ leꞌ ganaꞌ chdop chllagle naꞌ kaꞌkzə lill to tole.
21 Ka beṉꞌ Israel ka beṉꞌ bi nak beṉꞌ Israel, beꞌlengakee dillꞌ nan chiyaḻꞌ yiyaj yilengakileꞌ c̱he dii malkaꞌ chongakeꞌ lao Chiozaꞌ naꞌ gonḻilallꞌgakeꞌ X̱ancho Jesucrístonaꞌ.
22 Naꞌ ṉaa, Espíritu c̱he Chiozaꞌ choneꞌ byen yiyaa Jerusalénnaꞌ, naꞌ bi ṉezidꞌ bi gak c̱haꞌ naꞌ.
23 Zeelo dii ṉezidꞌ, Espíritu Sántonaꞌ neꞌ nadꞌ to to yell ganaꞌ tiaꞌ gataa lillya naꞌ biya dii gak c̱haꞌ.
24 Naꞌ aga bi chakidꞌ c̱heyi diikaꞌ gak c̱haꞌ, ḻaꞌ aga llialo yeḻꞌ mban c̱haꞌni, san llialote yiyoll gonꞌ yogꞌḻoḻ daa ben X̱ancho Jesúzaꞌ lo naꞌ gonꞌ, ḻaꞌ ḻenꞌ wlejeꞌ nadꞌ kwenc̱he c̱hix̱jiꞌa dillꞌ wen dillꞌ kob c̱he Chiozaꞌ daa chakileꞌ choꞌ.
25 ’Naꞌ ba bzajniidꞌ leꞌ ka chon Chiozaꞌ chṉabiꞌe ḻoo yic̱hjlallꞌdoꞌ beṉꞌ chonḻilalleeneꞌ, naꞌ ṉaa ni stole leꞌ bich ileꞌile nadꞌ yell-lioni.
26 Daan niaꞌ leꞌ ṉaa, aga bi doḻꞌ napꞌ shi nole kwiayiꞌ.
27 Ḻaꞌ ba bzajniidꞌ leꞌ yogꞌ daa cheeni Chiozaꞌ. Bibi bkwashaa dii iṉacho bi wniaꞌ leꞌ.
28 Naꞌ ḻi wsakꞌ, ḻi gap wwia beṉꞌkaꞌ nakle txen, ḻaꞌ Espíritu Sántonaꞌ wlejeꞌ leꞌ kwenc̱he gap wwiale beṉꞌkaꞌ nonḻilallꞌ X̱ancho Jesúzaꞌ, beṉꞌkaꞌ biyaꞌo biziꞌleneꞌ xc̱heneꞌnaꞌ daa blaljeꞌ ḻee yag cruzaꞌ.
29 Ḻaꞌ ṉezidꞌ katꞌ bich soalenꞌ leꞌ naꞌ yid beṉꞌ gonllejgakileꞌ leꞌ kwenc̱he kwej yic̱hjle daa nonḻilallꞌle Jesúzaꞌ. Gongakeꞌ ka ba zṉia, ba chjatao xilꞌdoꞌ c̱he beṉꞌ.
30 Naꞌ ladjlenaꞌ ichej beṉꞌ wliꞌ wsedileꞌ leꞌ daa bi nak shḻi kwenc̱he gonleneꞌ txen.
31 Naꞌ ḻi wsakꞌ kwenc̱he kono siyeꞌ leꞌ. Naꞌ ḻi lljadini ka benꞌ lo shoṉ yizaꞌ wzoalenꞌ leꞌ, ḻaꞌ ka tella ka waḻ gotꞌyoidꞌ to tole kwenc̱he wzenagle c̱he Chiozaꞌ, naꞌ ax̱t wchellꞌ ni c̱hele.
32 ’Naꞌ ṉaa, chonꞌ leꞌ lo naꞌ Chiozaꞌ len choꞌa xtilleenaꞌ daa na ḻe chakileꞌ choꞌ. Ḻaꞌ ḻennanꞌ napan yeḻꞌ wak kwenc̱he gaklenan leꞌ soac̱hec̱hle gonḻilallꞌleneꞌ. Naꞌ kaꞌ lljazoalenleneꞌ txen len yogꞌ beṉꞌ nakgakeꞌ lallꞌ nee.
33 Ṉezkzile bibiṉꞌ selallaa c̱hele, ni xmechle, ni xalaanle, ni bichlə dii naple.
34 Naꞌ ṉezkzile ṉiꞌa naꞌni benlenꞌ llin kwenc̱he bllelidꞌ bi dii byalljlenidꞌ beṉꞌki chonlengakeꞌ nadꞌ xshin Chiozaꞌ.
35 Benꞌ llinnaꞌ kwenc̱he bliidꞌ leꞌ ka chiyaḻꞌ gaklencho beṉꞌ katꞌ bi chyalljgakileꞌ. Ḻaꞌ chiyaḻꞌ lljadinicho xtillꞌ X̱ancho Jesúzaꞌ kanaꞌ wneꞌ: “Mbalazch soacho shi weꞌcho beṉꞌ bi weꞌchoneꞌ, aga ka daa ikaacho bi dii goṉeꞌ choꞌ.”