Ka wzoa Páblonaꞌ Éfesonaꞌ
19
Naꞌ shlak wzoa Apólozaꞌ Coríntonaꞌ, Páblonaꞌ wdieꞌ to to yellkaꞌ llia ladj yaa yaokaꞌ ganaꞌ mbani Galácianaꞌ naꞌ Ásianaꞌ, naꞌ bllintieꞌ Éfesonaꞌ ganaꞌ jadiꞌe baḻ beṉꞌ ba nonḻilallꞌ Jesúzaꞌ.
2 Naꞌ wṉabileꞌ ḻegakeꞌ, chiꞌe:
―¿Azidsoa Espíritu Sántonaꞌ ḻoo yic̱hjlallꞌdoꞌlenaꞌ ka wzolole chonḻilallꞌle Jesúzaꞌ?
Naꞌ beṉꞌkaꞌ gollgakeꞌneꞌ:
―Ni bi ṉezintoꞌ shi zoa Espíritu Sántonaꞌ beenaꞌ noꞌ kaꞌ.
3 Naꞌch Páblonaꞌ wizṉabileꞌ ḻegakeꞌ:
―¿Bin wyajniile ka wchoale nisaꞌ?
Naꞌ cheꞌgakeꞌneꞌ:
―Kon ka bzajnii dii Juannaꞌ.
4 Naꞌch goll Páblonaꞌ ḻegakeꞌ:
―Dii Juannaꞌ bzajniileꞌ beṉꞌ chiyaḻꞌ c̱hoagakeꞌ nisaꞌ daa wliꞌn ba biyaj bilengakileꞌ naꞌ ḻekzkaꞌ golleꞌ ḻegakeꞌ chiyaḻꞌ gonḻilallꞌgakeꞌ beenaꞌ ziꞌ yid, naꞌ ḻenꞌ Jesúzaꞌ, beenaꞌ wlej Chiozaꞌ iṉabiꞌe.
5 Naꞌ ka bengakileꞌ daa goll Páblonaꞌ ḻegakeꞌ, naꞌ wchoagakeꞌ nisaꞌ daa chonḻilallꞌgakeꞌ X̱ancho Jesúzaꞌ.
6 Naꞌ ka bx̱oa naꞌ Páblonaꞌ yic̱hjeꞌkaꞌ, Espíritu Sántonaꞌ wyoꞌe ḻoo yic̱hjlallꞌdoꞌekaꞌ naꞌ wṉegakeꞌ wde wdeli dillꞌ naꞌ ḻekzkaꞌ wdix̱jeꞌgakeꞌ dillꞌ daa goll Chiozaꞌ ḻegakeꞌ.
7 Naꞌ beṉꞌki gok c̱heyin kaꞌ nakgakeꞌ ka do shlliṉ.
8 Naꞌ wzoa Páblonaꞌ Éfesonaꞌ shoṉ beoꞌ bliꞌ bsedileꞌ beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ naꞌ bi bllebeꞌ. Naꞌ beꞌlencheꞌ beṉꞌkaꞌ dillꞌ kwenc̱he wyajniꞌgakileꞌ ka chṉabiaꞌ Chiozaꞌ ḻoo yic̱hjlallꞌdoꞌ beṉꞌkaꞌ nonḻilallꞌgakeꞌneꞌ.
9 Naꞌ baḻ beṉꞌkaꞌ nak beṉꞌ lallꞌdoꞌ wal aga goongakileꞌ shajḻeꞌgakeꞌ, naꞌ biya dii wnagakeꞌ lao lkweꞌ beṉꞌ c̱he nez ḻi nez shaoꞌ c̱he Jesucrístonaꞌ. Naꞌch bizaꞌ Páblonaꞌ kwiteꞌkaꞌ, naꞌ bic̱hiꞌe beṉꞌkaꞌ ba nonḻilallꞌ Jesúzaꞌ, wyajleneꞌ ḻegakeꞌ lill to beṉꞌ le Tirano dii nak ka yoo skwel ganaꞌ chdiꞌa beṉꞌ, naꞌ bliꞌ bsedchileꞌ ḻegakeꞌ yogꞌ lla.
10 Gokte c̱hop yiz bliꞌ bsedileꞌ ḻegakeꞌ, naꞌ yogꞌḻoḻ beṉꞌkaꞌ lleꞌ doxen Ásianaꞌ bengakileꞌ xtillꞌ X̱ancho Jesúzaꞌ, ka beṉꞌ Israel ka beṉꞌ griego.
11 Naꞌ Chiozaꞌ bc̱hineꞌ Páblonaꞌ kwenc̱he beneꞌ yeḻꞌ wak xen dii benan ka bibanchgayi beṉꞌ.
12 Naꞌ ax̱t no bachyic̱hj, no lechꞌ chjatigakeꞌneꞌ naꞌ chiyox̱ꞌgakeꞌn ga de beṉꞌ bi shaoꞌ naꞌ chiyakgakileꞌ, naꞌ ḻekzkaꞌ chichej dii x̱iwaa yoo beṉꞌ.
13 Naꞌ baḻ beṉꞌ Israelkaꞌ chdagakeꞌ to to yell chibejgakeꞌ dii xiwꞌkaꞌ yoo beṉꞌ, naꞌ chakgakileꞌ wc̱hingakeꞌ le X̱ancho Jesúzaꞌ kwenc̱he yibejgakeꞌn. Naꞌ cheꞌgakeꞌn:
―Kon yeḻꞌ wak c̱he Jesúzaꞌ, beenaꞌ choeꞌ Páblonaꞌ xtilleenaꞌ, nanntoꞌ leꞌ, ḻi yichej.
14 Kaꞌ ben gall xiiṉ to beṉꞌ Israel le Esceva, beenaꞌ nak to wṉabiaꞌ c̱he bx̱ozkaꞌ.
15 Naꞌ ka nan yibejgakeꞌ dii x̱iwaa, naꞌ gollan ḻegakeꞌ:
―Nombiꞌa Jesúzaꞌ, naꞌ ḻekzkaꞌ Páblonaꞌ, per leꞌ, bi ṉezidꞌ no leꞌ.
16 Naꞌch beenaꞌ yoo dii x̱iwaa bxitee bṉizeꞌ ḻegakeꞌ, naꞌ bc̱hezee xalaaneꞌkaꞌ naꞌ beneꞌ ḻegakeꞌ ziꞌ ax̱t bllieꞌ ḻegakeꞌ weꞌ naꞌ gaḻꞌyid gaḻꞌbelꞌzgakeꞌ bixoṉjgakeꞌ lilleꞌnaꞌ.
17 Naꞌ yogꞌ beṉꞌkaꞌ zoa Éfesonaꞌ, ka beṉꞌ Israel ka beṉꞌ bi nak beṉꞌ Israel, wṉezgakileꞌ ka gok c̱he beṉꞌkaꞌ, naꞌ ḻe bllebgakeꞌ naꞌ wloochgakeꞌ X̱ancho Jesúzaꞌ balaaṉ.
18 Naꞌ zan beṉꞌkaꞌ ba nonḻilallꞌgakeꞌ Jesúzaꞌ jax̱oadoḻꞌgakeꞌ lao lkweꞌ beṉꞌ ka nak dii malkaꞌ ba bengakeꞌ.
19 Naꞌ zan beṉꞌkaꞌ bḻan yeḻꞌ willaꞌnaꞌ jwaꞌgakeꞌ libr c̱heꞌkaꞌ daa bsedgakeꞌ naꞌ bzeygakeꞌn lao yogꞌ beṉꞌkaꞌ. Naꞌ bengakeꞌ kwent kaꞌkꞌ zakꞌ librkaꞌ bzeygakeꞌ, naꞌ bllinan ka do shiyona mil mech plat.
20 Kaꞌ gok blliljch xtillꞌ X̱ancho Jesúzaꞌ naꞌ beṉꞌ zanch benḻilallꞌgakeꞌneꞌ daa gokbeꞌgakileꞌ xtillꞌ Chiozaꞌ nsaꞌn yeḻꞌ wak xen.
21 Naꞌ ka wde gok yogꞌ diiki, Páblonaꞌ bc̱hoglallee shajeꞌ lljawieꞌ beṉꞌkaꞌ lleꞌ yellkaꞌ llia Macedónianaꞌ naꞌ Acáyanaꞌ, naꞌtech yiyajeꞌ Jerusalénnaꞌ. Naꞌ ḻekzkaꞌ golleꞌ: “Ka yiyoll yiyaa Jerusalénnaꞌ chiyaḻꞌ shaa Rómanaꞌ.”
22 Naꞌch bseḻee Timotewaꞌ naꞌ Erástonaꞌ Macedónianaꞌ, beṉꞌki c̱hop chaklengakeꞌneꞌ, naꞌ ḻeꞌ bigaaṉeꞌ Ásianaꞌ zi shloll wen.
Bta bṉe Demétrionaꞌ beṉꞌ Éfesokaꞌ
23 Naꞌ gotꞌ to dii zed wal Éfesonaꞌ daa chliꞌ chsedi Páblonaꞌ c̱he nez ḻi nez shaoꞌ c̱he Jesucrístonaꞌ.
24 Naꞌ beenaꞌ wlek dii zedaꞌ lieꞌ Demetrio, naꞌ noni xshineꞌ choneꞌ de plat lwaa lsakꞌ yoodoꞌ c̱he xnax Diananaꞌ, beenaꞌ noni chios c̱hegakeꞌ. Naꞌ dii xen choneꞌ gan c̱heyin len beṉꞌkaꞌ chonlengakeꞌneꞌ llinnaꞌ.
25 Naꞌ btopeꞌ beṉꞌkaꞌ chonleneꞌ llinnaꞌ naꞌ yogꞌ beṉꞌkaꞌ nḻangakeꞌ llin ka daa, golleꞌ ḻegakeꞌ:
―Ṉezile llin dga nḻancho dii xen chkwaaṉan c̱hecho.
26 Naꞌ ba chen chleꞌile ka chon beenaꞌ le Pablo, chdeꞌ chzajniileꞌ beṉꞌ wlall c̱hechoki naꞌ doxen gani mbani Ásiani, chiꞌe aga bi zakii lwaa lsakꞌ dii chon beṉꞌ kwenc̱he weꞌlaꞌozgakeꞌn. Naꞌ beṉꞌ zan ba chzenaggakeꞌ c̱heꞌ.
27 Naꞌ nxoll bich too diiki choncho, naꞌ ḻekzkaꞌ nxoll bich seyi c̱he yoodoꞌ ganaꞌ zoa xnax Diana c̱hechonaꞌ, beenaꞌ nak beṉꞌ choo beṉꞌ xen. Naꞌ beeni choeꞌlaꞌo yogꞌzə beṉꞌ lleꞌ gani mbani Ásiani naꞌ beṉꞌ lleꞌ doxen yell-lioni, gongakileꞌneꞌ ka to beṉꞌ bibi zakii.
28 Ka goll Demétrionaꞌ ḻegakeꞌ kaꞌ, ḻe bllaagakeꞌ naꞌ besyaagakeꞌ, nagakeꞌ:
―¡Beṉꞌ choo beṉꞌ xen nak xnax Diana c̱hechonaꞌ, choꞌ beṉꞌ Éfeso!
29 Naꞌ yogꞌḻoḻeꞌ gokgakeꞌ toz, wlekgakeꞌ dii lc̱hix̱ wal yellaꞌ, naꞌ bex̱ꞌgakeꞌ c̱hop beṉꞌ Macedonia, toeꞌ le Gayo, naꞌ stoeꞌ le Aristarco, beṉꞌkaꞌ zejlen Páblonaꞌ. Naꞌ wdoyogakeꞌ ḻegakeꞌ bllinlentegakeꞌ ḻegakeꞌ ganaꞌ chidopgakeꞌ choeꞌgakeꞌ dillꞌ.
30 Naꞌ Páblonaꞌ gokileꞌ shoꞌe ladj beṉꞌkaꞌ ndop nllag naꞌ kwenc̱he nan weꞌleneꞌ ḻegakeꞌ dillꞌ, per beṉꞌkaꞌ nonḻilallꞌ Jesúzaꞌ aga beꞌgakeꞌ latj shoꞌe.
31 Naꞌ ḻekzkaꞌ ladj josc̱his c̱he beṉꞌ Ásiakaꞌ len beṉꞌ nllagui Páblonaꞌ, naꞌ bseḻꞌgakeꞌ rson, cheꞌgakeꞌneꞌ:
―Ben goklen, bi shoo ganaꞌ lleꞌ beṉꞌkaꞌ.
32 Naꞌ beṉꞌkaꞌ ndop nllag naꞌ chosyaagakeꞌ, wde wdeli dii na to toeꞌ. Naꞌ zan beṉꞌkaꞌ len ladjeꞌkaꞌ ni bi ṉezgakileꞌ bic̱he lleꞌzgakeꞌ naꞌ.
33 Naꞌ baḻ beṉꞌ Israelkaꞌ blligꞌgakeꞌ Alejándronaꞌ lao beṉꞌkaꞌ kwenc̱he wiꞌe dillꞌ laweꞌkaꞌ. Naꞌch Alejándronaꞌ bḻis neenaꞌ kwenc̱he soagakeꞌ llizə naꞌ wzenaggakeꞌ daa yee ḻegakeꞌ.
34 Naꞌ ka bleꞌgakileꞌneꞌ naꞌ gokbeꞌgakileꞌ nan beṉꞌ Israelan, naꞌch bizologakeꞌ chosyaagakeꞌ, nagakeꞌ:
―¡Beṉꞌ choo beṉꞌ xen nak xnax Diana c̱hechonaꞌ, choꞌ beṉꞌ Éfeso!
Ka do c̱hop gor besyaagakeꞌ cheꞌgakeꞌ kaꞌ.
35 Naꞌch beenaꞌ nak sikriban c̱he yellaꞌ bzoeꞌ ḻegakeꞌ llizə. Naꞌch golleꞌ ḻegakeꞌ:
―Leꞌ beṉꞌ wlall, yogꞌ beṉꞌ yell-lio ṉezgakileꞌ choꞌ beṉꞌ Éfeso chidoḻꞌcho gap wwiacho yoodoꞌ c̱he xnax Diana c̱hechonaꞌ, beenaꞌ nak beṉꞌ choo beṉꞌ xen. Naꞌ ṉezgakileꞌ lwaa lsakeenaꞌ zaꞌn yabalə,
36 naꞌ ni to kono gak iṉa aga kanꞌ nakan. Naꞌ ḻi soa llizə kwenc̱he bi gonle to dii bi chiyaḻꞌ gonle.
37 Ka nak beṉꞌki ba bidwaꞌle ni, bi iṉacho ba wlangakeꞌ bi de ḻoo yoodoꞌ c̱hechonaꞌ, ni bi iṉacho ba wṉegakeꞌ zban c̱he xnax Diana c̱hechonaꞌ.
38 Naꞌ shi Demétrioni naꞌ beṉꞌkaꞌ chonlengakeꞌneꞌ llinnaꞌ de dii chak c̱hegakeꞌ kon nottezə beṉꞌ, daan chiꞌ beṉꞌkaꞌ chc̱hoglogakeꞌ c̱he beṉꞌ naꞌ wak shajgakeꞌ laweꞌkaꞌ kwenc̱he gongakeꞌ yeḻꞌ josc̱his c̱heꞌkaꞌ.
39 Naꞌ shi bichlə dii cheenile gak, chiyaḻꞌ yitopcho yogꞌḻoḻ beṉꞌ yell naꞌ weꞌchon dillꞌ.
40 Ḻaꞌ ka nak dga gok ṉaa, nxoll iṉa beṉꞌ to choꞌzan chta chṉecho beṉꞌ yell, naꞌ ¿bera iṉacho shi ba chṉabgakileꞌ choꞌ c̱he dga ba gok ṉaa?
41 Ka wde golleꞌ ḻegakeꞌ kaꞌ, naꞌ bishesheꞌ ḻegakeꞌ.