Biyaj Páblonaꞌ yell Coríntonaꞌ
18
Ka wde bizaꞌ Páblonaꞌ yell Aténazaꞌ, naꞌ biyajeꞌ yell Coríntonaꞌ.
2 Naꞌ ka billineꞌ Coríntonaꞌ billagueꞌ to beṉꞌ Israel lieꞌ Aquila. Naꞌ beeni nakeꞌ beṉꞌ yell Ponto naꞌ nool c̱heꞌnaꞌ lieꞌ Priscila. Ziꞌ bllinzgakeꞌ Coríntonaꞌ bizaꞌgakeꞌ ganaꞌ mbani Itálianaꞌ, ḻaꞌ Claudionaꞌ, beṉꞌ wṉabiaꞌnaꞌ, bishesheꞌ yogꞌ beṉꞌ Israelkaꞌ Rómanaꞌ ganaꞌ zoeꞌ. Naꞌ Páblonaꞌ jawieꞌ ḻegakeꞌ,
3 naꞌ daa nḻangakeꞌ toz ka llin, bigaaṉleneꞌ ḻegakeꞌ, naꞌ wdiagakeꞌ yid xa bayix̱ꞌkaꞌ daa chc̱hingakeꞌ lwaa yoo.
4 Naꞌ yogꞌ lla sabd, Páblonaꞌ chajeꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ, naꞌ chzajniileꞌ beṉꞌkaꞌ lleꞌ naꞌ xtillꞌ Jesúzaꞌ, ka beṉꞌ Israel naꞌ ka beṉꞌ bi nak beṉꞌ Israel.
5 Naꞌ Sílazaꞌ len Timotewaꞌ bizaꞌgakeꞌ Macedónianaꞌ naꞌ bllingakeꞌ ganaꞌ zoa Páblonaꞌ. Naꞌ daa bllingakeꞌ, bich bi llin yoblə ben Páblonaꞌ, san toz xshin Chiozaꞌ beneꞌ naꞌ bzajniileꞌ beṉꞌ Israelkaꞌ nan Jesúzaꞌ nakeꞌ Crístonaꞌ, beenaꞌ wlej Chiozaꞌ iṉabiꞌe.
6 Per wzololəgakeꞌ chakdiḻ-lengakeꞌneꞌ naꞌ wṉegakeꞌ zban c̱heꞌ, naꞌ wllib xalaaneꞌnaꞌ laweꞌkaꞌ kwenc̱he bliꞌe nan chbejyic̱hjeꞌ ḻegakeꞌ, naꞌ golleꞌ:
―Leꞌzkzan wlliayiꞌ kwinle. Aga bi doḻꞌ gapꞌ nadꞌ. Naꞌ ṉaa lljaliꞌ lljasedidꞌ beṉꞌkaꞌ bi nak beṉꞌ Israel.
7 Naꞌch bizee kwiteꞌkaꞌ naꞌ biyajeꞌ lill to beṉꞌ le Justo, beenaꞌ choeꞌlaꞌo Chiozaꞌ, naꞌ zoa lilleꞌnaꞌ gao ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ.
8 Naꞌ to beṉꞌ le Crispo ngoo lallꞌ nee chgwee xṉezi c̱heyi diikaꞌ chon beṉꞌ Israelkaꞌ ganaꞌ chdop chllaggakeꞌ, naꞌ do xiiṉ xooleꞌ wyajḻeꞌgakeꞌ c̱he X̱ancho Jesúzaꞌ. Naꞌ beṉꞌ zanch beṉꞌ Coríntokaꞌ, ka bengakileꞌ xtillꞌ Chiozaꞌ daa beꞌlen Páblonaꞌ ḻegakeꞌ, wyajḻeꞌgakeꞌ naꞌ wchoagakeꞌ nisaꞌ.
9 Naꞌch to lleꞌ bliꞌlao X̱ancho Jesúzaꞌ Páblonaꞌ, naꞌ golleꞌneꞌ:
―Bi illeboꞌ. Beꞌch xtillaanaꞌ lao beṉꞌki naꞌ bi soꞌ llizə.
10 Nadꞌ zoalenꞌ liꞌ, naꞌ bi wiꞌa latj no bi goni liꞌ, ḻaꞌ beṉꞌ zan ziꞌ gombiaꞌgakeꞌ nadꞌ yelli.
11 Naꞌ bigaaṉ Páblonaꞌ Coríntonaꞌ twiz yoo gashj bliꞌ bsedileꞌ beṉꞌ choꞌa xtillꞌ Chiozaꞌ.
12 Naꞌ kanaꞌ chṉabiaꞌ beenaꞌ le Galión ganaꞌ mbani Acáyanaꞌ, beṉꞌ Israelkaꞌ gokgakeꞌ toz bex̱ꞌgakeꞌ Páblonaꞌ naꞌ bc̱heꞌgakeꞌneꞌ ganaꞌ chon Galiónnaꞌ yeḻꞌ josc̱hisaꞌ.
13 Naꞌ cheꞌgakeꞌ Galiónnaꞌ:
―Beeni chdeꞌ chgooyeḻee beṉꞌ kwenc̱he weꞌlaꞌogakeꞌ Chiozaꞌ nllaꞌlə aga ka na ley c̱he Rómanaꞌ daa chṉabiaꞌ choꞌ.
14 Ka nan iṉe Páblonaꞌ, lii wṉete Galiónnaꞌ beṉꞌ Israelkaꞌ, chiꞌe:
―Ka nak dga chaole xya, shi bi doḻꞌ nap beeni wa shi bi xya wal beneꞌ, wak gonꞌ yeḻꞌ josc̱his c̱helenaꞌ.
15 San shi chaole xya c̱he dillꞌ daa choꞌe, naꞌ daa chzetjeꞌ le beṉꞌ, naꞌ c̱he ley c̱helenaꞌ, bi nakan ka dii gonꞌ yeḻꞌ josc̱his c̱heyin. Leꞌzə, ḻi wwia naklə gonlen.
16 Naꞌ bibejeꞌ ḻegakeꞌ ganaꞌ choneꞌ yeḻꞌ josc̱hisaꞌ.
17 Naꞌch yogꞌ beṉꞌ griegokaꞌ bex̱ꞌgakeꞌ Sóstenezaꞌ, beenaꞌ chgoo xṉezin c̱heyi diikaꞌ chon beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ, betsodgakeꞌneꞌ. Naꞌ chwiazə Galiónnaꞌ bikzə bi golleꞌ ḻegakeꞌ.
Páblonaꞌ biyajeꞌ yell Antioquíanaꞌ
18 Ka wde gok kaꞌ, Páblonaꞌ bigaaṉcheꞌ sshach Coríntonaꞌ. Naꞌch biḻee dillꞌ beṉꞌkaꞌ nonḻilallꞌ Jesúzaꞌ naꞌ bizee kwenc̱he shajeꞌ ganaꞌ mbani Sírianaꞌ. Naꞌ Priscílanaꞌ len Aquílanaꞌ zejlengakeꞌneꞌ. Naꞌ ka ziꞌ shoꞌgakeꞌ ḻoo barkwaꞌ yizaꞌgakeꞌ yell Cencreanaꞌ, Páblonaꞌ bshib yic̱hjeꞌnaꞌ kon ka nc̱hebeꞌ goneꞌ lao Chiozaꞌ.
19 Ka bllingakeꞌ yell Éfesonaꞌ, Páblonaꞌ bikwaaṉzeꞌ Priscílanaꞌ len Aquílanaꞌ, naꞌ wzee wyajeꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ naꞌ beꞌleneꞌ beṉꞌkaꞌ dillꞌ.
20 Naꞌ beṉꞌkaꞌ ndop nllag naꞌ, wṉabgakileꞌ Páblonaꞌ yigaaṉlencheꞌ ḻegakeꞌ, naꞌ Páblonaꞌ bi goonileꞌ.
21 Naꞌch chiꞌe ḻegakeꞌ:
―Chonan byen yiyaa Jerusalénnaꞌ katꞌ gaḻꞌ lṉinaꞌ daa zaꞌ, naꞌ widchkzꞌ yidwiaꞌ leꞌ shi Chiozaꞌ wiꞌe latj.
Naꞌch bizee Éfesonaꞌ biyoꞌe to ḻoo barkw.
22 Naꞌ ka betjeꞌ barkwaꞌ Cesareanaꞌ, wyajeꞌ Jerusalénnaꞌ jawapeꞌ chiox beṉꞌkaꞌ nonḻilallꞌ Jesúzaꞌ. Naꞌ bizee biyajeꞌ Antioquíanaꞌ.
23 Naꞌ bigaaṉeꞌ shloll, naꞌtech wzee wyajeꞌ sto shii to to yell ganaꞌ mbani Galácianaꞌ naꞌ Frígianaꞌ jatipcheꞌ lallꞌ beṉꞌkaꞌ nonḻilall Jesúzaꞌ.
Apólozaꞌ biꞌe xtillꞌ Chiozaꞌ Éfesonaꞌ
24 Naꞌ do kanaꞌ bllin to beṉꞌ Israel Éfesonaꞌ lieꞌ Apolos, beṉꞌ golj yell Alejandríanaꞌ. Naꞌ chak choꞌe dillꞌ lao lkweꞌ beṉꞌ, naꞌ ḻe nsedeꞌ Choꞌa Xtillꞌ Chiozaꞌ.
25 Apólozaꞌ nsedeꞌ c̱he X̱ancho Jesúzaꞌ, naꞌ do yic̱hj do lallee choꞌe dillꞌ c̱heꞌ kon ga zeelo ṉezileꞌ, per zeelo ṉezileꞌ daa bliꞌ bsedi Juannaꞌ c̱he daa chchoa beṉꞌ nisaꞌ.
26 Naꞌ Apólozaꞌ bi bllebeꞌ biꞌe dillꞌ c̱he Jesúzaꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ. Naꞌ ka beni Priscílanaꞌ len Aquílanaꞌ ka chliꞌ chsedi Apólozaꞌ, naꞌch bic̱heꞌgakeꞌneꞌ kwenc̱he bzajniꞌchgakileꞌneꞌ kwasḻoḻ ka nak xṉez Chiozaꞌ.
27 Ka goki Apólozaꞌ shajeꞌ ganaꞌ mbani Acáyanaꞌ, beṉꞌkaꞌ nonḻilallꞌ Jesúzaꞌ btipgakeꞌ lallee naꞌ bzejgakeꞌ to yish dii bex̱ee c̱he beṉꞌkaꞌ nonḻilallꞌ Jesúzaꞌ naꞌ, kwenc̱he wlebgakeꞌneꞌ. Naꞌ ka bllineꞌ, ḻe gokleneꞌ beṉꞌkaꞌ ba biyeshꞌlallii Chiozaꞌ kwenc̱he nonḻilallꞌgakeꞌ Jesúzaꞌ.
28 Naꞌ bliꞌ bsedileꞌ beṉꞌ nan klelan chajnii beṉꞌ Israelkaꞌ c̱he Jesúzaꞌ. Naꞌ bibi gok yee beṉꞌ Israelkaꞌ daa bliileꞌ ḻegakeꞌ to to ganaꞌ nyoj Choꞌa Xtillꞌ Chiozaꞌ daa na Jesúzaꞌ nakeꞌ Crístonaꞌ, beenaꞌ wseḻꞌ Chiozaꞌ iṉabiꞌe.