Bta bṉe beṉꞌ malkaꞌ beṉꞌ Tesalónicakaꞌ
17
Naꞌ ka bizaꞌ Páblonaꞌ len Sílazaꞌ, wdegakeꞌ yell Anfípolizaꞌ naꞌ yell Apolónianaꞌ, naꞌ bllingakeꞌ yell Tesalónicanaꞌ ganaꞌ zoa yoonaꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ.
2 Naꞌ lo shoṉ xman yogꞌ lla sabdkaꞌ wyaj Páblonaꞌ ganaꞌ chdop chllaggakeꞌ, kon ka yooloeꞌ choneꞌ, naꞌ beꞌleneꞌ ḻegakeꞌ Choꞌa Xtillꞌ Chiozaꞌ,
3 bzajniileꞌ ḻegakeꞌ Crístonaꞌ, beenaꞌ wlej Chiozaꞌ iṉabiꞌe, benan byen biya dii wxakꞌziꞌe naꞌ witeꞌ, naꞌ bibaneꞌ ladj beṉꞌ wetkaꞌ. Naꞌ chiꞌe ḻegakeꞌ:
―Jesúzaꞌ, beenaꞌ choeꞌlenꞌ leꞌ xtilleenaꞌ ṉaa, ḻenꞌ Crístonaꞌ, beenaꞌ wlej Chiozaꞌ iṉabiꞌe.
4 Naꞌ baḻ beṉꞌ Israelkaꞌ wyajḻeꞌgakeꞌ naꞌ bengakeꞌ txen Páblonaꞌ len Sílazaꞌ, naꞌ ḻekzkaꞌ zan beṉꞌ griegokaꞌ, beṉꞌkaꞌ ba choeꞌlaꞌogakeꞌ Chiozaꞌ, wyajḻeꞌgakeꞌ c̱he Jesúzaꞌ, naꞌ ḻekzkaꞌ zan noolkaꞌ zakii.
5 Naꞌ beṉꞌ Israelkaꞌ bi wyajḻeꞌ, gokxeꞌgakileꞌ Páblonaꞌ len Sílazaꞌ, naꞌ btopgakeꞌ beṉꞌ wdallagkaꞌ nak beṉꞌ mal, naꞌ wlekgakeꞌ to dii zed yellaꞌ. Naꞌch wyajgakeꞌ lill beenaꞌ le Jasón jadiljgakeꞌ Páblonaꞌ len Sílazaꞌ kwenc̱he gongakeꞌ ḻegakeꞌ lo naꞌ beṉꞌ yellkaꞌ.
6 Naꞌ daa bi zoa Páblonaꞌ len Sílazaꞌ naꞌ, naꞌch wdoyogakeꞌ Jasónnaꞌ naꞌ zi to c̱hop beṉꞌkaꞌ nonḻilallꞌ Jesúzaꞌ naꞌ jwaꞌgakeꞌ ḻegakeꞌ lao josc̱hiskaꞌ. Naꞌ wṉegakeꞌ zillj cheꞌgakeꞌ:
―Beṉꞌkaꞌ chda chbekgakeꞌ dii zed doxen yell-lioni ba blaꞌgakeꞌ yell c̱hechoni.
7 Naꞌ Jasónni ba blebzeꞌ ḻegakeꞌ lilleꞌnaꞌ. Naꞌ ba nakgakeꞌ toz bich chzenaggakeꞌ daa nllia Césaraꞌ biaꞌ goncho, ḻaꞌ nagakeꞌ zoa sto beṉꞌ wṉabiaꞌ le Jesús.
8 Naꞌ beṉꞌ yellkaꞌ len josc̱his c̱heꞌkaꞌ bllaagakeꞌ naꞌ goklleshꞌgakileꞌ.
9 Naꞌ wxenlallꞌ josc̱hiskaꞌ bllia Jasónnaꞌ mech len beṉꞌkaꞌ nakgakeꞌneꞌ txen, naꞌch bisangakeꞌ ḻegakeꞌ.
Páblonaꞌ len Sílazaꞌ wyajgakeꞌ Bereanaꞌ
10 Naꞌ kon ka goḻ, beṉꞌkaꞌ nonḻilallꞌ Jesúzaꞌ bisaꞌdogakeꞌ Páblonaꞌ len Sílazaꞌ kwenc̱he yiyajgakeꞌ yell Bereanaꞌ. Naꞌ ka bllingakeꞌ yellaꞌ, lii wyajtegakeꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ.
11 Naꞌ beṉꞌ Bereakaꞌ nakchgakeꞌ beṉꞌ wench aga ka beṉꞌ Tesalónicakaꞌ, naꞌ bibagakileꞌ bzenaggakeꞌ daa bzajnii Páblonaꞌ len Sílazaꞌ ḻegakeꞌ. Naꞌ yogꞌ lla biyiljgakeꞌ ḻee Choꞌa Xtillꞌ Chiozaꞌ shi nakan ka daa chliꞌ chsedgakileꞌ ḻegakeꞌ.
12 Naꞌ zan beṉꞌ Israelkaꞌ zoa naꞌ benḻilallꞌgakeꞌ Jesúzaꞌ naꞌ kaꞌkzə zan beṉꞌ griegokaꞌ, ka beṉꞌ byokaꞌ naꞌ ka noolkaꞌ zakii.
13 Naꞌch beṉꞌ Israelkaꞌ lleꞌ Tesalónicanaꞌ, beṉꞌkaꞌ bi benḻilallꞌ Jesúzaꞌ, ka wṉezgakileꞌ Páblonaꞌ choeꞌleneꞌ beṉꞌ Bereakaꞌ xtillꞌ Chiozaꞌ, naꞌch wyajgakeꞌ jata jaṉegakeꞌ beṉꞌ yellkaꞌ.
14 Naꞌ beṉꞌkaꞌ nonḻilallꞌ Jesúzaꞌ lii bseḻꞌtegakeꞌ Páblonaꞌ choꞌa nisdoꞌnaꞌlə, naꞌ Sílazaꞌ len Timotewaꞌ bigaaṉgakeꞌ Bereanaꞌzə.
15 Naꞌ beṉꞌkaꞌ zejlen Páblonaꞌ jwaꞌgakeꞌneꞌ ganaꞌ lliate yell Aténazaꞌ. Naꞌ ka zi yizaꞌgakeꞌ yiyajgakeꞌ Bereanaꞌ, Páblonaꞌ golleꞌ ḻegakeꞌ yeꞌgakeꞌ Sílazaꞌ len Timotewaꞌ wtalallꞌgakeꞌ shajgakeꞌ ganaꞌ zoeꞌ.
Páblonaꞌ zoeꞌ yell Aténazaꞌ
16 Naꞌ shlak chbez Páblonaꞌ Sílazaꞌ len Timotewaꞌ yell Aténazaꞌ, ḻe bllaa yic̱hjeꞌ daa bleꞌileꞌ to ni to naꞌ nzoa beṉꞌ Aténaskaꞌ diikaꞌ choeꞌlaꞌogakeꞌ.
17 Ni c̱heyi daan bzajniileꞌ beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ, naꞌ len zi x̱oṉj beṉꞌ griego. Naꞌ ḻekzkaꞌ yogꞌ lla wyajeꞌ ganaꞌ chak yaanaꞌ ganaꞌ lleꞌ llaꞌ beṉꞌ naꞌ beꞌleneꞌ ḻegakeꞌ dillꞌ.
18 Naꞌ baḻ epicúreokaꞌ, beṉꞌkaꞌ chsedgakeꞌ daa bliꞌ bsedi beenaꞌ wle Epicúreo, len baḻ estóicokaꞌ, wzologakeꞌ wdiḻ xtilleekaꞌ len Páblonaꞌ. Naꞌ baḻeꞌ cheꞌ:
―¿Beran naz beeni chshaljchgueꞌ?
Naꞌ zi baḻeꞌ nagakeꞌ:
―¿Aaga beenin zidyeꞌleneꞌ choꞌ dillaa daa nan chiyaḻꞌ weꞌlaꞌocho sto chios yoblə?
Wnagakeꞌ kaꞌ daa chyix̱jeꞌi Páblonaꞌ ḻegakeꞌ dillꞌ wen dillꞌ kob c̱he Jesúzaꞌ, chiꞌe ḻegakeꞌ bibaneꞌ ladj beṉꞌ wetkaꞌ.
19 Naꞌch bc̱heꞌgakeꞌ Páblonaꞌ to latj ganaꞌ nsiꞌgakeꞌ Areópago ga chdopgakeꞌ choeꞌgakeꞌ dillꞌ, naꞌ ka bllinlengakeꞌneꞌ, cheꞌgakeꞌ:
―Cheenintoꞌ iṉezintoꞌ bi dii koban chliꞌ chsediloꞌ.
20 Ḻaꞌ ndantekzi nak dillꞌki choo, naꞌ cheenintoꞌ iṉezintoꞌ bi zejin.
21 Ḻaꞌ yogꞌ beṉꞌ Aténaskaꞌ naꞌ ḻekzkaꞌ beṉꞌ zitꞌkaꞌ zoa naꞌ, bichkzə bilə chongakeꞌ, to chinozgakeꞌ bi dillꞌ kob wzenaggakeꞌ naꞌ to xtillii daazə choeꞌgakeꞌ yogꞌ lla.
22 Naꞌch Páblonaꞌ wzieꞌ ladjeꞌkaꞌ ganaꞌ nziꞌ Areópago, naꞌ golleꞌ ḻegakeꞌ:
―Leꞌ beṉꞌ Atenas, chakbeꞌidꞌ ḻe chibaile choeꞌlaꞌole diikaꞌ noni chios c̱hele.
23 Ḻaꞌ ba bleꞌidꞌ yell c̱heleni to to latj ganaꞌ chgoole diikaꞌ balaaṉ, naꞌ bleꞌidꞌ to ga daꞌ to dillꞌ dii na: “C̱he Chios, beenaꞌ kono nombiaꞌ.” Naꞌ beenaꞌ chgoole balaaṉ ḻaꞌkzi bi nombiaꞌleneꞌ, dillꞌ c̱heꞌnanꞌ zidyeꞌlenꞌ leꞌ ṉaa.
24 ’Chios, beenaꞌ ben yell-lioni naꞌ yogꞌ dii de lawinnaꞌ nakeꞌ X̱an yabanaꞌ naꞌ yell-lioni. Aga zoeꞌ ḻoo yoodoꞌ dii choni ṉiꞌa naꞌ beṉꞌ.
25 Naꞌ aga bi chyallji Chiozaꞌ dii iṉacho gak gon beṉꞌ yell-lionaꞌ c̱heꞌ. Ḻaꞌ ḻenꞌ noṉeꞌ yeḻꞌ mban c̱he yogꞌḻoḻcho, naꞌ noṉeꞌ bishbe c̱hecho, naꞌ yogꞌ bi dii de c̱hecho.
26 ’Ḻenꞌ bx̱e bsileꞌ to beṉꞌ yell-lio, naꞌ yogꞌḻoḻcho choꞌ nakcho xiiṉ dia c̱he beenaꞌ bx̱e bsileꞌ, naꞌ ḻeꞌkzeꞌ ba nllieꞌ biaꞌ baḻ yiz soacho yell-lioni naꞌ ganaꞌ soa to tocho.
27 Naꞌ bzoeꞌ choꞌ yell-lioni kwenc̱he yiyiljcho nakan goncho gombiaꞌchoneꞌ. Naꞌ dii ḻi gaḻꞌ gllin zelen Chiozaꞌ to tocho,
28 ḻaꞌ ḻenꞌ choneꞌ ka mbancho naꞌ ka chzo chdacho. Kanꞌ bzej baḻ beṉꞌ sinꞌ c̱helekaꞌ, beṉꞌkaꞌ wnagakeꞌ: “Nakcho xiiṉ Chiozaꞌ.”
29 Naꞌ daa nakcho xiiṉ Chiozaꞌ, bi chiyaḻꞌ gakicho nakeꞌ to beṉꞌ de or, de plat, de yaj, de yag, ka chaljlallꞌ beṉꞌkaꞌ chongakeꞌ diiki.
30 Kanaꞌteyi Chiozaꞌ bwialozeꞌ ben beṉꞌkaꞌ daa nazan c̱hegakeꞌ yeḻꞌ bi chajnii c̱heꞌkaꞌ, per ṉaanlla choneꞌ byen yogꞌḻoḻ beṉꞌ lleꞌ doxen yell-lioni yiyaj yilengakileꞌ.
31 Ḻaꞌ Chiozaꞌ ba bllieꞌ biaꞌ to lla goneꞌ yeḻꞌ josc̱his c̱he to to beṉꞌ lleꞌ yell-lioni, naꞌ goneꞌ c̱he to toeꞌ kon ka chidoḻee. Naꞌ ba bliileꞌ choꞌ beenaꞌ wlejeꞌ gon yeḻꞌ josc̱hisaꞌ daa biḻiseꞌneꞌ ladj beṉꞌ wetkaꞌ.
32 Naꞌ ka bengakileꞌ wna Páblonaꞌ Chiozaꞌ chisbaneꞌ beṉꞌ ladj beṉꞌ wetkaꞌ, baḻeꞌ bxillgakeꞌ, naꞌ zi baḻeꞌ gollgakeꞌneꞌ:
―Sto llagalə wzenagntoꞌ c̱hoꞌ c̱heyi dga choo dillꞌ.