Timotewaꞌ beneꞌ txen Páblonaꞌ len Sílazaꞌ
16
Naꞌch Páblonaꞌ len Sílazaꞌ bllingakeꞌ yell Dérbenaꞌ, naꞌtech wyajgakeꞌ yell Lístranaꞌ. Naꞌ naꞌ zoa to biꞌ xkwidꞌ nonḻilallꞌbꞌ Jesúzaꞌ lebꞌ Timoteo. Nakbꞌ xiiṉ to noolə Israel, naꞌ nooli nonḻilallee Jesúzaꞌ, per x̱abaa nakeꞌ beṉꞌ griego.
2 Naꞌ beṉꞌ Lístrakaꞌ len beṉꞌ Icóniokaꞌ nonḻilallꞌ Jesúzaꞌ beꞌgakeꞌ dillꞌ ḻe wen nsaꞌ c̱hebꞌ.
3 Naꞌ Páblonaꞌ wṉabileꞌbꞌ shajlemꞌ ḻegakeꞌ, naꞌ wloꞌebꞌ seṉ daa le circuncisión kwenc̱he bi gakzbani beṉꞌ Israelkaꞌ ḻebꞌ, ḻaꞌ ṉezgakileꞌ x̱abaa bi nakeꞌ beṉꞌ Israel.
4 Naꞌ yogꞌ yellkaꞌ ganaꞌ wdegakeꞌ beꞌlengakeꞌ beṉꞌkaꞌ nonḻilallꞌ Jesúzaꞌ dillꞌ c̱he diikaꞌ chiyaḻꞌ gongakeꞌ, diikaꞌ beꞌ postlkaꞌ dillꞌ kon beṉꞌkaꞌ ngoo lallꞌ naꞌgakeꞌ beṉꞌkaꞌ nonḻilallꞌ Jesúzaꞌ yell Jerusalénnaꞌ.
5 Naꞌch beṉꞌkaꞌ nonḻilallꞌ Jesúzaꞌ yellkaꞌ benḻilallꞌchgakeꞌneꞌ do yic̱hj do lallꞌgakeꞌ, naꞌ lla kon lla wyanchgakeꞌ.
Bleꞌdoꞌi Páblonaꞌ to beṉꞌ Macedonia chṉabileꞌneꞌ shajeꞌ lalleꞌnaꞌ
6 Páblonaꞌ len Sílazaꞌ naꞌ Timotewaꞌ to wdezgakeꞌ ganaꞌ mbani Frígianaꞌ len Galácianaꞌ, daa bi beꞌ Espíritu Sántonaꞌ latj lljeꞌgakeꞌ choꞌa xtillꞌ Chiozaꞌ ganaꞌ mbani Ásianaꞌ.
7 Naꞌ ka bllingakeꞌ gaoz yell-lio ganaꞌ le Misia, wnalallꞌgakeꞌ shajgakeꞌ ganaꞌ mbani Bitínianaꞌ, naꞌ ḻekzkaꞌ bi beꞌ Espíritu Sántonaꞌ latj shajgakeꞌ naꞌ.
8 Naꞌch wdegakeꞌ yell-lio c̱he Mísianaꞌ bllintegakeꞌ yell Tróazaꞌ daa llia choꞌa nisdoꞌnaꞌ.
9 Naꞌ lo yelaꞌ Chiozaꞌ beneꞌ ka bleꞌdoꞌi Páblonaꞌ to beṉꞌ byo, beṉꞌ Macedonia, zieꞌ chatꞌyoileꞌneꞌ, chiꞌeneꞌ: “Dagach Macedóniani kwenc̱he gaklenoꞌ netoꞌ.”
10 Naꞌ ka biyoll bleꞌdoꞌi Páblonaꞌ, lii bsiniꞌate c̱hentoꞌ kwenc̱he wyajntoꞌ Macedónianaꞌ, ḻaꞌ wyajniintoꞌ Chiozaꞌ cheenileꞌ shajntoꞌ lljeꞌlenntoꞌ beṉꞌkaꞌ lleꞌ naꞌ dillꞌ wen dillꞌ kob c̱he Jesúzaꞌ.
Páblonaꞌ naꞌ Sílazaꞌ wyajgakeꞌ Filípozaꞌ
11 Naꞌ yell Tróazaꞌ wyoontoꞌ barkwaꞌ naꞌ wyajntoꞌ shḻicha ganaꞌ llia to yell-lio lo nisdoꞌnaꞌ daa le Samotracia. Naꞌ betiyo bllinntoꞌ to yell dii le Neápolis.
12 Naꞌ wzaꞌntoꞌ Neápolizaꞌ wyajntoꞌ yell Filípozaꞌ. Nakan to yell ga lleꞌ beṉꞌ Rómakaꞌ, naꞌ nakan to yell xen dii zakii ganaꞌ mbani Macedónianaꞌ. Naꞌ bigaaṉntoꞌ naꞌ c̱hop shoṉ lla.
13 Naꞌ shlak zoantoꞌ naꞌ, lla sabdaꞌ bchejntoꞌ yellaꞌ naꞌ wyajntoꞌ to choꞌa yao ga chjeꞌḻwillgakeꞌ Chiozaꞌ. Naꞌ jc̱heꞌntoꞌ naꞌ, beꞌlenntoꞌ dillꞌ noolkaꞌ bdop bllag.
14 Naꞌ ladj noolkaꞌ len to beṉꞌ le Lidia. Nakeꞌ beṉꞌ yell Tiatira, naꞌ chitee lechꞌ wen dii nak de morad. Naꞌ choeꞌlawee Chiozaꞌ naꞌ X̱ancho Chiozaꞌ beneꞌ kwenc̱he bzenagueꞌ dillaa choeꞌ Páblonaꞌ.
15 Naꞌ ka wde wchoeꞌ nisaꞌ do bxooṉeꞌ, naꞌ wneꞌ netoꞌ:
―Shi chakile dii ḻi ba nonḻilallaa X̱ancho Jesúzaꞌ, ḻi shoꞌ naꞌ yigaaṉle lillaa.
Naꞌ beneꞌ byen jagaaṉntoꞌ lilleꞌnaꞌ.
16 Naꞌ to shii ka zejntoꞌ ganaꞌ choeꞌḻwillgakeꞌ Chiozaꞌ, naꞌ billagntoꞌ to biꞌ nool wewꞌ yoobꞌ dii x̱iwaa, naꞌ dii x̱iwaa chonan kwenc̱he chṉeyaabꞌ. Naꞌ nakbꞌ to biꞌ ndoo lla yel chomꞌ xshin beṉꞌ, naꞌ dii xen chon x̱amaꞌ gan daa chṉeyaabꞌ.
17 Naꞌch biꞌni wnobꞌ Páblonaꞌ shlak zejlennntoꞌneꞌ, chosyaabꞌ zillj, nabꞌ:
―Beṉꞌkin chongakeꞌ xshin Chiozaꞌ, beenaꞌ nak beṉꞌ choo beṉꞌ xen, naꞌ chzajniꞌgakileꞌ beṉꞌ nez ḻi c̱he Chiozaꞌ ganaꞌ shoꞌcho kwenc̱he bi kwiayiꞌcho.
18 Naꞌch kon kaꞌ wnabꞌ yogꞌ lla, naꞌ gokzedi Páblonaꞌ, naꞌch biyec̱hjeꞌ, golleꞌ dii x̱iwaa yoobꞌ:
―Kon yeḻꞌ wṉabiaꞌ c̱he Jesucrístonaꞌ niaꞌ liꞌ bichej.
Naꞌ lii bichejte dii x̱iwaa.
19 Naꞌ ka gokbeꞌi x̱amꞌkaꞌ bich bi mech gongakeꞌ gan, naꞌch bex̱ꞌgakeꞌ Páblonaꞌ len Sílazaꞌ naꞌ jwaꞌgakeꞌ ḻegakeꞌ lao josc̱hiskaꞌ.
20 Naꞌ ka bllinlengakeꞌ ḻegakeꞌ lao josc̱hiskaꞌ, naꞌ cheꞌgakeꞌ:
―Beṉꞌ Israelki chta chṉegakeꞌ beṉꞌ, lallchoni.
21 Naꞌ chliꞌ chsedgakileꞌ beṉꞌ dii bi chiyaḻꞌ goncho ni bi chiyaḻꞌ wlebcho, choꞌ nakcho beṉꞌ Roma.
22 Naꞌ beṉꞌ zan bdiꞌa naꞌ wṉegakeꞌ zban c̱he Páblonaꞌ len Sílazaꞌ. Naꞌch josc̱hiskaꞌ bc̱hogbiaꞌgakeꞌ wdiṉgakeꞌ xeꞌkaꞌ naꞌ bet wdingakeꞌ ḻegakeꞌ.
23 Naꞌ ka wde bet wdinchgagakeꞌ ḻegakeꞌ, naꞌ wloogakeꞌ ḻegakeꞌ lillyanaꞌ, naꞌ gollgakeꞌ beenaꞌ chap lillyanaꞌ gapeꞌ ḻegakeꞌ byendad kwenc̱he ki yilagakeꞌ.
24 Naꞌ daa gollgakeꞌ beeni kaꞌ, wloꞌe ḻegakeꞌ billꞌ xyoote naꞌ bṉiꞌe yen ṉiꞌekaꞌ to ḻee kwagꞌ dii nyidjgakeꞌ.
25 Naꞌ do ka chel Páblonaꞌ len Sílazaꞌ choeꞌḻwillgakeꞌ Chiozaꞌ naꞌ choḻgakeꞌ choeꞌlaꞌogakeꞌneꞌ, naꞌ beṉꞌkaꞌ sto de lillyanaꞌ chzenaggakeꞌ ka chongakeꞌ.
26 Naꞌ tokonganzi wde to bedxoꞌ xen wal naꞌ bṉiban doxen lillyanaꞌ. Naꞌ lii byaljten, naꞌ gdenkaꞌ diikaꞌ nc̱hejgakeꞌ beṉꞌkaꞌ de lillyanaꞌ tolazzin biyellgakan.
27 Naꞌ beenaꞌ chap lillyanaꞌ bibaneꞌ naꞌ bleꞌileꞌ ba nyaljchee lillyanaꞌ, naꞌch wlejeꞌ spad c̱heꞌnaꞌ nan yiyit kwineꞌ daa gokileꞌ yogꞌ beṉꞌkaꞌ de lillyanaꞌ ba billeshgakeꞌ.
28 Naꞌ Páblonaꞌ besyee, golleꞌneꞌ:
―¡Bibi goni kwinoꞌ! Nikz lleꞌ yogꞌntoꞌ.
29 Naꞌch beenaꞌ chap lillyanaꞌ wṉabeꞌ to yiꞌ naꞌ wyoodoeꞌ jawieꞌ ganaꞌ yoo Páblonaꞌ len Sílazaꞌ, naꞌ lii bc̱hekꞌte xibeꞌnaꞌ laweꞌkaꞌ do chxizzeꞌ daa ḻe bllebeꞌ.
30 Naꞌ lii bibejtieꞌ ḻegakeꞌ lillyanaꞌ, naꞌ chiꞌe:
―¿Leꞌ, beṉꞌdoꞌ, beran chiyaḻꞌ gonꞌ kwenc̱he bi kwiayaa?
31 Naꞌ gollgakeꞌneꞌ:
―Benḻilalloo X̱ancho Jesucrístonaꞌ, liꞌ naꞌ do xiiṉ xooloꞌ, kwenc̱he yisleꞌ leꞌ naꞌ bi kwiayiꞌle.
32 Naꞌ beꞌlengakeꞌ ḻeꞌ naꞌ beṉꞌkaꞌ zoa lilleꞌnaꞌ choꞌa xtillꞌ X̱ancho Jesúzaꞌ.
33 Naꞌch beenaꞌ chap lillyanaꞌ wdibeꞌ weꞌnaꞌ lliagakeꞌ, ḻaꞌkzi nakan waḻ chel. Naꞌ ḻekzkaꞌ yogꞌḻoḻtieꞌ lii wchoategakeꞌ nisaꞌ.
34 Naꞌ bic̱hiꞌe Páblonaꞌ len Sílazaꞌ lilleꞌnaꞌ naꞌ bweej bwaweꞌ ḻegakeꞌ. Naꞌ ḻe chibayi beeni do xiiṉ xooleꞌ daa ba nonḻilallꞌgakeꞌ Chiozaꞌ.
35 Naꞌ ka wyeeniꞌ, josc̱hiskaꞌ bseḻꞌgakeꞌ beṉꞌ jellgakeꞌ beenaꞌ chap lillyanaꞌ yisaneꞌ ḻegakeꞌ kwenc̱he yiyajgakeꞌ.
36 Naꞌ beenaꞌ chap lillyanaꞌ golleꞌ Páblonaꞌ:
―Ba bseḻꞌ josc̱hiskaꞌ beṉꞌki, naꞌ nagakeꞌ ba de lsens yisanꞌ leꞌ. Naꞌ wak yiyajle ṉaa, kochno bi goni leꞌ.
37 Naꞌ Páblonaꞌ golleꞌ ḻegakeꞌ:
―Netoꞌ ndentoꞌ kwent yell Rómanaꞌ, naꞌ ni bi biyiljniꞌagakeꞌ bin benntoꞌ ba bet wdingakeꞌ netoꞌ lao lkweꞌ beṉꞌ naꞌ wdix̱jzgakeꞌ netoꞌ lillyani. ¿Anaꞌ ṉaa cheenzgakileꞌ yisangakeꞌ netoꞌ do ngashꞌzə? Yidch kwingakeꞌ yibejgakeꞌ netoꞌ.
38 Naꞌ jayellgakeꞌ josc̱hiskaꞌ daa goll Páblonaꞌ ḻegakeꞌ, naꞌ josc̱hiskaꞌ ḻe bllebgakeꞌ ka wṉezgakileꞌ Páblonaꞌ len Sílazaꞌ ndegakeꞌ kwent ka beṉꞌ Roma.
39 Naꞌch wyaj josc̱hiskaꞌ jayeꞌxengakeꞌ Páblonaꞌ len Sílazaꞌ naꞌ bibejgakeꞌ ḻegakeꞌ lillyanaꞌ, naꞌ gotꞌyogakileꞌ ḻegakeꞌ bich yigaaṉgakeꞌ yellaꞌ.
40 Naꞌ ka bichej Páblonaꞌ len Sílazaꞌ lillyanaꞌ, naꞌ biyajgakeꞌ lill Lídianaꞌ jawiagakeꞌ beṉꞌkaꞌ ba nonḻilallꞌ Jesúzaꞌ naꞌ btipchgakeꞌ lallꞌgakeꞌ, naꞌtech bizaꞌgakeꞌ.