Bishaꞌ Chiozaꞌ yic̱hjlallꞌdoꞌ Sáulonaꞌ
9
Naꞌ Sáulonaꞌ kon chdeꞌ chwall chshebeꞌ beṉꞌkaꞌ nonḻilallꞌ X̱ancho Jesucrístonaꞌ. Chiyiljlallee nak goneꞌ kwenc̱he witeꞌ ḻegakeꞌ. Daan wyajeꞌ Jerusalénnaꞌ jawieꞌ bx̱oz choo bx̱oz xennaꞌ
2 naꞌ wṉabileꞌneꞌ wzejeꞌ twej yish c̱he to to ganaꞌ chdop chllag beṉꞌ wlall c̱heꞌkaꞌ choeꞌḻwillgakeꞌ Chiozaꞌ yell Damásconaꞌ, naꞌ weꞌn lsens yiyiljeꞌ beṉꞌkaꞌ ba wyoo lo nez ḻi nez shaoꞌ c̱he Jesucrístonaꞌ naꞌ gox̱ee ḻegakeꞌ kwenc̱he yic̱hiꞌe ḻegakeꞌ pres Jerusalénnaꞌ, ka noolə ka beṉꞌ byo.
3 Ka ni ngwee nez, naꞌ ba zoa illineꞌ yell Damásconaꞌ, tokonganzi wyec̱hj to beeniꞌ xen wal ḻeꞌ dii zaꞌ yabalə.
4 Naꞌ Sáulonaꞌ jc̱hazeꞌ lo yonaꞌ naꞌ benileꞌ to shii beṉꞌ, chiꞌeneꞌ:
―Saulo, Saulo, ¿bic̱he chc̱hiꞌ chsakꞌzoꞌ nadꞌ?
5 Naꞌch Sáulonaꞌ chiꞌe:
―¿Nora liꞌ, beṉꞌ?
Naꞌch billii beenanꞌ, chiꞌe:
―Nadaan Jesúzaꞌ, beenaꞌ chc̱hiꞌ chsakoo. Naꞌ daa chonoꞌ kaꞌ, ziꞌ c̱he kwinzonꞌ chonoꞌ naꞌ chak c̱hoꞌ ka chak c̱he gooṉaꞌ chilibb xisaꞌ daa chbibeꞌb kwenc̱he saꞌb.
6 Naꞌch Sáulonaꞌ ax̱t chxiztiteꞌ daa chllebeꞌ, naꞌ golleꞌneꞌ:
―X̱anꞌ, ¿beran cheeniloꞌ gonꞌ?
Naꞌ X̱anchonaꞌ chiꞌeneꞌ:
―Biyas naꞌ wyaj Damásconaꞌ, naꞌ naꞌ iṉagakeꞌ liꞌ daa chiyaḻꞌ gonoꞌ.
7 Naꞌ beṉꞌkaꞌ zejlengakeꞌ Sáulonaꞌ txen ḻegatega wzegakeꞌ bibangakileꞌ naꞌ bllebgakeꞌ, daa bengakileꞌ chak xṉe, per ni to kono bleꞌgakileꞌ.
8 Naꞌch biyas Sáulonaꞌ lo yonaꞌ. Naꞌ ka bix̱aꞌ jalaweꞌnaꞌ aga bleꞌchileꞌ. Naꞌ beṉꞌkaꞌ zejleneꞌ txen bex̱ꞌgakeꞌ neenaꞌ kwenc̱he bc̱heꞌgakeꞌneꞌ yell Damásconaꞌ.
9 Naꞌ shoṉ lla bi gok ileꞌileꞌ, ni bi weej wdaweꞌ.
10 Naꞌ Damásconaꞌ zoa to beṉꞌ chonḻilallee Jesúzaꞌ naꞌ lieꞌ Ananías, naꞌ ben X̱ancho Jesúzaꞌ ka bleꞌdoꞌileꞌneꞌ, naꞌ chiꞌeneꞌ:
―Ananías.
Naꞌ Ananíazaꞌ chiꞌeneꞌ:
―Ni ziaꞌ, X̱anꞌ.
11 Naꞌ X̱anchonaꞌ chiꞌeneꞌ:
―Wyaj, naꞌ wyoo nezaꞌ daa le Shḻicha, naꞌ lill Júdazaꞌ iṉaboꞌ to beṉꞌ Tarso, beṉꞌ le Saulo. Ba choeꞌḻwilleꞌ nadꞌ,
12 naꞌ ba bleꞌdoꞌileꞌ liꞌ choo ganaꞌ zoeꞌ naꞌ chx̱oa noonaꞌneꞌ kwenc̱he yileꞌileꞌ.
13 Ka beni Ananíazaꞌ chiꞌeneꞌ kaꞌ, naꞌ golleꞌneꞌ:
―X̱anꞌ, ze xtillꞌ beenaꞌ chsakꞌziꞌe beṉꞌkaꞌ nonḻilallꞌ liꞌ Jerusalénnaꞌ.
14 Naꞌ ṉaa ba blee ni nox̱ee yish daa bzej bx̱ozkaꞌ chṉabiaꞌ daa choꞌen lsens gox̱ee yogꞌḻoḻntoꞌ, netoꞌ choeꞌḻwillntoꞌ liꞌ, naꞌ yic̱hiꞌe netoꞌ pres Jerusalénnaꞌ.
15 Naꞌ X̱ancho Jesúzaꞌ golleꞌneꞌ:
―Wyaj, ḻaꞌ ba wlejꞌ Sáulonaꞌ kwenc̱he wiꞌe xtillaanaꞌ lao beṉꞌkaꞌ bi nak beṉꞌ Israel, naꞌ lao beṉꞌ wṉabiaꞌ c̱heꞌkaꞌ, naꞌ ḻekzkaꞌ laole leꞌ nakle beṉꞌ Israel.
16 Nadꞌ wliidee ka chiyaḻꞌ siꞌ sakee ni c̱haꞌ.
17 Naꞌch Ananíazaꞌ wyajeꞌ ganaꞌ zoa Sáulonaꞌ naꞌ wyoꞌe ḻoo yoonaꞌ, naꞌ bx̱oa neenaꞌneꞌ. Naꞌ chiꞌeneꞌ:
―Saulo, beṉꞌ bishꞌ, X̱ancho Jesúzaꞌ, beenaꞌ wṉieꞌ liꞌ tnezaꞌ kanaꞌ zoꞌ ni, ba bseḻee nadꞌ kwenc̱he gonꞌ ka yileꞌiloꞌ naꞌ soa Espíritu Sántonaꞌ ḻoo yic̱hjlallꞌdoꞌnaꞌ.
18 Naꞌ ka bx̱oa neenaꞌ Sáulonaꞌ, lii bikwaste jalaweꞌnaꞌ daa nak ka yid bdeej, naꞌ bileꞌileꞌ. Naꞌch bizollee naꞌ wchoeꞌ nisaꞌ.
19 Naꞌ ka wdaweꞌ, biyakshaoꞌlallee, naꞌ bigaaṉleneꞌ beṉꞌkaꞌ nonḻilallꞌ Jesúzaꞌ yell Damásconaꞌ zan lla.
Beꞌ Sáulonaꞌ xtillꞌ Chiozaꞌ yell Damásconaꞌ
20 Naꞌ lii wzolote Sáulonaꞌ choꞌe xtillꞌ Crístonaꞌ to to ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ yell Damásconaꞌ, naꞌ chiꞌe beṉꞌkaꞌ Jesúzaꞌ nakeꞌ Xiiṉ Chiozaꞌ.
21 Naꞌ yogꞌ beṉꞌkaꞌ bengakileꞌ dillꞌ daa choeꞌ Sáulonaꞌ chibangakileꞌ, naꞌ cheꞌ ljwelleꞌ:
―¿Aaga beenin chdeꞌ chc̱hiꞌ chsakee beṉꞌkaꞌ nonḻilallꞌ Jesúzaꞌ Jerusalénnaꞌ? Naꞌ ¿aaga ni c̱heyinnanꞌ bideꞌ ni kwenc̱he yic̱hiꞌe yogꞌḻoḻgakeꞌ pres lljasaneꞌ ḻegakeꞌ lao bx̱ozkaꞌ chṉabiaꞌ?
22 Naꞌ btipch lallꞌ Sáulonaꞌ kwenc̱he zizikchli biꞌe dillꞌ nan Jesúzanꞌ nakeꞌ beenaꞌ bc̱heb Chiozaꞌ wseḻee kwenc̱he iṉabiꞌe, naꞌ bich gok iṉa beṉꞌ Israelkaꞌ lleꞌ yell Damásconaꞌ bi nakan kaꞌ.
Bila Sáulonaꞌ lo naꞌ beṉꞌ Israelkaꞌ
23 Ka ba gok zan lla choeꞌ Sáulonaꞌ xtillꞌ Jesúzaꞌ yell Damásconaꞌ, naꞌ beṉꞌ Israelkaꞌ lleꞌ naꞌ bshag ljwellgakeꞌ nan witgakeꞌneꞌ.
24 Naꞌ gokbeꞌi Sáulonaꞌ ba chinogakeꞌneꞌ. Ka waḻ ka tella wdapgakeꞌ choꞌa puert c̱he zeenaꞌ daa nec̱hj yellaꞌ kwenc̱he gox̱ꞌgakeꞌneꞌ ka yichejeꞌ naꞌ witgakeꞌneꞌ.
25 Naꞌch beṉꞌkaꞌ nonleneꞌ txen, waḻ-lə wloogakeꞌneꞌ to ḻoo llom naꞌ biḻetjgakeꞌneꞌ ḻee zeenaꞌ nec̱hj yellaꞌ kwenc̱he bileꞌ.
Billin Sáulonaꞌ Jerusalénnaꞌ
26 Ka billin Sáulonaꞌ Jerusalénnaꞌ, gokileꞌ ḻeneꞌ beṉꞌkaꞌ nonḻilallꞌ Jesúzaꞌ, per yogꞌḻoḻeꞌ bllebgakeꞌneꞌ, bi wyajḻeꞌgakeꞌ shi dii ḻi ba chonḻilallee Jesúzaꞌ.
27 Naꞌ Bernabénaꞌ bc̱hiꞌe Sáulonaꞌ ganaꞌ lleꞌ postlkaꞌ. Naꞌ golleꞌ ḻegakeꞌ nan Sáulonaꞌ bleꞌileꞌ X̱ancho Jesúzaꞌ tnezaꞌ ka zejeꞌ yell Damásconaꞌ, naꞌ Jesúzaꞌ beꞌleneꞌneꞌ dillꞌ. Naꞌ ḻekzkaꞌ golleꞌ ḻegakeꞌ bi bllebeꞌ biꞌe xtillꞌ Jesúzaꞌ yell Damásconaꞌ.
28 Naꞌ kaꞌ gok bigaaṉeꞌ Jerusalénnaꞌ gokeꞌ txen beṉꞌkaꞌ nonḻilallꞌ Jesúzaꞌ, naꞌ wal inlleb gokeꞌ biꞌe xtillꞌ X̱ancho Jesúzaꞌ.
29 Naꞌ beꞌleneꞌ dillꞌ beṉꞌ Israelkaꞌ chṉe dillꞌ griegonaꞌ kwenc̱he shajḻeꞌgakeꞌ c̱he Jesúzaꞌ, per ḻegakeꞌ goklallꞌligakeꞌ witgakeꞌneꞌ.
30 Naꞌ ka wṉezi beṉꞌkaꞌ nonḻilallꞌ Jesúzaꞌ ba chinogakeꞌ Sáulonaꞌ kwenc̱he witgakeꞌneꞌ, bc̱heꞌgakeꞌneꞌ Cesareanaꞌlə. Naꞌ ka bllingakeꞌ naꞌ, naꞌ biseḻꞌgakeꞌneꞌ Társonaꞌlə ganaꞌ nak lalleꞌ.
31 Naꞌch beṉꞌkaꞌ nonḻilallꞌ Jesúzaꞌ doxen Judeanaꞌ, Galileanaꞌ naꞌ Samárianaꞌ wzoagakeꞌ mbalaz, ḻaꞌ koch no bc̱hiꞌ bsakꞌch ḻegakeꞌ. Naꞌ wlooshosh yic̱hjgakeꞌ toz Chiozaꞌ. Naꞌ Espíritu Sántonaꞌ gokleneꞌ ḻegakeꞌ kwenc̱he gokchachgakeꞌ lo xṉez Chiozaꞌ naꞌ kwenc̱he wyanchgakeꞌ.
Biyaki beenaꞌ le Eneas
32 Do kanaꞌ, chda Pédronaꞌ chjawieꞌ beṉꞌkaꞌ nonḻilallꞌ Jesúzaꞌ to to yell, naꞌ ḻekzkaꞌ jawieꞌ beṉꞌkaꞌ lleꞌ yell Lídanaꞌ.
33 Naꞌ yell Lídanaꞌ jtiꞌe to beṉꞌ leꞌ Eneas. Ba gok x̱onꞌ yiz dieꞌ bi chak c̱haseꞌ daa net ṉiꞌa neenaꞌ.
34 Naꞌ Pédronaꞌ golleꞌneꞌ:
―Eneas, Jesucrístonaꞌ yiyoneꞌ liꞌ. Biyas naꞌ bitob daa c̱hoꞌnaꞌ.
Naꞌ lii biyaste Enéazaꞌ.
35 Naꞌ yogꞌ beṉꞌkaꞌ lleꞌ yell Lídanaꞌ naꞌ yell Sarónnaꞌ, bleꞌgakileꞌ biyaki beenaꞌ naꞌ benḻilallꞌgakeꞌ X̱ancho Jesúzaꞌ.
Biban Dorcazaꞌ ladj beṉꞌ wetkaꞌ
36 Naꞌ ḻekzkaꞌ yell Jópenaꞌ wzoa to noolə benḻilallee Jesúzaꞌ, naꞌ wlieꞌ Tabita,a naꞌ dillꞌ griegonaꞌ cheꞌgakeꞌneꞌ Dorcas. Naꞌ nooli, shlak wbaneꞌ toshiizi bzani ṉiꞌa neenaꞌ gokleneꞌ beṉꞌ, naꞌ biyeshꞌlallileꞌ beṉꞌkaꞌ bibi de c̱heyin.
37 Naꞌ bllin to lla gok Dorcazaꞌ to yillweꞌ naꞌ witeꞌ. Naꞌch biyoll biwazjgakeꞌneꞌ, jadix̱jgakeꞌneꞌ ḻoo yoo c̱heꞌnaꞌ llia shkwianaꞌ chaꞌlə.
38 Naꞌ Jópenaꞌ llian gaozə yell Lídanaꞌ, naꞌ beṉꞌkaꞌ wṉezgakileꞌ zoa Pédronaꞌ yell Lídanaꞌ, naꞌch bseḻꞌgakeꞌ c̱hop beṉꞌ jellgakeꞌneꞌ:
―Shoꞌgach Jópenaꞌ ṉaate.
39 Naꞌch Pédronaꞌ wzee zejleneꞌ beṉꞌkaꞌ Jópenaꞌ. Naꞌ ka bllineꞌ, naꞌ jwaꞌgakeꞌneꞌ ḻoo yoonaꞌ ganaꞌ de beṉꞌ wetaꞌ, naꞌ yogꞌ nool wizebkaꞌ wyec̱hjgakeꞌ Pédronaꞌ chbellgakeꞌ, naꞌ bliꞌgakileꞌneꞌ xeꞌkaꞌ daa ben dii Dorcazaꞌ shlak wbaneꞌ.
40 Naꞌ Pédronaꞌ bibejeꞌ yogꞌḻoḻeꞌ chyoolə, naꞌ bc̱hekꞌ xibeꞌnaꞌ beꞌḻwilleꞌ Chiozaꞌ. Naꞌch bwieꞌ noolaꞌ ba wit naꞌ golleꞌneꞌ:
―Tabita, biyas.
Naꞌch lii bix̱aꞌte jalao Dorcazaꞌ chwieꞌ Pédronaꞌ. Naꞌch biyaseꞌ bibiꞌe.
41 Naꞌ Pédronaꞌ bex̱ee neenaꞌ naꞌ bisolléeneꞌ. Naꞌch biṉieꞌ nool wizebkaꞌ naꞌ nochlə beṉꞌkaꞌ nonḻilallꞌ Jesúzaꞌ kwenc̱he bizoeꞌneꞌ shiꞌa shbaneꞌ laweꞌkaꞌ.
42 Naꞌ wze dillꞌ doxen yell Jópenaꞌ ka gok c̱he Dorcazaꞌ, naꞌ beṉꞌ zan benḻilallꞌgakeꞌ X̱ancho Jesúzaꞌ.
43 Naꞌ Pédronaꞌ bigaaṉeꞌ Jópenaꞌ zan lla lill Simónna, beenaꞌ chkoll yidxa bayix̱ꞌkaꞌ.