2 To bairi judío maja na ca-yerijãri rʉmʉ ca-ano Jesú na ca-neñapo bueri wiipʉ Dio ye quetire na ca-buio jʉgoyupʉ.

Camaja capaarã cʉ̃ ca-buiorijere apirã ca-api acʉacoajuparã.

Api acʉari oco bairo ca-ame ĩiñuparã:

—¿Noopʉ atie cʉ̃ ca-buio majirijere cʉ̃ ca-majiñuparí?

¿Dope bairo majuu to bairije cá-áti majiña maniere cʉ̃ cá-áti majiñuparí?

3 Atona ca-aninucuecʉna ãmi.

Yucʉ pãiri mena macajere cá-átinucuecʉ macʉ,

María macʉna ãmi.

Jacobo,

José,

Juda,

Simón na jʉgocʉna ãmi.

Cʉ̃ bairã romiri quena mani tʉna aninucuma,

ca-ame ĩiñuparã.

To bairo ĩi tʉgooñarã cʉ̃ ca-api nʉcʉbʉgogaquẽjuparã.

4 To bairo cʉ̃re na ca-nʉcʉbʉgogaquẽto tʉjʉʉ oco bairo na ca-ĩiñupʉ Jesú:

—Jicãʉ Dio ye quetire buiori majocʉ ucʉ̃ aperopʉ cʉ̃ ca-buio teñaro to macana cʉ̃ api nʉcʉbʉgorãma.

Cʉ̃ ya maca macana maca,

cʉ̃ yarã majuu,

cʉ̃ ya wii macana jeto cʉ̃ nʉcʉbʉgoquẽnama,

ca-ĩiñupʉ Jesú.

5-6 To bairi topʉ cʉ̃ ca-bʉcʉarica macapʉ capee cá-áti majiña mani wame cá-áti iñooquẽjupʉ,

cʉ̃re na ca-api nʉcʉbʉgoquẽto tʉgooñarique paibacʉ.

Jicãarãacã jetore ca-riarãre na ñiga peori na ca-netoo catíoyupʉ baii pʉa.

Cabero to tʉacã ca-ani macaripʉ cʉ̃ ye quetire ca-buio teñanucuñupʉ.

7 Cabero Jesú cʉ̃ buerã doce canacãʉre cʉ̃ tʉpʉ neori pʉgarãri jeto cʉ̃ ye quetire na ca-buio teña roti jʉgoyupʉ.

To bairi camaja na yeripʉ ca-wãtia jañarãre na ca-buu reeboja majipe quenare na ca-jooyupʉ.

8 Apeye unie na ca-cʉgorijere na ca-jee aá rotiquẽjupʉ.

Wajopoa uno,

ʉgarique,

niyeru quenare na ca-jee aá rotiquẽjupʉ.

Tuericʉ jetore na ca-ne aá rotiyupʉ.

9 Rʉpo jutii na ca-cʉtarije jeto,

na jutii na ca-jañarije jeto menare na ca-jooyupʉ.

Na ca-wajoa jañape macare na ca-jee aá rotiquẽjupʉ.

10 Oco bairo na ca-ĩiñupʉ:

—Caroaro mʉjaare ca-ani rotii ucʉ̃ ya wiipʉ jãa ejarã ti wiipʉna anicõaña ti macapʉ mʉja ca-ani rʉmʉri cõo.

11 Noo mʉjaare aperã na ca-booquẽto,

Dio ye quetire mʉja ca-buioro na ca-apigaquẽto topʉ mʉja buti weogarã.

Buti aána mʉja rʉporipʉre jita ca-tujarijere pa bate reeya.

To bairo ána,

mʉjaare jã ca-buioro mʉja ca-apigaquẽtore bairona mʉja booquẽemi Dio,

na ĩi iñoorã mʉja átigarã.

Cariapena mʉjaare yʉ ĩi.

Dio camajare cʉ̃ ca-bejepa rʉmʉ ca-ano ti maca macanare mʉjaare ca-booquetanare seeto na popiyeyegʉmi.

Sodoma,

Gomora macana tirʉmʉpʉ macanare cʉ̃ ca-popiyeyericaro netoro na popiyeyegʉmi Dio,

ca-ĩiñupʉ Jesú.

12 To bairo cʉ̃ ca-ĩiro bero cá-aácoajuparã yua.

Aá,

camajare,

“Caroorijere mʉja cá-átinucurijere tʉgooña jʉtiriti wajoaya,”

ca-ĩi buio teñanucuñuparã.

13 To bairi capaarã camajare na yeripʉ ca-wãtia jañarã quenare ca-ree buubojayuparã,

Dio cʉ̃ ca-tutuarije mena.

Capaarã ca-riayecʉna quenare ʉje mena wareri na ca-netoo catíonucuñuparã.

14 To bairi camaja nipetirã Jesú ca-riarãre ca-netoo catíorijere ca-queti apiyuparã.

To bairi Ʉpaʉ Herode quena ca-queti apiyupʉ.

Tiere queti apiri oco bairo ca-ĩiñupʉ:

—Juan camajare bautisari majocʉ na ca-rʉpoa pa ta rocaricʉpʉ anibacʉ quena tunu catíricʉmi.

Ca-tunu catíricʉ aniri capee majuu áti iñoo netonucuʉmi,

ca-ĩiñuparã jicãarã.

15 Aperã maca oco bairo ca-ĩiñuparã:

—Aniquẽcʉmi.

Tirʉmʉpʉ macacʉpʉ Dio ye queti buiori majocʉ Elías ca-aniñaricʉ tunu catíricʉmi,

ca-ĩiñuparã.

Aperã maca:

—Cʉ̃ quena tirʉmʉpʉ macana Dio ye quetire buiori majare bairona ca-baii ãcʉmi,

ca-ĩiñuparã.

16 To bairo na ca-ĩiro apii Herode maca oco bairo ca-ĩiñupʉ:

—Tirʉmʉpʉ yʉ ca-rʉpoa pa ta roca rotiricʉna ãcʉmi.

Juan bautisari majocʉna tunu catíricʉmi,

ca-ĩiñupʉ Herode.

17 Herode to jʉgoyepʉ Herodía ca-wamecʉco jʉgori Juan're presopʉ cʉ̃ ca-ñee aá rotiyupʉ.

Cõ Herodía cʉ̃ bai Felipe ca-wamecʉcʉ nʉmo ca-añupo.

To bairo cõ ca-anibato quena Herode maca cõ ca-neñupʉ.

To bairo cʉ̃ cá-áto tʉjʉri Juan bautisari majocʉ Herodere oco bairo cʉ̃ ca-ĩiñupʉ:

18 —Mʉ bai nʉmore nʉmo cʉtiqueticõaña.

To bairi mʉ cá-átie ñuuquẽe,

ca-ĩiñupʉ.

19 To bairo cʉ̃ ca-ĩinucurije wapa Herodía Juan're seeto tʉjʉ punijiniri Herodere,

“Mʉ polisíare cʉ̃ jĩa rotiya Juan're,”

ca-ĩibajupo.

To bairo ĩibaco quena dope bairo cá-áti majiquẽjupo.

20 Herode maca Juan're,

“Ca-ñuʉ ãmi,

caroorije mácʉ ãmi,”

ca-ĩi majiñupʉ.

To bairo ĩi majiri Juan're rooro na cá-áti rotiquẽjupʉ.

Juan cʉ̃ ca-buiorijere api acʉari,

“¿Dope bairo ĩigʉ cʉ̃ ĩití?”

ca-ĩi tʉgooñañupʉ.

To bairo ĩi tʉgooñabacʉ quena caroaro cʉ̃ ca-apiganucuñupʉ.

21 Cabero Herode cʉ̃ ca-buiarica rʉmʉ ca-ano boje rʉmʉ ca-quenooñupʉ.

Boje rʉmʉ quenoo,

cʉ̃ mena macana cʉ̃ ẽoro ca-rotirã,

cʉ̃ yarã polisía maja ʉparãre,

aperã Galilea yepa macana ca-ani majuurã quenare na ca-pii neoñupʉ,

yʉ boje rʉmʉ tʉjʉrã ajá ĩi.

To bairo ca-bairi paʉ Herodía Juan're cõ ca-jĩa rotipere ca-tʉgooña bʉgayupo.

22 To bairi Herode cʉ̃ ca-pii neoricarã nipetirãre na ca-jʉgo ʉgayupʉ.

Na ca-ʉgari paʉ Herodía maco jãa ejari na ca-baja iñooñupo.

Cõ ca-baja iñoorijere Herode jãa aperã cʉ̃ mena ca-ruirã seeto majuu ca-tʉjʉ wariñuuñuparã.

Tiere tʉjʉ wariñuuri Herode oco bairo cõ ca-ĩiñupʉ Herodía macore:

—Noo mʉ ca-boorije,

yʉre mʉ ca-jenigari wamere mʉ yʉ joogʉ.

23 To bairi cʉ̃ ca-piiricarã na ca-apiropʉ:

—Ĩitoricaro mano ĩi mʉ yʉ ĩi,

to bairi yʉ ca-rotiri yepa quenare mʉ ca-jeniata ca-recomaca mena mʉ yʉ joo maji,

cõ ca-ĩiñupʉ.

24 To bairo cʉ̃ ca-ĩiro apio,

cõ paco tʉpʉ aá,

cõre ca-jeniñañupo:

—¿Ñee unie macare cʉ̃re yʉ jenioatí?

ca-ĩiñupo.

To bairo cõ ca-ĩiro apio oco bairo cõ ca-ĩiñupo cõ paco maca:

—Juan bautisari majocʉ rʉpoare pa ta neri na ne apáro,

cʉ̃ ĩi jeniya,

ca-ĩiñupo.

25 To bairo cõ ca-ĩiro nemoona Herode tʉpʉ jãa ejari oco bairo cʉ̃ ca-ĩiñupo:

—Yucʉacã yoaro mee Juan bautisari majocʉ rʉpoare pa tari jotʉ bapa mena ne jãari yʉre na joato,

ca-ĩiñupo.

26 To bairo cõ ca-ĩiro apii Ʉpaʉ Herode seeto majuu ca-tʉgooña jʉtiritiyupʉ.

Nipetirã topʉ ca-neñaporã na ca-apiro,

“Mʉ ca-boori wame yʉ mʉ ca-jeniata mʉ yʉ joogʉ,”

ca-ĩricʉ aniri dope bairo ca-ĩito majiquẽjupʉ.

27 To bairi,

“Yʉ jooquẽe,”

ca-ĩi majiquẽjupʉ.

To bairi nemoona Ʉpaʉ Herode cʉ̃ polisíare Juan rʉpoare ca-pa ta neatí rotiyupʉ.

28 To bairi polisía preso wiipʉ aá,

Juan rʉpoare pa ta,

jotʉ bapapʉ ne jã atíri Herodía macore cõ ca-jooyupʉ.

Cõre cʉ̃ ca-jooro cõ maca cõ pacore ca-joo netoñupo yua.

29 Juan're to bairo na cá-áti rocariquere queti apiri cʉ̃ ca-buiorijere ca-apiʉjanucuricarã atí,

cʉ̃ rupaʉ ãnatore ne aá,

cʉ̃ ca-yaa rocayuparã.

30 Cabero Jesú cʉ̃ ca-buio teña rotiricarã tunu ejarã,

nipetirije na cá-átajere,

na ca-buio teñarique quenare cʉ̃ ca-buioyuparã.

31 Na ca-buio yaparoro Jesú nare:

—Jitá,

petoacã mani yerijãgarã camaja na ca-manopʉ,

ca-ĩiñupʉ.

Camaja capaarã na tʉpʉre nairo majuu na ca-ejaro dope bairo cá-áti ʉga majiquẽjuparã.

32 To bairi Jesú cʉ̃ buerã mena na jeto cumua mena eja jãa,

camaja manopʉ cá-aácoajuparã.

33 Camaja capaarã topʉ na cá-aáto ca-tʉjʉyuparã.

To bairi Jesúre tʉjʉ majiri cʉ̃ cá-aátopʉ macaa macana ca-ano cõo maapʉ nipetirã ca-atʉ jʉgocoajuparã,

na ca-peña ejaparopʉre aána.

34 To bairi Jesú topʉ roca tuu,

ma eja,

na paarãacãre ca-tʉjʉyupʉ.

Na tʉjʉri na ca-bopaco tʉjʉyupʉ,

oveja nuuricarã nare ca-cotei manare bairona ca-ãna na ca-ano maca.

To bairi capee wameri na ca-ĩi buio jʉgoyupʉ.

35 To bairi ñamicaa ca-ano cʉ̃ buerã cʉ̃ tʉpʉ aáti oco bairo cʉ̃ ca-ĩiñuparã:

—Naio aáto bai.

Atopʉre maca maa.

36 To bairi camajare to cõona na tunu aá rotiya.

Topʉ tunu aáti macaripʉ na wapaye ʉgara aáparo.

37 To bairo na ca-ĩiro apii Jesú na ca-ĩiñupʉ cʉ̃ buerãre:

—Mʉjaana ʉgarique na nuuña.

To bairo cʉ̃ ca-ĩiro na maca cʉ̃ ca-ĩiñuparã:

—¿Pairo,

dosciento rʉmʉri wapataricaro cõo mena pan rupaarire jã wapayera aánaatí,

nare nugarã?

ca-ĩiñuparã.

38 To bairo na ca-ĩiro:

—Tʉjʉñaja.

¿Mʉjaa noo canacã pan rupaari mʉja cʉgotí?

ca-ĩi jeniñañupʉ Jesú.

To bairo cʉ̃ ca-ĩiro apiri bero cʉ̃ ca-buioyuparã:

—Jicã wamo canacã rupaa ãa.

To bairi wai quena pʉgarã ãma,

cʉ̃ ca-ĩiñuparã.

39 To bairo na ca-ĩiro apii,

camaja na ca-ano cõo ricati poari jeto caroa ta yepa ca-anopʉ na ca-rui rotiyupʉ Jesú.

40 To bairi jicã poarire cien majuu camaja ca-ruiyuparã.

Ape poarire cincuenta majuu camaja ca-ruiyuparã.

41 To bairi Jesú pan rupaarire,

na wai pʉgarãre neri jõ bui maca tʉjʉ mʉgori Dio cʉ̃ Pacʉre ca-ĩi wariñuu nʉcʉbʉgoyupʉ.

To bairo ĩi yaparo,

pan rupaarire pe mʉto,

cʉ̃ buerãre na ca-jooyupʉ,

camajare na bate rotii.

Wai quenare to bairona pe mʉto,

na ca-bate rotiyupʉ.

42 To bairo cʉ̃ cá-átiere camaja nipetirã ca-ʉga yapicoajuparã.

43 Na ca-ʉga yapi rʉgarije doce piiri jiraro majuu ca-jee neoñuparã.

44 Tiere ca-ʉgaricarã cinco mil majuu ca-añuparã caʉmʉa jeto ãnaa.

Cãromia,

cawimarã ca-cõoñaquẽjuparã.

45 Jesú camajare ʉgarique na nuuri bero cʉ̃ buerãre:

—Cumuare peña jʉgoya.

Ĩi nʉgoa Betsaidapʉ mʉja ani yuuwa camajare yʉ cá-aátaje uitoye,

na ca-ĩiñupʉ.

46 To bairo cʉ̃ buerãre ĩi,

camaja paarãacãre na aátaje uí yaparo ʉ̃taʉpʉ ca-wamʉ aájupʉ,

Diore cʉ̃ ĩi jeni nʉcʉbʉgoʉ aácʉ.

47 Canaiori paʉ bero Jesú buerã cumua mena ʉtabʉcʉrá recomacapʉ ca-pajayuparã.

Jesú maca jõ boepʉ jicãʉna ca-anicõañupʉ.

48 Seeto wino ca-papuro popiye ca-tamuoñuparã,

apero maca ca-papu jooro cariape maca wee aágarã.

To bairi Jesú cumuare na ca-wee eja atí majiquẽto ca-tʉjʉyupʉ.

To bairi ca-bujuparo jʉgoye na tʉpʉ aácʉ oco buina cá-aácoajupʉ.

Nare neto aácʉ ca-baibajupʉ.

49 To bairo oco bui cʉ̃ cá-atí nutuato tʉjʉrã,

ca-bai yajiricʉ wãti ãcʉmi ĩirã ca-tʉjʉ acʉa awajayuparã.

50 Na nipetirã cʉ̃ ca-tʉjʉ acʉayuparã.

To bairo na ca-tʉjʉ acʉaro Jesú maca nemoona oco bairo na ca-ĩiñupʉ:

—Uwiqueticõaña.

Yʉna yʉ ãa,

mʉja ʉpaʉna.

Tʉgooña uwi acʉaqueticõaña,

na ca-ĩiñupʉ.

51 To bairo na ĩri bero na mena cumuapʉre ca-eja jãañupʉ.

Cʉ̃ ca-eja jãari paʉna wino ca-papu janacoajupe.

Wino ca-papu janaro tʉjʉrã seeto ca-tʉjʉ acʉacoajuparã.

52 Ca-jʉgoye pan rupaarire Jesú cʉ̃ cá-áti bʉoriquere ca-tʉjʉricarã anibana quena cʉ̃ cá-áti maji netorijere ca-tʉgooña majiquẽjuparã.

Na yeri mena ca-tʉgooña puoquẽjuparã.

53 To bairo bairi bero peña,

Genesaret ca-wamecʉtopʉ ca-peña ejayuparã.

Topʉ ejarã na cumuare jia tu poo,

ca-maa nʉcañuparã.

54 Topʉ na ca-maa nʉcari paʉ to macana nemoona Jesúre ca-tʉjʉ majiñuparã.

55 To bairi nipetiropʉ atʉ aá,

ti yepa macana ca-riaye cʉnare na ca-jee atí rotiyuparã.

To bairo na ca-ĩiro apirã ca-riaye cʉnare na ca-cuñarije mena,

“Topʉ ãmi Jesú,”

camaja na ca-ĩiropʉ na ca-jee ejayuparã.

56 To bairi Jesú noo cʉ̃ ca-anopʉ macaripʉ,

macari tʉjaropʉ ca-riaye cʉnare jee atí,

macari recomacapʉ na cũuri,

Jesúre oco bairo cʉ̃ ca-ĩi jeninucuñuparã:

—Mʉ jutiiro yapa jetore jã pañagarã.

To bairo átiri jã netogarã,

cʉ̃ ca-ĩiñuparã.

To bairi cʉ̃ jutiiro yapare ca-pañaricarã ca-neto petiyuparã na ca-riaye cʉtiere yua.