2 Jesú buerãre jicãarã wamo cojequẽnana na ca-ʉgaro ca-tʉjʉyuparã fariseo maja.

“Ʉgagarã jʉgoye manire bairo wamo cojequẽema Jesú buerã.

To bairi caroorã ãnama,”

na ca-ĩi tʉjʉyuparã fariseo maja Jesú buerãre.

3 Fariseo maja,

judío maja nipetirã na ñicʉ jãa na cá-áti jʉgo atajere bairona cá-áti ʉjayuparã.

To bairi caroaro na wamorire cojeri bero jeto ca-ʉganucuñuparã.

4 Na ca-ʉgarique nuniri paʉpʉ ca-wapayera aátana tunu ejarã to bairona na wamorire ca-cojenucuñuparã.

Na ñicʉa na cá-átinucurique cõo cá-átinucuñuparã.

To bairona etirica baparire na ca-pio jãanucuri rʉri quenare,

na come rʉri quenare ca-cojenucuñuparã.

To bairo mani cá-átiquẽpata Dio,

“Caroorã ãma,”

mani ĩi tʉjʉboʉmi ĩirã,

to bairo cá-átinucuñuparã ti wamere yua.

5 To bairi Jesú buerã na ca-wamo cojequẽto tʉjʉrã Jesúre cʉ̃ ca-ĩi jeniñañuparã fariseo maja,

judío majare cabuerã:

—¿Nope ĩirã mani ñicʉa na cá-átinucuriquere na átiquẽetí?

Na wamorire cojequẽnana ʉgarã rooro ána áama,

ca-ĩiñuparã.

6 To bairo na ca-ĩiro oco bairo na ca-ĩiñupʉ Jesú:

—Cariapena ca-ĩi ucayupi Isaía tirʉmʉpʉ macacʉ Dio ye quetire buiori majocʉ mʉja ca-baipere.

Oco bairo ca-ĩi ucayupi:

9 ’Dio ye macare mʉja reecõanucu,

mʉja ñicʉa na cá-áti jʉgo átaje jetore átigarã,

na ca-ĩinemoñupʉ Jesú.

10 —Oco bairo ca-ĩi ucayupi Moisé:

“Mʉja pacʉare na nʉcʉbʉgoya.

Rooro na pacʉare ca-ĩirã unare na ca-jĩa reepe ãa.”

11 Mʉja maca ti wamere mʉja bai netoonucu,

oco bairo mʉja pacʉare na ĩri:

“Atie niyerure mʉjaare yʉ joo majiquẽe,”

mʉja pacʉare jocarãna na mʉja ĩi.

“Dio ye ca-anipe ãa,

cʉ̃re yʉ ca-joope.

To bairi mʉjaare yʉ átinemo majiquẽe,”

mʉja pacʉare jocarãna na mʉja ĩi.

12-13 Mʉja majuuna mʉja ye niyerure maibana to bairo na mʉja ĩitonucu.

To bairi nare átinemogaquetiri nare ca-nʉcʉbʉgoquẽna mʉja ãa.

To bairo ĩi tʉgooñabana Dio cʉ̃ ca-rotirica wamere mʉja bai netoonucu.

“Mʉja pacʉare na nʉcʉbʉgoya,”

Dio cʉ̃ ca-rotirica wamere mʉja bai netoonucu,

na átinemoquẽnana.

To bairije mʉja ñicʉ jãa na cá-áti jʉgo átaje capee wame mʉja átinucu.

14 To bairo na ĩi yaparo camajare na pijo,

oco bairo na ca-ĩi buioyupʉ Jesú:

—Caroaro yʉ apiya,

yʉ ca-buiorijere majigarã.

15 Camaja na majuuna roorije na yeripʉ na ca-tʉgooñarije jʉgori caroorã ãma.

Na ca-ʉgarije jʉgori mee caroorã ãma.

16 Noa yʉre ca-apirã yʉ ca-ĩi buiorijere caroaro apiʉjaya.

17 Ĩi yaparo camaja capaarã watoapʉ ca-ãnacʉ na cá-aáweoyupʉ Jesú.

Aá,

cʉ̃ buerã mena wiipʉ ca-jãacoajupʉ.

Wiipʉ cʉ̃ ca-jãaro bero,

cʉ̃ buerã ti wame cõorique mena cʉ̃ ca-buioriquere cʉ̃ ca-ĩi jeniñañuparã.

18 To bairo cʉ̃re na ca-ĩi jeniñaro:

—¿Mʉja quena tiere mʉja api puoquẽetí?

na ca-ĩiñupʉ.

—Camaja na ʉgarique unie jʉgori rooye tuaquetinucuma.

19 Na ca-ʉgarije na yeripʉ jañaquẽe.

Na ca-ʉgari wame cõo paropʉ eja,

to cõona yajicoapa.

To bairo ĩi,

nipetiro ʉgarique caroa jeto ãa ĩi,

to bairo ca-ĩiñupʉ Jesú.

20 Apeye na ca-ĩinemoñupʉ Jesú tunu:

—Camaja na majuuna caroorije na cá-átie na rooye tuu.

21-22 Camaja na yeripʉ caroorije na ca-tʉgooñari wame cõo caroorije átinucuma.

Ato canacã wame majuu na cá-átinucurije ãa:

Áti epericarã cʉtaje,

jee rutirique,

aperãre jĩarique,

apeĩ nʉmore eperico cʉtaje,

aperã na ca-cʉgorijere tʉjʉ ʉgoorique,

aperãre rooro átaje,

ĩitorique,

aperãre wada pairique,

mani majuuna,

“Aperã netoro ca-ãcʉ̃ yʉ ãa,”

ĩi tʉgooñarique,

caroaro tʉgooñaquẽtie.

23 Atie nipetiri wame camaja caroorije na majuuna na yeripʉ na ca-tʉgooñarije jʉgori rooye tuama.

24 Jesú Genesaret'pʉ ca-ãnacʉ Tiro,

Sidón ca-wamecʉti macaripʉ cá-aájupʉ.

Topʉ eja,

topʉ cʉ̃ ca-ejarijere na ca-majiro ca-booquẽjupʉ,

aperã capaarã yʉ tʉpʉ neñarema ĩi.

To bairi jicã wiipʉ ca-jãacoajupʉ.

To bairo baibacʉ quena dope bairo baii ca-yaji majiquẽjupʉ.

25-26 Nemoona Jesú cʉ̃ ca-ejarijere ca-apiyupo jicão ca-wãti jãa ecoorico paco.

Apero macaco,

Sirofenicia macaco ca-añupo.

Jesú cʉ̃ ca-ejarijere queti apio,

Jesú tʉ ejao,

rʉpopatuaripʉ ca-ejacumuñupo.

Ejacumuri wãti cõ macoacãpʉ ca-ãcʉ̃re ca-buu roca rotiyupo.

27 Jesú maca cõ ca-ĩiñupʉ:

—Aperã Israel maja ca-aniquẽnare yʉ cá-átinemoro cawimarã ye ʉgariquere na emari yaiare nare nuʉre bairo yʉ átiboʉ.

Cawimarãre ca-nu jʉgope ãa,

cõ ca-ĩiñupʉ Jesú.

28 To bairo cʉ̃ ca-ĩiro:

—Ʉpaʉ,

cariape mʉ ĩi.

To bairo yaiare cawimarã ye ʉgariquere ca-jooquetipe to ca-anibato quena na ca-ʉga ruiri cajawa ẽoropʉ ca-ñaa rerijere ʉganucuma yaia.

To bairona ca-ĩiñupo Jesúre,

yʉ quena apeo yʉ ca-anibato quena,

Israel majare na átinemo yaparoʉ petoacã yʉ quenare yʉ átinemoña ĩo,

ca-ĩiñupo Jesúre.

29 To bairo cõ ca-ĩiro oco bairo cõ ca-ĩiñupʉ Jesú:

—Caroaro yʉre mʉ ca-ĩi tʉgooña nʉcʉbʉgori wamere apii,

wãti mʉ macopʉre ca-ãcʉ̃re,

meere yʉ buu roca tʉga.

Meere,

yʉre ca-ĩi nʉcʉbʉgoo aniri tunu aácoja,

cõ ca-ĩiñupʉ.

30 To bairo Jesú cʉ̃ ca-ĩiro cõ ya wiipʉ ca-tunucoajupo.

Tunu eja,

cõ macore cõ cuñaricaropʉ ca-pejaore cõ ca-tʉjʉyupo,

meere wãti cõpʉre ca-anibatacʉ cʉ̃ ca-butiricopʉre yua.

31 Jesú Tiro ca-wamecʉtopʉ ca-ãnacʉ ca-buti aájupʉ.

Buti aácʉ Sidón ca-wamecʉtopʉ to bairi Decápoli ca-ani macaripʉ ca-neto aájupʉ.

To neto aá,

Galilea ʉtabʉcʉrá tʉ ca-ejayupʉ tunu.

32 Topʉ jicãʉ ca-api majiquẽcʉ,

caroaro ca-wada majiquẽcʉre Jesú tʉpʉ cʉ̃ ca-neajuparã,

mʉ wamo mena cʉ̃ ñiga peori cʉ̃ netooña ĩirã.

33 To bairi Jesú aperobʉjaacã camaja na ca-tʉjʉquẽtopʉ cʉ̃ ca-ne aájupʉ.

Topʉ cʉ̃ ne aá,

cʉ̃ wamo jũari mena cʉ̃ amoo operipʉre ñu nʉcori bero cʉ̃ wamo jũare ʉcoo wareri cʉ̃ ñemerore ca-pañañupʉ.

34 To bairo cʉ̃ ñemerore paña,

ʉmʉrecóopʉ tʉjʉ mʉgori ca-yeri jinijãñupʉ.

Yaparo:

—¡Efata!

cʉ̃ ye mena ca-ĩiñupʉ.

Cʉ̃ amoo tujuya ĩi,

to bairo ca-ĩiñupʉ.

35 To bairo Jesú cʉ̃ ca-ĩirona ca-api majii,

caroaro ca-wada majii ca-añupʉ,

meere yua.

36 To bairi topʉ ca-ãnare,

“Aperãre na buio batequeticõaña,”

na ca-ĩiñupʉ Jesú.

Seeto buioquẽja cʉ̃ ca-ĩibato quena seetobʉja capaarãre na ca-buio bateyuparã.

37 Seeto majuu tʉjʉ acʉari oco bairo ca-ĩiñuparã:

—Nipetiri wamere caroaro átinucumi Jesú.

Ca-api majiquẽna quenare na ca-api majiro áami.

Ca-wada majiquẽna quenare na ca-wada majiro áami,

ca-ĩiñuparã.