—Juan bautisari majocʉ ãnacʉ ãcʉmi Jesú.

Mani ca-jĩa rocaepaʉ anibacʉ quena ca-catí tunuricʉ ãcʉmi.

To bairi ca-catí tunuricʉ aniri áti iñoorica wamerire áti majiimi,

na ca-ĩiñupʉ Herode Jesú cʉ̃ ca-bairijere apiri.

3 Ca-jʉgoyepʉna Juan're cʉ̃ ca-ñee rotiyupʉ Herode cʉ̃ polisía majare.

Cʉ̃ ñee roti,

presopʉ come wẽeri mena na ca-jiaricʉpʉ cʉ̃ ca-jooyupʉ,

Juan cʉ̃re cʉ̃ ca-buionucurijere apigatei.

Ca-jʉgoye cʉ̃ bai Felipe nʉmo ca-anibatacore Herodía ca-wamecʉcore ca-neñupʉ Herode maca.

4 To bairo cʉ̃ bai nʉmore cʉ̃ ca-nero tʉjʉri oco bairo cʉ̃ ca-ĩi buionucubajupʉ Juan:

“Ñuuquẽe mʉ bai nʉmore mʉ ca-nero.

Cõre ca-nequetipaʉ mʉ anibajupa.”

To bairo Juan cʉ̃ ca-ĩinucurije wapa to cõona Herode polisíare ca-ñee rotiyupʉ Juan're.

5 Nemoona polisíare cʉ̃ ca-jĩa rotigabajupʉ.

Camaja,

“Dio ye quetire buiori majocʉ ãcʉmi Juan,”

cʉ̃re ca-ĩi tʉgooñawã.

To bairi,

“Cʉ̃re yʉ ca-jĩa rotiata camaja yʉre punijini tʉjʉborãma,”

ĩi tʉgooñari camajare na ca-uwiyupʉ Herode.

6 Cabero Herode cʉ̃ ca-buiarica rʉmʉ ca-ano boje rʉmʉ cá-ájupʉ.

Ti boje rʉmʉ ca-ano Felipe nʉmo ca-anibataco Herodía maco ca-bajao wiaájupo,

Herode cʉ̃ ca-piiricarã jãa yʉre na tʉjʉato ĩo.

Cõ ca-bajarijere Herode seeto ca-tʉjʉ wariñuuñupʉ.

7 To bairo cõ ca-bajarijere seeto tʉjʉ wariñuuri:

—Noo yʉ mʉ ca-jenigari wamere mʉ yʉ joogʉ,

jocʉ mee yʉ ĩi,

cõ ca-ĩiñupʉ Herode.

8 To bairo cõre cʉ̃ ca-ĩiro cõ pacore cõ ca-jeniñañupo.

Jeniña yaparo Ʉpaʉ Herodere oco bairo cʉ̃ ca-ĩiñupo:

—Juan bautisari majocʉ rʉpoare na pa ta rotiya.

Na pa ta rotiri jotʉ bapapʉ peori yʉ jooya,

cʉ̃ ca-ĩiñupo Herodía maco,

cõ paco cõ ca-jeni rotiro mena.

9 To bairo cõ ca-ĩiro apii seeto ca-tʉgooñarique paiyupʉ Herode,

Juan're cʉ̃ jĩagaquetibacʉ.

To bairo tʉgooñabacʉ quena,

“Yʉ ya boje rʉmʉ ca-ano yʉ ca-piena yʉ ĩi eperema,

cõre yʉ ca-ĩi cũuri wamere yʉ cá-átiquẽpata,”

ĩi tʉgooñari cõ ca-jeniri wamere cá-áti rotiyupʉ.

10 To bairo cʉ̃ ca-rotirona aperã Juan're cʉ̃ rʉpoa cʉ̃ ca-pa ta jĩa rocacõañuparã presopʉ ca-ãcʉ̃re.

11 Pa ta jĩa,

cʉ̃ rʉpoare jotʉ bapapʉ peo,

Herodía macore ca-jooyuparã.

Cõre na ca-jooro cõ pacore ca-joo neto jooyupo tunu.

12 Cabero Juan ãnacʉ cʉ̃ ca-buericarã atí,

cʉ̃ rupaʉ ãnatore ne aá,

cʉ̃ ca-yaa rocayuparã.

Cʉ̃ yaa roca yaparo Jesúre cʉ̃ ca-buiora aájuparã yua.

13 To bairo Juan're na ca-jĩa rocariquere queti apii cumua mena cá-aácoami Jesú aperopʉ camaja mani paʉpʉ.

Cʉ̃ cá-aáto queti apirã camaja capaarã macaa macana cõo cʉ̃ ca-ʉja aáma maapʉ.

14 To bairi Jesú topʉ roca tu,

ma eja,

na paarãacãre na ca-tʉjʉwĩ.

Na tʉjʉri,

na ca-bopaco tʉjʉwĩ.

Na mena ca-ãna ca-riarãre na ca-catíowĩ Jesú.

15 To bairi ñamicaa muipu cʉ̃ ca-ani aáti paʉ ca-ano cʉ̃ buerã cʉ̃ tʉpʉ aá,

cʉ̃ jã ca-ĩiwʉ:

—Meere,

ñamicaapʉ ãa.

Maca maa atora.

To bairi camajare na aá rotiya.

Macaapʉ na wapaye ʉgara aáparo,

jã ca-ĩibapʉ Jesúre.

16 To bairo cʉ̃ jã ca-ĩiro:

—Na aáqueticõato.

Mʉja majuuna na nuuña,

jã ca-ĩiwĩ Jesú.

17 —Pan rupaare jicã wamo cõo nare jã ca-nubopere,

wai pʉgarã jetore jã cʉgo camaja capaarã majuure na jã ca-nuuboparãacãre,

jã ca-ĩiwʉ Jesúre.

18 To bairo cʉ̃ jã ca-ĩiro:

—Atopʉ jee ajá,

jã ca-ĩiwĩ Jesú.

To bairo jã cʉ̃ ca-ĩiro cʉ̃ tʉpʉ jã ca-jee apʉ́.

Jee atí,

Jesúre jã ca-joowʉ tie ʉgariqueacãre.

19 To bairi Jesúre cʉ̃ jã ca-jooro bero ta caroa yepapʉ camajare na ca-rui rotiwĩ Jesú.

Na rui roti,

jicã wamo cõo canacã ʉgarica rupaare,

wai pʉgarãre jee átiri ʉmʉrecóopʉre tʉjʉ mʉgo,

Diore jeni nʉcʉbʉgo,

ʉgariquere pe,

jãare ca-bate joowĩ cʉ̃ buerãre.

Jã maca camajare jã ca-bate joowʉ tunu.

20 To bairo camajare jã ca-bate jooro ca-ʉga yapi peticoama.

Na ca-ʉga yapicoato bero Jesú buerã jã ca-jee jãawʉ piiripʉ na ca-ʉga rʉgarijere doce wʉri majuu jirari wʉri.

21 To bairi tiere ca-ʉgaricarã ca-ãma jicã wamo canacã mil caʉmʉa jeto.

Cãromia,

cawimarã quenare na ca-cõoñaquẽjuparã.

22 Tie bero cʉ̃ buerãre cumuapʉ jã ca-eja jãa rotiwĩ Jesú.

“Camajare na yʉ ca-tʉjʉ tʉja jootoye yʉ jʉgoye i nʉgoa peña aá yuuya,”

jã ca-ĩiwĩ.

23 To bairi camaja paarãacãre na tʉjʉ tʉja joo yaparo ca-wamʉ aájupi ʉ̃taʉpʉ,

Diore jeni nʉcʉbʉgoʉ aácʉ.

Canaiori paʉ topʉna ca-anicõañupi mai jicãʉna.

24 Cʉ̃ cabuerã maca ti ñami cumuapʉ cá-aána ca-yoaropʉ ti ra recomaca jã ca-peña aáto seeto oco ca-jabewʉ,

wino seeto uwioro ca-papu rocaturo maca.

25 Ca-bujuparo jʉgoyeacã Jesú oco bui cá-atí nutuami,

jã tʉpʉ acʉ́.

26 To bairo oco bui cʉ̃ cá-ató tʉjʉrã seeto jã ca-tʉjʉ acʉacoapʉ.

—¡Jicãʉ camajocʉ ãnacʉ wãti ãcʉmi!

jã ca-ĩi awaja acʉacoapʉ.

To bairo jã ca-ĩi awajaro:

27 —Uwiqueticõaña.

Yʉna yʉ ãa mʉja ʉpaʉna.

Tʉgooña uwi acʉaquẽja,

jã ca-ĩiwĩ Jesú.

28 To bairo jã cʉ̃ ca-ĩiro oco bairo cʉ̃ ca-ĩiwĩ Pedro:

—Mʉna mʉ ca-ãmata mʉ tʉpʉ oco bui yʉ aá rotiya.

29 To bairo Jesúre cʉ̃ ca-ĩiro:

—Baiyupa adʉja,

Pedrore cʉ̃ ca-ĩiwĩ Jesú.

To bairo cʉ̃ ca-ĩiro Pedro cumuapʉ ca-jañaricʉ rui,

oco bui cá-aábami,

Jesú tʉpʉ aácʉ.

30 To bairo aábacʉna wino seeto ca-papurijere tʉjʉ acʉa,

ca-uwiwĩ.

To bairo uwi,

ca-ruacoa rui nutuami.

Ruacoacʉ yʉ áa ĩi:

—¡Ʉpaʉ,

yʉre ñei ajá,

rua yajii yʉ bai!

ca-ĩi awajawĩ Jesúre.

31 To bairo Pedro cʉ̃ ca-ĩi awajaro Jesú cʉ̃ ca-ñeewĩ.

Cʉ̃re ñee:

—Jĩacã majuu yʉre mʉ tʉgooña nʉcʉbʉgo.

¿Nope ĩi,

“Yajicoa aácʉ yʉ áa,”

mʉ ĩi tʉgooñarí?

ca-ĩiwĩ Jesú Pedrore.

32 To bairi cumuapʉ na ca-eja jãaro wino ca-papu janacoapʉ yua.

33 Jã maca cumuapʉ ca-ãna Jesúre nʉcʉbʉgori rʉpopatua mena tuatu ejacumu eja:

—Cariapena Dio Macʉna mʉ ãa,

cʉ̃re jã ca-ĩi nʉcʉbʉgowʉ.

34 Jã ca-peña aápʉ yua.

Peña aá,

ape nʉgoapʉ eja,

Genesaret na ca-ĩri yepapʉ jã ca-ma ejawʉ.

35 To bairo ti paʉpʉ jã ca-ma ejaro tʉjʉrã,

“Jãaa,

meere,

Jesú ejami,”

ca-ame ĩi buiowã to macana camaja.

To bairi Jesú cʉ̃ ca-ejarijere queti apirã ti yepa macanare ca-buio batecõa joowã,

mani yarã ca-riarãre Jesú tʉpʉ na jee apáro ĩirã.

36 To bairi ca-riarãre cʉ̃ tʉpʉre ca-jee ejawã.

To bairi ca-riarã maca oco bairo cʉ̃ ca-ĩiwã Jesúre:

—Mʉ jutiiro yapa jetore jã pañagarã.

To bairo pañarã jã netogarã,

ca-ĩi jeniwã Jesúre.

To bairi nipetirã ca-riarã cʉ̃ jutiiro yapa ca-tʉjarore ca-pañarã ca-netowã yua.