Chinmet Ches Jesus
18
Idi kincheng Jesus a iyankararag, bimetik ira ma disipolos ton kimowan ired piig na chekdan a nakigwan cha i Kidron. Gwariy garden chiwan a iyaytaneman na chakel a kejow a olive, et chiwan i kimowanan cha. 2 Si Judas a menraidor Jesus, amta tho ma dogad tep naesa-sa-nop ires Jesus tan disipolos tod man. 3 Isonga, kimowan si Judas chiwan a engibalnay na gropon sosolcharo tan sema echom a kowadja na timplon into-no iren ma aafo na papari tan sema iren Pharisees. Iyansilow ira tan iyan-almas ira. 4 Amten Jesus a emiin i mepesamak cha si-katho, isonga kimowan a iyaspol to iren kigwan to i “Siyay jowan anafa?” 5 Et insongbat cha i “Si Jesus a i-Nazareth.” Kigwan Jesus i “Si-kak ithan.” Si Judas a enraidor Jesus, gwara ngod man a ekiakgwat ired ma too. 6 Idi kigwan Jesus i “Si-kak ithan,” sema iren sosolcharo tan sema iren kowadja, iyansoled ira et etongba ira. 7 Et inbagen Jesus mowan i “Siyay jowan anafa?” Insongbat cha i “Si Jesus a i-Nazareth.” 8 Et kigwan mowan Jesus i “Kigwan ko waled si-kayo i si-kak ithan. No jowan anafaak, itolok jon onbetik ira ja echom ko.” 9 Kigwan Jesus iwan say metongpal iwa kigwan tod Aweto nontan a “Nagwariy angken sa-ki iren ma toon inpiyal mod si-kak a itiw ko.”10 Si Simon Peter, gwariy ispada tho. Iyoksot ton biyetbet to ma bagaen na kahejangan a pari et ingkal toy gwanan a ngila tho. Si Malchus i ngaran niwa bagaen. 11 Et kigwan men Jesus cha Peter i “Iathip mo ta ispadam. Igwan i tasen iyapno na digat a in-i-kan Awak cha si-kak, tan mesepol a inomen koy gwared man.”
12 Isonga, sema iren sosolcharo, kapitan cha, tan sema iren kowadja na Hodjos, ida res Jesus et inbalod cha. 13 Et inkowan cha nin cha kad-an Annas tep si Annas i inepon Caiaphas a kahejangan a pari nontan a tawen. 14 Si Caiaphas i emilin ired ma Hodjos i magangkana no metiy i sa-kin too bengat para cha kaidian to.
Dinibahan Peter Si Jesus
15 Si Simon Peter tan sema kadgwa thon disipolo, tined ches Jesus. Amta niwa kahejangan a pari ma kadgwen Peter, isonga iyaytolok a mekisekep cha Jesus cha bo-dayan na baliy na kahejangan a pari. 16 Nem si Peter, epayas cha awas a askang na pasbol chiwa bo-dayan. Isonga, sema kadgwa thon amta niwa kahejangan a pari, iyan-olin inbagaan toy biin manbanbantay na pasbol no mebedin a onsekep si Peter, et intolok tos Peter a onsekep. 17 Sema biin manbanbantay na pasbol, kigwan tod Peter i “Disipolo toka niwa too, anya?” “Enchi,” kigwan Peter. 18 Teg-in nontan a edagwi, isonga iyan-afoy ira ma bagaen tan sema iren kowadja, et imak-akgwat ired askang na afoy a manchangchangchang ira. Tan ekiakgwat ngos Peter cha si-karen manchangchangchang.
Binistigal Na Kahejangan A Paris Jesus
19 Sema kahejangan a parin si Annas, binistigal tos Jesus maypangkep iren ma disipolos tan toro-toro tho. 20 Et insongbat Jesus i “Emiin a intoro-torok, kigwan kod sangoanan na too. Naiyantoroak na olay chiwed naesa-sa-nofan na emiin a Hodjos cha synagog tan chiwa timplo. Nagwariy kigwa-kigwan kon nat inki-ngelan cha. 21 Niyana inbagaan joak no nengoy kigwa-kigwan ko. Ibagai yo ira ma iyanki-ngel na intoro-torok. Amta ra i kigwan ko.”
22 Idi kigwan Jesus iwan, sema sa-ki iren ma kowadjen man-ak-akgwat chiwan, siyedpak ton kigwan to i “Niyana setan i inpasing mon iyansongbat cha kahejangan a pari?” 23 Et kigwan Jesus cha si-katho i “No nat podnoy kigwan ko, kowan mod emiin a tood jay no nengoy kamalik. Nem no podnoy kigwan ko, niyana siyedpak moak?” 24 Et inpa-den Annas si Jesus a ebalod pay nin cha kad-an Caiaphas a kahejangan a pari.
Dinibahan Peter Mowan Si Jesus
25 Et si Simon Peter, man-ak-akgwat pay nin chiwa bo-dayan a manchangchangchang. Sema ngo iren echom a kainakgwat chiwan, inbaga red si-katho i “Et si-kam, disipolos toka ngo, anya?” Nem indibak Peter i “Enchi, nat disipolos toak niwa too.” 26 Gwara pay ngod man i bagaen niwa kahejangan a parin ahi niwa toon kiyetnon Peter i ngila tho. Inbaga tho i “Singen mita tahen kiyadgwaan mo ma tood garden?” 27 Nem indibak mowan Peter i “Nat si-kak,” et kimakaok a chakos i manok.
Si Pilate A Gobirnador, Binistigal Tos Jesus
28 Idi kincheng chen binistigal si Jesus chiwa baliy Caiaphas, intolod iren ma naengibalnay na Hodjos cha baliy Pilate a Romano a gobirnador. Ag-agsapa wa. Idi mimothok ira ma Hodjos chiwa baliy na gobirnador, nat simekep nin ira tep no onsekep ira, maybilang koma iren ensekig, et nat maytolok iren mekipangan na Piyasta na Inda-bas na Anghil cha Hodjos. a 29 Isonga, imawas si Pilate a kigwan tod si-kara i “Ngoy pengicharoman jon tan a too?” 30 Insongbat na Hodjos i “No nat banay i basol to, nat intolod mi komed si-kam.” 31 Et kigwan Pilate i “Si-kayo ngarod i mengowis cha si-kathon iyaybasar cha dinteg jo.” Et insongbat iren ma Hodjos i “Si-kawin Hodjos, nagwariy karebengan min memono na too.” 32 Epasamak iwan say metongpal i kigwan Jesus maypangkep na pesing ton metiy.
33 Et si Pilate, simekep mowan cha baliy to, et inpata-gway tos Jesus. Inbagaan to i “Si-kam i Ari na Hodjos?” 34 Et insongbat Jesus i “Seman a kigwan mo, edafod nemnem mo ono gwariy sa-kin engowan cha si-kam?” 35 Insongbat Pilate i “Kin mo i Hodjoak? Sema iren kaidian mon mismo tan sema iren aafo na papari, si-kariy engiawat ka did si-kak. Ngoy imag mo?” 36 Kigwan Jesus i “Sema karebengan kon mantoray, nat edafod ja dobong. No edafod ja dobong, mekidaban koma iriy took para cha si-kak say nat may-awathak ired ma Hodjos. Nem sema karebengan kon mantoray, nat edafod ja dobong.” 37 Et kigwan Pilate i “Isonga agpayson ari ka, anya?” Et insongbat Jesus i “Ahow, agpayso ta kigwan mo i ariak. Kimowanak alid ja dobong et iyay-anahak chiyay say ipaamtak i podno. Emiin a naemateg na podno, iki-ngelan cha i konen ko et patien cha.” 38 Et inbagen Pilate i “Nengoy podno?”
Idi kigwan men Pilate iwan, imawas mowan et kigwan to ired ma Hodjos i “Nagwariy diyoktalan kon kaybasolan niwa too. 39 Isonga no ngay onoran tayo ma ogadi yon no timpo na Piyasta na Inda-bas na Anghil cha Hodjos, naengibolosak cha kalebosan na sa-kin toon pispisen jo. Isonga piyan jon ibolos koy ari na Hodjos?” 40 Et kimeljaw ira ma Hodjos a kigwan cha i “Nat si-katho, no diket si Barabbas i maybolos!” Seja Barabbas, tolisan.