Sema engisolat niya dibcho, si Luke. Seja dibcho, toloy niwa insolat Luke cha dibchon engaranan na Sema Mapteng A Chamag A Insolat Luke. Sema dibcho, maypangkep na biyag Jesus. Seja dibcho ngo, maypangkep na epasamak ired ma emati nonta kimayang mes Jesus cha dangit. Sema toon iyansolathan Luke iren ja chegwen dibcho, si Theophilus a nakigwan na echom i ainportantin tood Roma.

Say maypangkep niya dibcho, nagwariy mahasigorado nonta timpo na inpangisolat Luke. Sema echom a naengachal na Biblia, nakigwan cha i insolat emon Luke iyay nonta timpon A.D. 62-64. Sema ngon echom, nakigwan cha i insolat to emo nonta timpon A.D. 70-90. Sema engisolathan Luke niyay, chiwa emod Roma.

Si Luke, nat Hodjo, no diket Gentile a ematid Jesus. Sema obda tho, doktor. Iyanchogid timpo na maykadgwen biyahin Paul a mankasaba na mapteng a chamag cha chakel a dogad, ekiolop si Luke cha si-katho. Aanos a ekiolop cha Paul angken nonta iyaykalebos si Paul cha Roma.

Seja iyaysolat chiyay, maypangkep na inpasi-pasing iren ma ematid Jesus a engigwanggwang na mapteng a chamag maypangkep na kaysalakanan cha emiin a too, pati Hodjos tan nat Hodjos. Kigwan tod jay i idi kimayang mes Jesus cha dangit, inchogi iren ma ematin mankasaba na mapteng a chamag cha Jerusalem. Idi iyakcheng ma iwan, kimowan ired echom a doga-dogad a mankasaba na mapteng a chamag. Iyanbiyah i nin ired sahop na Palestine, et chidan cha iriy sahop cha kilig na baybaby a Mediterranean ingkathod mimothok ired Roma.

Say ainportantin timed jay, sema obda na Ispirito Santo. Ingwanggwang Luke i inpasing Afo Chiyos a engito-no na Ispirito Santo ired ma ematin gwared Jerusalem nonta akow na piyasten nakigwan cha i Pintikostis. Ingwanggwang to pay i nainpasing na Ispirito Santon naenolong iren ma emati say babaen na panakabalin to, mebedin a a-magen chen emiin i kigwan Afo Chiyos.