Sema engisolat niyay a dibcho, si John a anak Zebedee a disipolon Jesus. Chiya dibcho, iyanngaran si John na disipolon ensemek Jesus. Sema karakelan a naengachal na Biblia, nakigwan cha i iyaysolat ja dibcho nonta A.D. 90-100 emo la. Say kagol John a engisolathan niyay, say patien ira na manbesa i si Jesus i Mengisalakan a Anak Afo Chiyos, et say babaen niwa pamati red si-katho, gwara did si-kariy biyag a nagwariy pengingkaan to (John 20:31).

Chiwa kapoanan na dibcho, kigwan to i si Jesus, si-kathos Esel. Kigwan to ngod man i man-inges i ogadin Jesus tan ogadin Afo Chiyos. Et ingwanggwang John i pithon milagron imag Jesus a mengibiybiy na kinachiyos to. Sema iren pithon milagro, sejay: 1) inpanbalin toy chanom na adak (2:1-11), 2) inpamapteng toy anak na ofisiyal (4:46-54), 3) ingkal toy sahit na dahid Bethzatha (5:1-18), 4) pikan toy esolok a dimen dibon too (6:1-13), 5) iyan-ahad cha tapow na chanom (6:16-21), 6) ingkal toy korab na too (9:1-7), tan 7) inpanpawil tos Lazarus (11:1-44). Dima iren ja milagro ket, iyaysolat chiya dibcho bengat.

Say sa-ki pay a insolat John chiyay, sema kigwan Jesus maypangkep na kinachiyos tan obda tho. Kaspangarigan, in-arig Jesus i angel tod mekan (6:35), silow (8:12), pasbol (10:7), tan chalan (14:6).