Sema engisolat niya dibcho, si Luke. Seja dibcho, maypangkep na biyag Jesus a iyanchogid ingkay-anak to ingkathod ingkathiy to tan in-oli tho led dangit. Si Luke ngoy engisolat na dibchon engaranan na Sema Inpasi-pasing Iren Ma Apostolis. Sema dibcho, maypangkep na epasamak ired ma emati nonta iyakcheng a imoli wales Jesus cha dangit. Sema toon iyansolathan Luke iren ja chegwen dibcho, si Theophilus a nakigwan na echom i ainportantin tood Roma.

Sema maypangkep niya dibcho, nagwariy menigorado nonta timpo na inpangisolat Luke. Sema echom a naengachal na Biblia, nakigwan cha i insolat emon Luke iyay asan mechechal i Jerusalem nonta A.D. 70 emo. Sema echom ngo, nakigwan cha i insolat to emo jay nonta timpon A.D. 80-90. Sema engisolathan Luke niyay, chiwa emod Roma.

Si Luke, nat Hodjo, no diket Gentile a ematid Jesus. Sema obda tho, doktor. Iyanchogid timpo na maykadgwen biyahin Paul a mankasaba na mapteng a chamag cha chakel a dogad, ekiolop si Luke. Aanos a ekiolop cha Paul angken nonta iyaykalebos si Paul cha Roma.

Seja iyaysolat chiya dibcho, inpaamta tho i nat Hodjos bengat i insalakan Jesus, no diket emiin a toon naematid si-katho, angken sema iren nat Hodjos. Kigwan to ngod jay i maypangkep na chadsak na toon naematid Jesus tan pengisahit Jesus iren ma toon iyangkebitheg, mansekit, tan iyangkedamsis.

Sema echom a kigwan tod ja dibcho, si-kathoy kinapateg na pankararag, obda na Ispirito Santo, tolong na bibii maypangkep na obden Jesus, pemekawan Afo Chiyos na basol, tan pansagana na naemati para cha pan-oli mowan alin Jesus chiya dobong.