Iyanpawil Si Jesus
16
Idi epalabas miy Sabbath, si Mary Magdalene, Salome, tan si Mary a inen James, enongkal ira na danen manbangdo say iepjos ched angel Jesus. 2 Idi emangketa-nang na Domingko, kimowan ired ma kad-an na iyaybekaan Jesus. 3 Idi mankokowan ira, iyankinowan ira i “Siyay memodig den ma bathon iyaysa-din chiwa sakepan na dohang?” 4 Nem idi mimothok ira, timangkak ira, et mita ren sema bathon banay a pasiya, iyaypolig da. 5 Idi simekep ma ired ma dohang, gwariy mita ren balodahin iyanbaro na polaw a mantoktokkong cha gwanan na sakepan, et timahot ira.6 Et kigwan niwa balodahi i “Enog i tahot. Amtak i jowan anafes Jesus a i-Nazareth a iyaydansed koros. Nem nagwared jay, iyanpawil. Si-neng jo! Chiyay i engioligan cha. 7 Tahejo wed disipolos to et kowan jod si-karen Peter i edagwas des Jesus a kimowan iy say si-kayod Galilee. Metaen jod man a inges toy kigwan tod si-kayo nontan.”
8 Et kiyanoan ma iren ma bibiin imekal chiwa bekaan tep iyasdaaw iren pasiya tan kebinayedbed na tahot. Et eg cha nin inistoriyed angken siyen too tep ketahot ira.
Iyanpara-parang Si Jesus
[ 9 Idi iyanpawil si Jesus na kagwis niwa Domingko, iyanparang nin cha Mary Magdalene a enagchagan to na pithon dimonyos. 10 Et kimowan mes Mary chiwa disipolos Jesus a kainengos tan keninangis, et kigwan tod si-kariy epasamak. 11 Nem idi inki-ngelan iren ma disipolos i sibibiyag si Jesus tan miten Mary, eg cha piyati.
12 Idi engkay, iyanparang si Jesus chiwa chegwen disipolos ton man-aahad a edafod Jerusalem, nem afil i kasi-neng to. 13 Imoli ira ma chegwed Jerusalem et ingwanggwang ched echom cha, nem eg cha ngo ira piyati.
14 Idi engkay, iyanparang si Jesus chiwa sawal na sa-kin disipolos to nonta mankakakan ira. Et inbonget to ira tep kolang i pamati ra tan esolpeng ira tep eg cha piyati iriy toon eni-neng cha si-katho nonta iyanpawil ma. 15 Et kigwan men Jesus i “Tahejod emiin a soli na dobong et ikaskasaba yoy mapteng a chamag cha emiin a too. 16 Sema toon naemati tan iyanbonjag, maysalakan, nem sema eg naemati, mechosa. 17 Et sema iren naemati, may-i-kanan ira na panakabalin a mengemag iren ja kaskasdaaw a sinjal. Menagchag ira na dimonyos a mengosal na ngaran ko tan on-esel ira na ekila-kilasin esel a eg cha amta. 18 No mengegchi ira na oleg ono menginom ira na esabirongan, nagwariy ngaaw a mepesamak cha si-kara. Isagpat cha pay i diwa red mansekit et onmapteng ira.”
Kimayang Si Jesus Cha Dangit
19 Idi iyakcheng men iyan-esel si Jesus a Afo thayod disipolos to, kimayang cha dangit et timokkong cha gwanan Afo Chiyos. 20 Et kimowan ma iriy disipolos to et inkaskasaba chiy mapteng a chamag cha emiin a dogad. Si Jesus a Afo thayo, chiya-chaan to ira, tan piyaneknekan toy kinapodno na nainkaskasaba ra babaen na milagron inpa-pa-mag to.] a