Insongbat Jesus i “Ahow, agpayso ta kigwan mo.”

3 Inbasolan iren ma aafo na paparis Jesus na chakel. 4 Et inbaga mowan Pilate i “Inki-ngelan moy chakel a engicharoman ched si-kam. Nagwara pay laeng i isongbat mo?” 5 Nem nat simongbat mowan si Jesus, et iyasdaaw si Pilate.

6 No timpo na Piyasta na Inda-bas na Anghil cha Hodjos, say ogadin Pilate, naengibolos na sa-kin balod a pispisen na too. 7 Nontan a timpo, gwariy chakel a balod a emono nonta ekika-chom ira na daban na sosolcharon Romano cha Jerusalem, et sema sa-kid si-kara, dahin iyanngaran na Barabbas. 8 Et esa-sa-nop i chakel a too et inbagaan ches Pilate i mengibolos na balod tep si-kathoy ogadi tho. 9 Inbagen Pilate i “Piyan jon ibolos koy ari na Hodjos?” 10 Kigwan to man tep iyamtaan to i apal i kagol a engiawathan iren ma aafo na paparin Jesus.

11 Nem sema iren aafo na papari, igwis chiy tothoon ibagaan ches Pilate i ibolos tos Barabbas, nat si Jesus. 12 Et kigwan mowan Pilate i “No setan i piyan jo, ngoy pesing kod ja toon nakigwan jo i Ari na Hodjos?”

13 Kimeljaw mowan iren kigwan cha i “Idansam cha koros!”

14 Et kigwan Pilate i “Niyana, ngoy imag ton ngaaw?”

Nem ema-men kimeljaw ira i “Idansam cha koros!” 15 Isonga, inbolos men Pilate si Barabbas tep piyan ton pepneken i too. Si Jesus ngo, inpabaras Pilate et in-awat to say idansa red koros.

16 Et insekep na sosolcharos Jesus cha baliy na gobirnador a nakigwan cha i praetorium, et tiya-gway chen emiin i echom cha. 17 Biyaroan ches Jesus na depang a inges toy nainbaro na ari. Engamag pay ira na bengel a aamag na gwahal a iyas-asbithan, et inbengel chen singen korona. 18 Et iyang-angja ra i “Si-kam a Ari na Hodjos, sapay koma onbaya-bayag i biyag mo!” 19 Piyegpeg-as chiy toktok to na bila-jo tan chiyop-chopdaan cha. Iyantalimohod ira et inbili-biling chen manchejaw cha si-katho. 20 Idi kincheng chen iyang-angja, ingkal cha ma depang a baro, et biyaroan cha na sigod a baro tho. Et inbetik cha walen idansa red koros.

21 Idi mankokowan ira, gwariy toon manda-da-bas a si Simon a i-Cyrene a awen Alexander tan si Rufus. Mankokowan cha siyodad a edafo did payo-payow, nem inpilit iren ma sosolcharon sakbathen toy koros Jesus.

22 Et inkowan ma na sosolcharos Jesus chiwa dogad a engaranan na Golgatha a say banag to, dogad na pohel na toktok na too. 23 Idi mimothok ired man, in-i-kanan ches Jesus na inom a edaohan na myrrh, nem nat ininom Jesus. ^a 24 Et indansa ra wed koros. Idi iyakcheng ma, bininga-bingay chiy baron Jesus, et iyanbobonot ira say amtaen chiy a-daen cha.

25 Alas nowibi na omsiyang iy indansa red koros. 26 Tan sema iyaycharoman to, iyaypakpak chiwa koros a kigwan to i “Ari na Hodjos.” 27 Gwara ngoy chegwen tolisan a iyaydansed koros cha. Sema sa-ki, gwared gwanan Jesus, tan sema sa-ki ngo, gwared gwili tho. ^b 29 Sema iren kedina-bas, ingwaleggweg chiy toktok cha, et kiyelsithan ches Jesus a kigwan cha i “Kigwan mo i omasen moy timplo, et a-magen mo mowan na tedon akow. 30 No agpayso tan, tolongim i angel mo et epas ka did ta koros!” 31 Sema ngo iren aafo na papari tan mamaistoro na dinteg, iyang-angja ra ngon iyankinowan ira i “Tiyolongan toy echom, nem eg to mebedin a tolongan i angel to. 32 Si-katho konoy Criston Ari na Israel. No agpayso tan, on-epas koma did ma koros say metaen tayo et memati kiyed si-katho.” Et sema iren echom a iyaydansed koros, ekiang-angja ngo ira.

33 Idi alas dosi wa, bimolinget i intiron dogad ingkathod alas tris. 34 Et idi alas tris ma, kimeljaw si Jesus a chili i “Eloi, Eloi, lama sabachthani?” a say banag to, “Chiyos ko, Chiyos ko, niyana in-olay moak?” ^c

35 Et sema iren echom a kainakgwat chiwan, idi inki-ngelan cha man, kigwan cha i “Iki-ngeli yo! Towan ta-gwayes Elijah.” 36 Sema sa-kid si-kara, bintik ton engala na singen bolak. Insiwsiw tod enpait a inom et intebek tod bila-jo. Et inka-gwat to wed Jesus say sepsepen to. Idi niyan-amagen ma too man, kigwan to i “Kanin, memeta no onkowan alis Elijah a mengpas chiwa koros.” 37 Et kimeljaw mes Jesus et etiy. 38 Nontan ngon timpo, sema kortined timplo, iyanchegwen ebi-nik a iyanchogid kayang ingkathod sa-kod. 39 Et sema kapitan na sosolcharon man-ak-akgwat chiwan a singo thos Jesus, idi mita tho wa i inpasing Jesus a etiy, kigwan to i “Seja too, agpayson Anak Afo Chiyos!”

40 Gwara pay iriy bibiin kebinantay chiwa ki-ki-nan. Gwared si-kara ires Mary Magdalene, si Mary a inen Joses tan si James a iyanngaran na Orichiyan, tan si Salome. 41 Si-kariy bibiin ekiolo-olop cha Jesus tan chiya-cha-chaan cha na mesepol to nonta gwared Galilee. Gwara pay iriy chakel a echom a bibiin ekikowan cha Jesus cha Jerusalem.

42 Sema akow na ingkathiy Jesus, Biyarnis a akow na pengisagana para cha gwa-gwa thon Sabbath. Nonta ara-chem na Biyarnis, 43 si Joseph a i-Arimathea a marejaw a afo na Hodjos a manseseked na imothok ali na pantorayan Afo Chiyos, timoled a kimowan cha kad-an Pilate a inbaga tho no mebedin a a-daen toy angel Jesus. ^d

44 Idi inki-ngelan Pilate i etiy mes Jesus, iyasdaaw, isonga inpata-gway toy kapitan na sosolcharo, et inbagaan to no etiy males Jesus. 45 Idi kigwan na kapitan i podnon etiy, intolok Pilate a a-daen Joseph i angel Jesus. 46 Et enongkal mes Joseph na dofot a in-epas to diy angel Jesus chiwa koros, et dinibothan ton ma dofot. Idi iyakcheng ma, in-ejan toy angel Jesus cha dohang a ekotkothan a batho, et engipolig ma na banay a bathon insa-din tod ma sakepan to. 47 Gwara ngod man ires Mary Magdalene tan si Mary a inen Joses a manbanbantay ira, et mita riy kad-an na iyaybekaan Jesus.