3 Idi gwara ires Jesus cha Bethany, kimowan ired baliy Simon a iya-kal i kolid to. Idi maramen mankakakan ira, gwariy biin kimowan cha Jesus a engegchi na pirongkon aamag na alabastar a iyapno na palit a danen manbangdon nakigwan cha i nard. Diyohatan to ma pirongko et inso-jat to ma daned toktok Jesus. 4 Nem gwara iriy echom chiwan a bimonget a iyankinowan ira i “Ara, kasifa! 5 Iyaydaho koma ma dana na esolok a tedon dasos a denarii et say may-ap-ap i pilak cha iyangkebitheg.” Et inbonget cha ma bii.

6 Nem kigwan Jesus i “Iolay jo! Niyana jowan biyangi? Mapteng a pasiyay inpasing tod si-kak. 7 Tep gwariy iyangkebitheg na olay cha si-kayo, et mebedin a cha-chaan jo ira no piyan jo, nem nat chiyayak na olay cha si-kayo. 8 Seja bii, imag toy kebedinan to. Inso-jat to ma daned angel ko say maysaganay angel kon maybebka. 9 Sejay a konen kod si-kayo, podnon angken ton dogad cha dobong i kaykaskasabaan niwa mapteng a chamag, maychemag pay i inpasing ton kaynemnemneman to.”

10 Si Judas Iscariot a sa-kin ma sawal na chegwen disipolos Jesus, kimowan med ma aafo na papari say mekitolag a mengiawat Jesus cha si-kara. 11 Idi inki-ngelan chiy kigwan Judas, imimdeng ira et inkari cha i i-kanan cha na pilak. Et inchogi wen Judas a mengenap na gwaya thon menraidor Jesus.

12 Mimothok miy pilmiron akow na Piyasta na Tinapay a Nagwariy Para Debag To. Si-kathoy akow ngo na nainpanparti ra na ngalobon kalniro para cha Piyasta na Inda-bas na Anghil cha Hodjos. ^a Isonga, kigwan iren ma disipolos cha Jesus i “Toy piyan mon pengisaganaan mi na kakanen tayo na akow na Piyasta na Inda-bas na Anghil i?” 13 Et engito-no wes Jesus na chegwen disipolos ton kigwan to i “Tahejod ma siyodad, et no onmothok kayod man, gwariy aspolen jon dahin mansaksakbat na salaw a iya-janan na chanom. Tened jod 14 ma baliy a seskepen to, et kowan jod ma mahabaliy i ‘Kigwan na Maistoro wi i “Toy kwadton penganan min pansilibraran mi na Piyasta na Inda-bas na Anghil i?” ’ 15 Et itoro toy banay a kwadtod kayang a gwaren emiin i mesepol tayo. Isagana yoy kakanen tayod man.” 16 Et dimayat ma ira ma disipolos a kimowan chiwa siyodad, et idi mimothok ira, mita ren gwaren koston emiin iwa kigwan Jesus. Et insagana ra wiy kakanen cha na Piyasta na Inda-bas na Anghil.

17 Idi edagwi, si Jesus tan sema iren sawal na chegwen disipolos to, kimowan ired ma baliy. 18 Idi mankakakan ira, kigwan Jesus i “Sejay a konen kod si-kayo, podnon gwariy sa-kid si-kayon ekidihob cha si-kak a menraidorak.”

19 Imengos a pasiya ira ma disipolos, et iyansinobdat iren engowan i “Nat si-kak, anya?”

20 Kigwan Jesus i “Agpayso, ithan i sa-kid si-kayon mekisiwsiwsiw cha si-kak na tinapay chiya malokong. 21 Tep si-kak a Anak na Too, metiyak tep mesepol a metongpal iwa iyaysolat cha esel Afo Chiyos. Nem kakaasi ma toon menraidorak tep sigoradon mechosa! Magangkana koma no eg iyay-anak.”

22 Idi mankakakan pay ira, engales Jesus na tinapay a iyansalamat cha Afo Chiyos. Et piyetpet-ing to wa, et in-i-kan tod disipolos ton kigwan to wa i “Ala jo jay. Sejay i angel ko.” 23 Engala pay na tasen iyansalamat cha Afo Chiyos. In-i-kan to ired ma disipolos et enginom iren emiin. 24 Et kigwan Jesus i “Sejay i chalak a mengipaneknek na badon tolagan Afo Chiyos. On-ayos no metiyak para cha chakel a too. 25 Sejay a konen kod si-kayo, podnon ekak menginom mowan na chanom na grape ingkathod akow a penginom ko na badon chanom na grape cha pantorayan Afo Chiyos.”

26 Et idi iyankansiyon ma ira na chayaw cha Afo Chiyos, iyamtik ira et kimowan cha Chontog na Olivas.

27 Et kigwan men Jesus cha disipolos to i “Onbetik kayo len emiin et ipayas joak tep iyaysolat a kigwan Afo Chiyos i ‘Ipabonok i naiyanbantay na kalniro et mesida-sidak ira ma kalniro.’ ^b 28 Nem no panpawil toak Afo Chiyos, medebasak a onkowan iy say si-kayod Galilee.”

29 Nem kigwan Peter i “Angken onbetik a emiin i echom, si-kak, eg taha ipaya-payas.”

30 Et kigwan Jesus i “Sejay a konen kod si-kam, Peter, podnon niman a dagwi no aneng memidgwen onkakaok i manok, memintedo ken mengowan i eg moak amta.”

31 Nem emasig si Peter a kigwan to i “Angken mekipathiyak cha si-kam, eg taha dibahan.” Et inges niwan ngoy kigwan na emiin a disipolos.

32 Idi mimothok si Jesus tan sema iren disipolos tod ma dogad a iyanngaran na Gethsemane, kigwan to i “Tokkong kayod jay iy mankararagak.” 33 Iyodop tos Peter, James, tan si John, et imengos men pasiya tan enbel-at miy nemnem to. 34 Et kigwan to wed si-kara i “Epaladoy engos ko. Singen metiyak. Chiyay kayo tan enog i jo-kow.”

35 Et kimowan mes Jesus cha ki-ki-nan a iyandakbab, et iyankararag a kigwan to i no mebedin, eg to koma da-kaman iwa diga-digat. 36 Kigwan to i “Awa, Awa, mebedin a a-magen moy emiin. Pangaasim, enog i intolok a da-kaman ko ja diga-digat a onmothok cha si-kak. Nem sema metongpal koma, nat sema piyan ko, no diket seta piyan mo.”

37 Et imoli wes Jesus chiwa kad-an na tedon disipolos to, et sibi tho iren kejino-kow. Kigwan tod Peter i “Simon, manjo-jo-kow ka? Eg mo aya kayen onmoliyat na angken sa-kin oras? 38 Enog i jo-gwek, no diket pankararag kayo say nat ma-gwak kayo no meparas i pamati yo. Tep piyan jo met laeng a a-magen i kosto, nem ekapsot i angel jo.”

39 Et kimi-ki-nan mowan si Jesus et iyankararag na inges to nontan. 40 Imoli mowan cha kad-an na disipolos to et sibi tho iren kejino-kow tep eg cha kayen onmoliyat. Eg cha amtiy konen ched si-katho. 41 Isonga, kimowan mowan si Jesus a mankararag. Idi imoli na maykafintedo, inbagaan to ira ma disipolos to i “Manjo-jo-kow kayo tan man-iinana kayo pay laeng? Kosto! Tep mimothok miy timpon si-kak a Anak na Too, traidoren chaak et iawat chaak ired mabesol a too. 42 Bangon kayo tep aja ali ma menraidorak. Emoy ira, maaspol.”

43 Idi man-eesel pay laeng si Jesus, mimothok si Judas a sa-kin ma sawal na chegwen disipolos to. Gwariy chakel a kaolop ton into-no na aafo na papari, mamaistoro na dinteg, tan iyangkaama na Hodjos. Iyan-ispaday echom tan iyanpeg-as i echom. 44 Engi-kan si Judas a sigod na sinjal cha too say amtaen ches Jesus a kigwan to i “Sema ongoan ko, si-katho ma a-daen jo. Tengel jo et ibetik jo. Bantayi jon pasiya.”

45 Et idi mimothok si Judas, kimowan a chakos cha Jesus a kigwan to i “Afo,” et iyongoan to. 46 Et ida ra wes Jesus.

47 Nem sa-kin ma kainakgwat chiwan, iyoksot toy ispada thon biyetbet to ma bagaen na kahejangan a pari et ingkal toy ngila tho. 48 Et kigwan men Jesus i “Tolisanak ayen mesepol jon man-ispada tan manpeg-as a menmetak? 49 Gwiya-gwa-gwen gwaraak cha si-kayon naiyantorod timplo, nem eg joak ida nontan. Nem mesepol met laeng a metongpal a emiin i iyaysolat chiwa esel Afo Chiyos.” 50 Et sema emiin a disipolos Jesus, in-olay cha et iyamtik da ira.

51 Gwariy balodahin mantetened cha Jesus a iyanketap na kalbot bengat. Et istay a-daen cha ngo, nem idi tingel cha, 52 iya-kal iwa kalbot et iyanbetik den edagosan. ^c

53 Et inkowan cha wes Jesus cha baliy na kahejangan a parin esa-nofan na emiin a aafo na papari, mamaistoro na dinteg, tan iyangkaama. 54 Si Peter ngo, bimetaw a timened et simekep cha bo-dayan niwa baliy. Et ekitokkong ired ma kowadjen ekichangchang.

55 Sema iren aafo na papari tan echom a totoray, kaana-anap ira na pengicharoman chen Jesus say osalen chen pemonoan cha. Nem nagwariy sipol cha. 56 Tep chakel i iyantistigo na itek maypangkep cha si-katho, nem sema kigwan cha, eg iyantotonos.

57 Et gwara wa iriy echom a imakgwat a iyantistigo na itek a kigwan cha i 58 “Inki-ngelan mi nonta kigwan to i ‘Chechalen ko ja timplon imag na too, et no mepalabas miy tedon akow, mengitegwenak na sa-kin nat a-magen na too.’ ” 59 Nem sema kigwan cha, nat iyantotonos pay.

60 Et imakgwat ma iwa kahejangan a parid sangoanan cha, et inbagaan tos Jesus i “Nagwariy isongbat mo ired ja engicharoman ched si-kam?” 61 Nem imeke-eket si Jesus a nagwariy kigwan to. Inbaga pay na kahejangan a pari i “Si-kam i Criston Anak Afo Chiyos a Marejaw?”

62 Kigwan Jesus i “Ahow, si-kak. Et no sa-ki din akow, metaen joak a Anak na Toon mantoktokkong cha gwanan Afo Chiyos a manakabalin. Metaen joak pay a emangkedafoak alid dangit a edikmothan na kolpot.”

63 Idi inki-ngelan niwa kahejangan a pari man, bini-nik toy baro tho tep bimonget a pasiya, et kigwan to i “Nat mesepol tayo pay laeng i mantistigo. 64 Inki-ngelan tayoy kigwan to. Towan iinges i angel tod Afo Chiyos. Nengoy nemnem jon man?” Si-karen emiin, kiyowis ches Jesus a kigwan cha i iyaybagay a metiy.

65 Idi iyakcheng ma iwan, chiyop-chopdaan na echom si Jesus. Biyedberan cha pay i matha tho, et biyokboksing cha iy chiyan kona i “Tiwa, kowan mo no siyay emoksing ka.” Et sema ngo iren kowadja, siyedsedpak cha pay.

66 Nontan ngo, gwara pay laeng si Peter cha bo-dayan niwa baliy. Et dima-bas i sa-kin marikit a bagaen na kahejangan a pari. 67 Idi mita thos Peter a manchangchangchang, sini-neng ton pasiya, et kigwan to i “Si-kam ngoy echom Jesus a i-Nazareth.” 68 Nem indibak Peter a kigwan to i “Nat amtak ithan a mowan kona. Ekak pay egwathan.” Kimowan mes Peter cha sakepan na bo-dayan iy kimakaok i manok. ^d 69 Et mita mowan niwa marikit, et kigwan tod ma kainakgwat chiwan i “Seja too, si-katho ketchiy sa-kin echom Jesus.” 70 Nem indibak mowan Peter.

Idi eng-engkay, sema iren kainakgwat chiwan, kigwan cha i “Agpayson si-kam i sa-kid si-kara tep i-Galilee ka.”

71 Nem si Peter, biyotbot toy angel to i “Sapay koma chosaen toak Afo Chiyos no ite-itek iya kowan kona. Sangbaan ko i ekak amta ta toon jowan tabtabala.” 72 Koston kimakaok mowan i manok na maykafidgwa. Et niyemnem Peter i kigwan Jesus a “Dibahan moak na memintedo asan onkakaok i manok na maykafidgwa.” Jimokmos ma et nimangis.