Sema iren karakelan a naengachal na Biblia, nakigwan cha i sema engisolat niya dibcho, si Matthew a iyanngaran pay na Levi. Si Matthew, para singil na binis a iyanbalin na disipolon Jesus. Sema iren naengachal na Biblia, nakigwan cha i insolat Matthew ja dibcho nonta A.D. 50 ingkathod A.D. 80 emo. Nakigwan na karakelan i insolat Matthew jay cha Hodjos tep nakigwan toy maypangkep na ogadin naiyonoran na Hodjos tan toro-toron Afo Chiyos a ainportantid si-kara. Nem sema mapteng a chamag a iyaysolat chiyay, nat para cha Hodjos bengat, nem para cha emiin a too.

Inpaamten Matthew chiya dibcho i si Jesus, si-kathoy Messiah a chiyotohan Afo Chiyos a mengisalakan na Hodjos tan emiin a naematid si-katho. Nainpaneknek ton emiin i inkarin Afo Chiyos cha tothoo ton Hodjos maypangkep na Messiah, etongpal cha biyag Jesu Cristo. Sema sa-kin inpaamta thod jay, edaing a maistoros Jesus tep gwariy kabaalan ton mengiiksplikar na dinteg Afo Chiyos tan mantoro maypangkep na pantorayan Afo Chiyos.

Sema karakelan a intoron Jesus a iyaysolat chiyay, aolnos chiwa nakigwan cha. Sejay i dimen ingkaolnos to. 1) Sema bilin Jesus nonta gwared chontog maypangkep na panbiyag iren ma naemati, pan-obda iren ma naemati, tan sema egwathen iren ma iyayka-chom cha pantorayan Afo Chiyos (kapitolon 5-7). 2) Sema bilin Jesus ired ma sawal na chegwen disipolos to nonta into-no tho iren mankasaba (kapitolon 10). 3) Sema iren ari-arig maypangkep na pantorayan Afo Chiyos (kapitolon 13). 4) Sema bilin Jesus maypangkep na ogadi tan obda iren ma naematid si-katho (kapitolon 18). 5) Sema toro-toron Jesus maypangkep na pantepos ali niya timpo tan ikowan ali na pantorayan Afo Chiyos (kapitolon 24-25).