3 Nontan a timpo, sema iren aafo na papari tan iyangkaama na Hodjos, esi-nop ired baliy Caiaphas a kahejangan a pari. 4 Kaana-anap ira na pesing chen menmet Jesus a eg maamtaan say pebono ra. 5 Nem kigwan cha i “Eg tayo a-magen no timpo na piyasta, nahol ni manngalawngaw i too.”

6 Idi gwara ires Jesus cha Bethany, kimowan ired baliy Simon a iya-kal i kolid to. 7 Idi maramen mankakakan ira, gwariy biin kimowan cha Jesus a engegchi na pirongkon aamag na alabastar a iyapno na palit a danen manbangdo, et inso-jat to ma daned toktok Jesus.

8 Idi mita na disipolos to, bimonget iren kigwan cha i “Ara, kasifa! 9 Iyaydaho koma ma dana na banay a prisiyo et say may-ap-ap i pilak cha iyangkebitheg.”

10 Nem amten Jesus i chiyan kona et kigwan to i “Iolay jo! Niyana jowan biyangi? Mapteng a pasiyay inpasing tod si-kak. 11 Tep gwariy iyangkebitheg na olay cha si-kayo, nem nat chiyayak na olay cha si-kayo. 12 Inso-jat niya biiy daned toktok ko say insagana thoy angel kon maybebka. 13 Sejay a konen kod si-kayo, podnon angken ton dogad cha dobong i kaykaskasabaan niwa mapteng a chamag, maychemag pay i inpasing ton kaynemnemneman to.”

14 Sema sa-kin ma sawal na chegwen disipolos Jesus a iyanngaran na Judas Iscariot, kimowan med ma aafo na papari, 15 et kigwan to i “Ngoy i-kan jod si-kak no iawat kos Jesus cha si-kayo?” Et bijaran cha na tedon polon palata. 16 Iyanchogid ma timpo, enganap si Judas na gwaya thon menraidor Jesus.

17 Idi mimothok i pilmiron akow na Piyasta na Tinapay a Nagwariy Para Debag To, kimowan ira ma disipolos cha Jesus et kigwan cha i “Toy piyan mon pengisaganaan mi na kakanen tayo na akow na Piyasta na Inda-bas na Anghil cha Hodjos i?” ^a

18 Kigwan Jesus i “Tahejod ma siyodad, et anap jo ma dahin amta thayo. Kowan jod si-katho i ‘Kigwan na Maistoro wi i chanchaniy timpon pinispis Afo Chiyos para cha si-katho. Onkowan kawi konod baliy mon chithan i penganan mi na pangan na Piyasta na Inda-bas na Anghil.’ ” 19 Imag na disipolos Jesus i inbilin tod si-kara, et kimowan iren isagana riy kakanen cha na Piyasta na Inda-bas na Anghil.

20 Idi edagwi, ekitokkong si Jesus cha sawal na chegwen disipolos ton mengan. 21 Idi mankakakan ira, kigwan Jesus i “Sejay a konen kod si-kayo, podnon gwariy sa-kid si-kayon menraidorak.”

22 Imengos a pasiya ira ma disipolos, et iyansinobdat iren engowan i “Afo, nat si-kak, anya?”

23 Kigwan Jesus i “Agpayso, sema mekisiwsiwsiw cha si-kak na tinapay chiya malokong, si-kathoy menraidorak. 24 Si-kak a Anak na Too, metiyak tep mesepol a metongpal iwa iyaysolat cha esel Afo Chiyos. Nem kakaasi ma toon menraidorak tep sigoradon mechosa! Magangkana koma no eg iyay-anak.”

25 Et si Judas a menraidor cha si-katho, kigwan to i “Afo, nat si-kak, anya?”

Insongbat Jesus i “Ahow, podnoy kigwan mo.”

26 Idi mankakakan pay ira, engales Jesus na tinapay et iyansalamat cha Afo Chiyos. Et piyetpet-ing to wa, et in-i-kan tod disipolos ton kigwan to wa i “Ala jo jay et kakan jo. Sejay i angel ko.” 27 Et engala pay na tasen iyansalamat cha Afo Chiyos, et in-i-kan to wed si-karen kigwan to i “Inom kayon emiin. 28 Tep sejay i chalak a mengipaneknek na badon tolagan Afo Chiyos. On-ayos no metiyak para cha chakel a too say mepekawanan i basol cha. 29 Konen kod si-kayo i ekak menginom mowan na chanom na grape ingkathod akow a penginom ko na badon chanom na grape cha pantorayan Awak.”

30 Et idi iyankansiyon ma ira na chayaw cha Afo Chiyos, iyamtik iren kimowan ired Chontog na Olivas.

31 Et kigwan men Jesus cha disipolos to i “Niman a dagwi, onbetik kayo len emiin a ipayas joak tep iyaysolat a kigwan Afo Chiyos i ‘Ipabonok i naiyanbantay na kalniro et mesida-sidak ira ma kalniro.’ ^b 32 Nem no panpawil toak Afo Chiyos, medebasak a onkowan iy say si-kayod Galilee.”

33 Nem kigwan Peter i “Angken onbetik a emiin i echom, si-kak, eg taha ipaya-payas.”

34 Et kigwan Jesus i “Sejay a konen kod si-kam, Peter, podnon niman a dagwi no aneng onkakaok i manok, memintedo ken mengowan i eg moak amta.”

35 Kigwan Peter i “Angken mekipathiyak cha si-kam, eg taha dibahan.” Et seman ngoy kigwan na emiin a disipolos.

36 Idi mimothok si Jesus tan sema iren disipolos tod ma dogad a iyanngaran na Gethsemane, kigwan to i “Chiyay kayo iy onkowanak chiwan a mankararag.” 37 Et iyodop tos Peter tan sema chegwen anak Zebedee, et imengos men pasiya tan enbel-at miy nemnem to. 38 Et kigwan to wed si-kara i “Epaladoy engos ko. Singen metiyak. Chiyay kayo tan enog i jo-kow.”

39 Et kimi-ki-nan mes Jesus a iyandakbab, et iyankararag a kigwan to i “Awa, pangaasim. No mebedin, enog i intolok a da-kaman ko ja diga-digat a onmothok cha si-kak. Nem sema metongpal koma, nat sema piyan ko, no diket seta piyan mo.”

40 Et imoli wes Jesus chiwa tedon disipolos to et sibi tho iren kejino-kow. Kigwan tod Peter i “Eg mo aya kayen onmoliyat na angken sa-kin oras say may-odop ked si-kak? 41 Enog i jo-gwek, no diket pankararag kayo say nat ma-gwak kayo no meparas i pamati yo. Tep piyan jo met laeng a a-magen i kosto, nem ekapsot i angel jo.”

42 Idi iyakcheng ma iwan, kimi-ki-nan mowan si Jesus a iyankararag i “Awa, no nat mebedin a maydisiak ired ja digat a chanchanin onmothok cha si-kak, sapay koma metongpal i piyan mo.”

43 Imoli wed kad-an na disipolos to et sibi tho iren kejino-kow tep eg cha kayen onmoliyat. 44 Et bintihan to mowan ira ma tedon disipolos, et iyankararag na maykafintedon inges to nontan.

45 Imoli wa mowan si Jesus cha kad-an na disipolos ton inbagaan to ira i “Manjo-jo-kow kayo tan man-iinana kayo pay laeng? Mimothok miy timpon si-kak a Anak na Too, traidoren chaak et iawat chaak ired mabesol a too. 46 Bangon kayo tep aja ali ma menraidorak. Emoy ira, maaspol.”

47 Idi man-eesel pay laeng si Jesus, mimothok si Judas a sa-kin ma sawal na chegwen disipolos to. Gwariy chakel a kaolop ton into-no na aafo na papari tan iyangkaama na Hodjos. Iyan-ispaday echom tan iyanpeg-as i echom. 48 Engi-kan si Judas a sigod na sinjal cha too say amtaen ches Jesus a kigwan to i “Sema ongoan ko, si-katho ma a-daen jo. Tengel jo.” 49 Kimowan men chakos cha Jesus a kigwan to i “Afo, sa-no ka?” et iyongoan to.

50 Kigwan Jesus i “Kajem ko, amag mo bengat i kimowanan mo did jay a a-magen.” ^c

Et sema iren iyay-olop cha Judas, kimowan iren ida ra. 51 Idi iyakcheng ma iwan, sema sa-kin echom Jesus, iyoksot toy ispada thon biyetbet to ma bagaen na kahejangan a pari et ingkal toy ngila tho. 52 Et kigwan men Jesus i “Iathip mo ta ispadam tep sema naengosal na ispada tho, ispada ngoy ipathiy to. 53 Eg mo amta aya i no manbagaak na tolong cha Awak, mengito-non chakos ali na esolok a sawal na chegwen legion na anghilis? ^d 54 Nem no pesing ko jay, nengoy pesing ton metongpal i iyaysolat cha esel Afo Chiyos a kigwan to i mesepol a mepesamak a emiin ira jay?”

55 Et kigwan Jesus cha chakel a too i “Tolisanak ayen mesepol jon man-ispada tan manpeg-as a menmetak? Gwiya-gwa-gwen gwaraak cha si-kayon naiyantorod timplo, nem eg joak ida nontan. 56 Nem epasamak a emiin ira jay say metongpal i inpasolat Afo Chiyos ired ma profita.” Et sema emiin a disipolos Jesus, in-olay cha et iyamtik da ira.

57 Sema iren engalen Jesus, inkowan ched baliy Caiaphas a kahejangan a parin esa-nofan na mamaistoro na dinteg tan iyangkaama. 58 Si Peter ngo, bimetaw a timened ingkathod mimothok cha bo-dayan niwa baliy. Et simekep chiwan et ekitokkong ired ma kowadja say metaen to no nengoy mepesamak cha Jesus. 59 Sema iren aafo na papari tan echom a totoray, kaana-anap ira na pengicharoman chen Jesus, angken nat podno say osalen chen pemonoan cha. 60 Nem nagwariy sipol cha angken chakel i iyantistigo na itek maypangkep cha si-katho. Idi engkay, gwariy chegwen kimowan ired sangoanan 61 a kigwan cha i “Kigwan niyay a too i omasen to ma timplon Afo Chiyos, et a-magen to mowan na oneg na tedon akow.”

62 Et imakgwat ma iwa kahejangan a pari et inbagaan tos Jesus i “Nagwariy isongbat mod ja engicharoman ched si-kam?” 63 Nem imeke-eket si Jesus. Kigwan pay na kahejangan a pari i “Ipilit kon isangbam i ngaran Afo Chiyos a sibibiyag a manpodno ka. Si-kam i Criston Anak Afo Chiyos?”

64 Insongbat Jesus i “Ahow, agpayso itha kigwan mo. Et gwara pay i konen kod si-kayo. No sa-ki din akow, metaen joak a Anak na Toon mantoktokkong cha Afo Chiyos a manakabalin. Metaen joak pay a emangkedafoak alid dangit a edikmothan na kolpot.”

65 Idi inki-ngelan niwa kahejangan a pari man, bini-nik toy baro tho tep bimonget a pasiya, et kigwan to i “Towan iinges i angel tod Afo Chiyos. Nat mesepol tayo pay laeng i mantistigo. Inki-ngelan tayoy kigwan to. 66 Nengoy konen jo maypangkep niwan?”

Insongbat cha i “Iyaybagay a metiy.” 67 Idi iyakcheng ma iwan, chiyop-chopdaan chiy dopa tho, tan biyokboksing cha. Sema echom, siyedsedpak chen 68 kigwan cha i “Si-kam, Cristo, no si-kam i si-kam, kowan mo no siyay emoksing ka.” ^e

69 Nontan ngo, si Peter, ekitokkong cha bo-dayan niwa baliy. Kimowan cha si-kathoy sa-kin marikit a bagaen na kahejangan a pari, et kigwan to i “Si-kam ngoy echom Jesus a i-Galilee.” 70 Nem indibak Peter cha sangoanan chen emiin a kigwan to i “Nat amtak itha mowan kona.” 71 Kimowan mes Peter cha sakepan na bo-dayan, nem mita na sa-kin marikit a kigwan tod ma kainakgwat chiwan i “Seja too, si-katho ketchiy sa-kin echom Jesus a i-Nazareth.”

72 Nem indibak mowan Peter i “Sangbaan ko i nat amtak itha too.”

73 Idi eng-engkay, sema iren kainakgwat chiwan, kimowan ired si-katho et kigwan cha i “Agpayson si-kam i sa-kid si-kara tep amta wid ta ayog na esel mo i edafo ked Galilee.”

74 Et si Peter, biyotbot toy angel to i “Sapay koma chosaen toak Afo Chiyos no ite-itek iya kowan kona. Sangbaan ko i ekak amta ta too.” Koston kimakaok i manok. 75 Et niyemnem Peter i kigwan Jesus a “Dibahan moak na memintedo asan onkakaok i manok.” Et bimetik si Peter et paladoy nangis to tep iyanbabawin chili.