Sema Arig Na Sampolon Mamarikit
25
Intoloy Jesus a engowan i “Sema pantorayan Afo Chiyos, may-arig cha sampolon mamarikit a engitahin na intohan chen mengaspol na dahin mankasal. a 2 Iyangkegwenggweng iwa dima, tan iyangkenemneman iwa echom a dima. 3 Sema iren iyangkegwenggweng, intahin chiy intohan cha, nem eg ira engala na sobden dana. b 4 Nem sema iren iyangkenemneman, intahin cha iriy ejanan a gwariy sobden dana. 5 Etaktak iwa dahin mankasal, isonga jimonget iriy mamarikit, et iyayjo-kowan ira. 6 Idi kawa na dagwi, gwariy kimeljaw i ‘Aman ali ma dahin mankasal! Tahejon aspol jo!’ 7 Bimangon men chakos iwa sampolon mamarikit, et insagana riy intohan cha. 8 Kigwan iren ma iyangkegwenggweng ired ma iyangkenemneman i ‘Enti pango, i-kani yo kawi na dana yo tep emangka-chep ira ja intohan mi.’9 “Insongbat iren ma iyangkenemneman i ‘Nat mebedin tep nat on-anay iya kegwen min para cha si-kathayon emiin. Tahejo ired ma naiyandaho et penongkal kayo.’ 10 Imekal ma iriy iyangkegwenggweng. Idi nagwara pay laeng ira, mimothok iwa dahin mankasal. Sema mamarikit a esagana, iyay-olop ired si-kathod pankasalan. Idi simekep ira, iyaybengbeng miy selbeng.
11 “Idi engkay, sema iren mamarikit a kimowan a menongkal, mimothok iren kigwan cha i ‘Afo, Afo, dohatim pangoy bengbeng.’ 12 Nem insongbat niwa dahin mankasal i ‘Sejay a konen kod si-kayo, podnon nat amta tahejo.’ ”
13 Kigwan men Jesus i “Isonga, pansagana kayo na olay tep eg jo amtiy akow ono oras na iolik alid jay.”
Sema Tedon Bagaen A Iyay-i-kanan Na Pilak
14 In-arig Jesus mowan i “Sema pantorayan Afo Chiyos, may-arig pay cha toon mansaganen manbiyakid aragwin dogad. Tiya-gway to iriy bagaen to say ipiyal tod si-kariy kokowa tho. 15 Engipiyal cha sa-ki tan sa-ki na pilak a inbasar tod daing cha. Inpiyal tod sa-kiy dimen talent; cha sa-ki, chegwen talent; cha sa-ki, sa-kin talent. c Et iyamtik.
16 “Sema engawat na dimen talent, inbiyaki thon chakos, et dima pay i kongkona tho. 17 Inges to ngo ma engawat na chegwen talent. Chegwa pay i kongkona tho. 18 Nem sema engawat na sa-ki, kimowan a inbeka tho ma pilak na afo tho et in-emot to.
19 “Idi ebayag, mimothok i afo iren ma bagaen, et inpata-gway to ira say ibaga tho ma pilak a inpiyal tod si-kara. 20 Sema engawat na dimen talent, kimowan et kigwan to i ‘Afo, in-i-kanan moak na dimen talent. Inbiyakik, et dima pay i kongkona tho. Ajay.’ 21 Kigwan na afo tho i ‘Mapteng! Naepiyal ken bagaen. Naepiyal ked otik a in-i-kan kod si-kam, isonga ipiyal ko wed si-kam i chakel. Gomali, et kay-echom ked chadsak ko.’
22 “Sema ngon engawat na chegwen talent, kimowan et kigwan to i ‘Afo, in-i-kanan moak na chegwen talent. Inbiyakik, et chegwa pay i kongkona tho. Ajay.’ 23 Kigwan na afo tho i ‘Mapteng! Naepiyal ken bagaen. Naepiyal ked otik a in-i-kan kod si-kam, isonga ipiyal ko wed si-kam i chakel. Gomali et kay-echom ked chadsak ko.’
24 “Sema engawat na sa-kin talent, kimowan ngo et kigwan to i ‘Afo, amtak i istrikto ken too. Naidam i eg mo inbediyan. Naiyanim i nat intanem mo, tan nasini-nop moy nat jiya-pian mo. 25 Isonga, tikothan taha, et kimowanak a inbekak iwa pilak mo. Ajay ma.’
26 “Kigwan ma na afo tho i ‘Mahedsel ken esarot a bagaen. Amtam aya i naidak i ekak inbediyan tan naiyanik pay i ekak intanem? 27 No setan ngarod, apay nga nat in-ejan mod bangko ma pilak ko say niman a mimothohak, idak koma ma porsinto tho?’
28 “Et kigwan to ired ma echom a bagaen i ‘Ala jo ma talent to, et i-kan jod ma bagaen a gwariy sampolon talent to. 29 Tep sema toon naepiyal, may-i-kanan pay, nem sema toon nat naepiyal, angken sema otikel a iyaypiyal cha si-katho, ma-kal. 30 Sema bagaen a nagwariy kenkenchat to, ikepil jod kawad-an na enbolinget say onngogngogngog tan kale-kaletketen to ngoy sangi thod man.’ ”
Sema Kaonoran A Pengowis Na Tothoo
31 Intoloy Jesus a engowan i “Si-kak a Anak na Too, onkowanak alin odofen ko ira ma anghilis iy maramen mesi-neng i karebengan tan panakabalin ko, et ontokkongak cha thronok a mantoray a ari. 32 Emiin a too, mesi-nop ali ched si-kak, et isi-jan kon inges to ma naiyanbantay a mengisi-jan na kanching tan kalniro. 33 Sema iren maronong a toon may-arig cha kalniro, iaskang kod gwanan ko, tan sema iren may-arig cha kanching, iaskang kod gwilik.
34 “Et si-kak a ari, konen ko ired ma gwared gwanan ko i ‘Si-kayon binindisjonan Awak, gomali jo, et panchadsak kayod tawid jon kay-echom jod pantorayan Afo Chiyos a iyaysagana para cha si-kayo manipod nonta ingkaparsowa na dobong. 35 Tep aofaak et pikan joak. Iya-kowak et in-i-kanan joak na ininom ko. Bisitaak da et sinintil joak. 36 Nagwariy barok et biyaroan joak. Iyansahitak et kiyajoan joak. Iyaykalebosak et binisita yoak.’
37 “Sema iren maronong a tothoo, ibaga ra wa i ‘Afo, empiyan i inmatha wiken aofa et pikan mika, tan iya-kow ka et in-i-kanan mika na ininom mo? 38 Empiyan i inpanbisitam et sinintil mika, tan nagwariy barom et biyaroan mika? 39 Tan empiyan pay i inpangamta wi i iyansahit ka ono iyaykalebos ka, et binisita wiken tiyolongan?’
40 “Et si-kak a ari, isongbat ko i ‘Sejay a konen kod si-kayo, podnon nonta imag jo ira jay angken cha kababaan iren ja aahik, imag jod si-kak.’ d
41 “Et konen ko ired ma gwared gwilik i ‘Si-kayon mechosa, betik kayo! Tahejod ma dogad na afoy a eg ma-ma-chep a iyaysagana para cha Diablo tan echom ton anghilis a mahedsel. 42 Tep aofaak, nem eg joak pikan, tan iya-kowak, nem eg joak in-i-kanan na inomen ko. 43 Bisitaak da, nem eg joak sinintil. Nagwariy barok, nem eg joak biyaroan. Iyansahitak tan iyaykalebosak, nem eg joak binisiten tiyolongan.’
44 “Ibaga ra wa i ‘Afo, empiyan i inmatha wiken aofa, iya-kow, iyanbisita, nagwariy barom, iyansahit, tan iyaykalebos, et eg mika tiyolongan?’
45 “Isongbat ko i ‘Sejay a konen kod si-kayo, podnon nonta eg jo tiyolongan i kababaan iren ja singen aahik, si-kak i eg jo tiyolongan.’ ”
46 Et kigwan Jesus i “Seja iren too, mayto-no ired ma dogad na chosen nagwariy pengingkaan to, nem sema iren maronong a too, egwathen cha ma biyag a nagwariy pengingkaan to.”