11
Isonga, onori joak a inges toy nainpasing kon mengonod cha Cristo.Sema Koston Aramid Na Daleki Tan Bibii No Mekichejaw Ired Echom A Naemati
2 Nachijaw tahejo tep naniyemnem joak na olay tan naiyonoran joy toro-toron in-elbat kod si-kayo. 3 Nem gwara pay i piyan kon egwathan jo. Si Cristoy para balnay na emiin a daleki. Say dahiy para balnay na bii. Tan si Afo Chiyos ngoy para balnay Cristo. 4 Isonga, no mesa-sa-nop kayon manchejaw et gwariy dahin mankararag ono mengowan na inpaamten Afo Chiyos cha si-katho, nat tambonan to komay toktok to. Tep no tambonan toy toktok to, nainbaing tos Criston para balnay to. 5 Nem no mankararag i bii ono konen toy inpaamten Afo Chiyos cha si-katho, mesepol a tambonan toy toktok to. a Tep no nat tambonan toy toktok to, nainbaing toy imbaliy ton para balnay to tep singen epoltahan i toktok to. 6 No nat piyan na biin tambonan i toktok to, magangkana no manpokis. Isonga, kagol na kababaing no manpokis i bii ono mepoltahan i toktok to, tambonan to komay toktok to.
7 Sema dahi, nat tambonan to komay toktok tod simbaan tep si-kathoy kaybiybiyan na ogadi tan karebengan Afo Chiyos. Nem say bii, si-kathoy kaybiybiyan na karebengan na dahi, isonga tambonan to komay toktok tod simbaan. 8 Tep nonta piyarsowen Afo Chiyos i pilmiron dahi tan bii, nat sema dahiy edafod bii, no diket sema biiy edafod dahi. 9 Nat piyarsowa ngon Afo Chiyos i dahi para cha bii, no diket sema bii para cha dahi. 10 Isonga, tambonan na bii komay toktok to say angken sema iren anghilis, si-nengen cha i igwat na biiy karebengan na dahi. 11 Nem si-kathayon naematid Jesus a Afo thayo, nat mebedin a konen na bii i nat mesepol toy dahi. Tan nat mebedin ngon konen na dahi i nat mesepol toy bii. Tep sema dahi, mesepol toy bii, tan sema bii, mesepol toy dahi. 12 Tep angken sema pilmiron bii, edafod dahi, manipod nontan da emiin a daleki, in-anak na bii. Nem si Afo Chiyos, si-kathoy naedafoan na emiin.
13 Isonga, si-kayoy mengowan na kosto. Kosto aya no nat tambonan na biiy toktok to no mankakararag cha Afo Chiyos cha simbaan? 14 Tep sema mismon aramid tayo, no enchokiy i bowek na dahi, kababaing cha si-katho. 15 Nem no enchokiy i bowek na bii, chayaw to. Tep si-kathoy in-i-kan Afo Chiyos a penambon to. 16 No gwariy toon piyan ton mekisongbat maypangkep niyay a bilin a tambonan koma na biiy toktok to, say konen kod si-katho, sejay i aramid a naintoro wi, tan sejay i naiyonoran na emiin a naematid Afo Chiyos.
Sema Koston Pesing A Mankomolgar
17 Ijiy pay i piyan kon itabtabal, nem nat mebedin a chejawen tahejo maypangkep niyay. No mesa-sa-nop kayon manchejaw, nat mapteng i panpa-noan to, nem ngaaw. 18 Pilmiro, chimag ko i no naesa-sa-nop kayon manchejaw, naesi-si-jan kayo kono, et singen napiyatik i nakigwan cha. 19 Tep mesepol emon naepasamak ira jay say mebedin a maamtaan no siyed si-kayoy podnon iyapolbaran Afo Chiyos. 20 Nem no naesa-sa-nop kayon mengan na penginemnemneman jo na ingkathiy Jesus a Afo thayo, nat si Jesus a Afo thayoy naniyemnem jo. 21 Tep eg jo kono nasingked i echom jo. Nem imbis nga seta echom cha si-kayo, naedagwas iren mengan tan man-inom, tan eg cha nainbingayan i echom cha. Say panpa-noan to, naaofay echom tan naiyanbotheng i echom. b 22 Niya-mona jay? Ampet siya iy nagwariy baliy jon penganan tan pan-inoman jo? Niyana nadiyamsis joy tothoon Afo Chiyos? Tan niyana nakiyel-ingan jo ira ma nagwariy kebedinan to? Nengoy konen kod si-kayo? I-tek tahejo aya maypangkep iren man? Nat mebedin.
23 Tep in-elbat ko wa ded si-kayoy intoron Jesus a Afo thayod si-kak maypangkep na penginemnemneman na ingkathiy to, nem ipidgwak mowan. Nonta ekipangan ires Jesus a Afo thayo na edagwin etraidor, engala na tinapay 24 et iyansalamat cha Afo Chiyos. Et piyetpet-ing to ma tinapay a kigwan to i “Sejay i angel kon maytangdal para cha si-kayo. Amag jo jay a penginemnemneman jod si-kak.” 25 Idi iyakcheng iren engan, inges to ngoy inpasing Jesus chiwa tasa. Ida tho ma tasen kigwan to i “Seja inom, si-kathoy kasi-nengan na badon tolagan Afo Chiyos cha si-kayo, et seja chalak, si-kathoy mengipaneknek niwa tolagan Afo Chiyos. No a-magen jo jay na olay, inom jon penginemnemneman jod si-kak.” 26 Tep no kakanen jo na olay iyay a tinapay tan menginom kayod ja tasen inges niyay ket, ipaamta yo wiy ingkathiy Jesus a Afo thayo ingkathod on-oli di mowan.
27 Isonga, sema toon mengan niyay a tinapay tan menginom chiya tasa na penginemnemneman cha Jesus a Afo thayo, nem nat iyaykoskostoy aramid to, manbesol cha Jesus a Afo thayo tep endamsis toy angel Jesus tan chala tho. 28 Isonga, mesepol a nemnemnemen nin na too i ima-imag to asan kakanen to ja tinapay tan menginom chiya tasa. 29 Tep no mekipangan tan mekiinom i too, nem eg to egwathan i kapateg na angel Cristo, ipachosa thoy angel tod Afo Chiyos. 30 Isonga chakel kayon ekapsot tan mansekit, tan etiy i echom. 31 No kamon niyemnem tayo nin iwa imag tayo, nat echosa kiya koma. 32 Nem no chosaen to kiyen Afo Chiyos, naimag to man say mebidin kiya et say nat mechosa kiyen inges to ira ma nat naemati.