Sema Banbancha Maypangkep Iren Ma Sinan Chiyos
10
Aahi, piyan kon nemnemnemen jo i epasamak ired ma afo-afo thayo len inbalnay Moses. Esiroman iren emiin cha kolpot a sinjal a ekikadgwes Afo Chiyos cha si-kara. Et iyanchalan ngo pay iren emiin chiwed Depang a Baybay a inpabi-sak Afo Chiyos cha Moses. 2 Singen ebonjagan iren emiin chiwa kolpot tan baybay say mayka-chom ired Moses tep igwat ches Moses a para balnay cha. 3 Tan kiyakan chen emiin i tinapay a in-i-kan Afo Chiyos. 4 Tan inimon chen emiin i chanom a inpabo-day Afo Chiyos cha batho. Tep sema Bathon ekikadgwed si-kara, si-kathoy edafoan na emiin a tolong cha si-kara, tan sema Batho ket, si-kathos Cristo. 5 Nem inbonget Afo Chiyos i gwa-gwa-cha ired ma too tep angken diya-kaman chiy mapteng a ima-imag to, eg cha piyatis si-katho. Isonga, chiyosa iren Afo Chiyos, et iyaygwala-gwalak iriy angel ched dogad a nagwariy toon naiyan-iya-iyan.6 Sema iren epasamak, banched si-kathayo say nat piyan tayon mengemag na ngaaw a inges to ira ma tothoo. 7 Isonga, enog i chayaw iren ma sinan chiyos a inges na echom. Tep iyaysolat cha esel Afo Chiyos maypangkep na imag iren ma too nonta iyanchayaw ira na sinan chiyos a kigwan to i “Timokkong i tothoon mengan tan menginom, et imakgwat iren mansada.” a 8 Mesepol a nat menechog kiya na nat imbaliy tayon inges toy echom tep kagol na engamagan cha niwan, etiy i chegwen polo tan tedon dibon too na san-akow. 9 Mesepol pay a nat parasen tayoy anos Afo Chiyos a inges toy echom. Tep kagol niwan, kidat ira na oleg, et etiy ira. 10 Tan mesepol a nat manriri kiyen inges toy echom. Tep kagol niwan, inpabono iren Afo Chiyos cha Anghil na Pathiy.
11 Emiin a epasamak ired ma tothoo, banched si-kara, nem sema epasamak cha si-kara ket, iyaysolat ngod esel Afo Chiyos say si-kathoy pan-achalan tayo tep sibibiyag kiya wed kaonoran men akow chiya dobong. 12 Isonga, sema naengowan i mahedsang i pamati tho, mesepol a mantanchaan, nahol ni onbasol. 13 Emiin a solisog a nasimagwid si-kayo, si-kathoy solisog a nasimagwid emiin a tothoo. Naepiyal si Afo Chiyos, et nat itolok ton mesolisog kayod ingkatho wed ma eg jo mahatoled. Nem no mesolisog kayo, tolongan to kayon Afo Chiyos say mahaanos jo et say mahadesot kayod man.
14 Isonga, si-kayon ensemek ko, aragwii yoy panchejaw ired ma sinan chiyos. 15 Amtak i kostoy nemnem jo. Isonga, si-kayoy mengowan no kostoy konen ko di. 16 Nem no mekikomolgar kiyen man-inom chiwa tasen iyansalamathan tayod Afo Chiyos, naekida-kam kiya iren ma bindisjon a naedafod ma chalen Criston imayos nonta ingkathiy to. Tan no mengan kiya na tinapay a epetpet-ing, naekida-kam kiya iren ma bindisjon a naedafod angel Criston iyaytangdal. 17 Tep sa-sa-ki bengat i tinapay, et angken chakel kiya, singen sa-kiy angel tayo tep sema tinapay a kiyakan tayon emiin, sa-sa-ki bengat.
18 Nemnem jo i naimag iren ma Hodjo. No mekipangan ira na iyaytangdal cha Afo Chiyos chiwa tangdalan, ipaamta ren mekichejaw ired si-katho. 19 Nengoy piyan kon a-seden? Kowan kona aya i agpayson sibibiyag ira ma sinan chiyos, tan sema mekan a iyay-i-kan cha si-kara, gwara ayay banag to? 20 Enchi. Sema piyan kon a-seden, sema iren tangdal iren ma nat naemati, nat si Afo Chiyos i iyaytangdalan to, no diket dimonyos. Et ekak piyan a mekichejaw kayo ired ma dimonyos. 21 Tep no mekipangan tan mekiinom kayo na iyaytangdal ired ma dimonyos, nat mebedin a mekipangan tan mekiinom kayo mowan na penginemnemneman tayo na ingkathiy Criston Afo thayo. 22 Piyan tayo ayen pa-dem si Afo Chiyos? Ampet siya iy mahedkedsang kiya iy say si Afo Chiyos et say nat chosaen to kiya?
23 Gwariy echom cha si-kayon naengowan i “Angken a-magen tayon emiin i piyan tayo.” Podno tan, nem sema para cha panmaptengan tayo, nat emiin a ma-mag. Nakigwan cha i “Angken a-magen tayon emiin i piyan tayo.” Ahow, nem sema mengikedsang na pamati na echom tayo, nat emiin a ma-mag. 24 Si-kathayon emiin, eg tayo koma nemnemnemen i panmaptengan tayo bengat, no diket pati sema panmaptengan na echom tayo. 25 Isonga, angken nengon bohin naindaho red market, mebedin a kakanen jo, nem enog i inbaga no iyaytangdal ired ma sinan chiyos say nat mekonsinsiya kayo no kakanen jo. 26 Tep iyaysolat i “Seja dobong tan emiin a eparsowa, kegwen Afo Chiyos.” b
27 Nem no bilang i gwariy nat naematin inbitaren to kayon mekipangan et piyan jon onkowan, kakan moy kompormin isango thod si-kayo. Nem enog i inbaga no iyaytangdal ired ma sinan chiyos say nat mekonsinsiya kayo. 28 Nem no gwariy mengowan cha si-kayo i “Iyaytangdal iyay a bohi ired ma sinan chiyos,” enog i kiyakan kagol na kaasi yod man a toon engowan cha si-kayo say nat onsahit i nemnem to. 29 Tep angken amta yo i nat basol i pengan na iyaytangdal ired ma sinan chiyos, ibilang emon ma toon basol. Isonga, enog i kiyakan. Nem gwara emoy mengogwan i “No gwariy itolok Afo Chiyos, apay nga ampet a ibiyang ko chafot nainbilang na echom a ngaaw? 30 No iyansalamathak maled Afo Chiyos na kiyakan ko, apay nga nainbasolan chaak no kakanen ko ma iyansalamathan ko?”
31 Sejay i songbat ko. Angken nengoy a-magen jo, angken mengan ono man-inom, amag jon emiin para cha chayaw Afo Chiyos. 32 Enog i imag i kompormin salchengan na echom a mematid Cristo, angken Hodjos ono Gentiles, tan enog i imag i kompormin menechal na pamati na tothoon Afo Chiyos. 33 Amag joy naimag ko. Nainpahat kon ibagay i emiin a naimag kod emiin a too. Tep say naniyemnem ko, nat sema panmaptengan ko, no diket sema panmaptengan na karakelan say maysalakan ira.