Sejay a solat, insolat Paul ired ma ematin gwared Roma. Kigwan na echom i insolat to nonta maykatdon biyaki thon mankasaba na mapteng a chamag. Nontan a biyaki tho, iyanchalan ired ma probinsiya na Asia, Macedonia, tan Achaia. Kigwan cha i insolat to emo nonta tedon bolan a gwared Corinth nonta A.D. 57 emo.

Sa-kin kagol a iyansolathan Paul niyay, piyan ton ipaamted gwara ired ma Roma i plano thon manbisited si-kara (Roma 1:8-15; 15:22-33). Sa-ki pay a kagol a iyansolathan to, piyan ton iiksplikar tod si-kara i mapteng a chamag maypangkep na planon Afo Chiyos a mengisalakan na too tep emati ired Jesu Cristo. Seja timen planon Afo Chiyos, gwared Roma 1:17: “Tep seja mapteng a chamag, nainpaamta thoy planon Afo Chiyos a pechonong toy tothoo. Sema pengichonong Afo Chiyos na tothoo, kagol na pamati ra bengat.”

Manchogid Roma 1:17—4:25, in-iksplikar Paul i maypangkep na kinachonong. Pilmiro inpaamta tho i mabesol i emiin a too, angken Hodjos ono Gentiles. Isonga, kafidithan a maysi-jan ired Afo Chiyos et mechosa ira no nat pechonong iren Afo Chiyos. In-iksplikar Paul i nat pechonong Afo Chiyos i kompormin too kagol na pengonoran to na dinteg Afo Chiyos tep nagwariy onkayen koston mengonod. No diket pechonong Afo Chiyos i too kagol na pamati thod Jesu Cristo bengat.

Cha Roma 5:1—8:39, kigwan Paul i maypangkep na badon biyag a kenasen na naemati tep iyayka-chom maled Cristo. Say naemati, mapteng i pekisa-ki thod Afo Chiyos, tan gwara ngod si-kathoy Ispirito Santon naengidibchid kinatoray na basol. Chiwa iren ja kapitolo, kigwan ngon Paul i pangkep na dinteg Afo Chiyos tan panakabalin na Ispirito Santon ontolong na naemati.

Cha Roma 9:1—11:36, in-iksplikar Paul i planon Afo Chiyos para ired Hodjos tan Gentiles. Kigwan to i sema inpanbeneg iren ma Hodjos cha Jesu Cristo, iyaybagay cha planon Afo Chiyos a mekida-kam i Gentiles na kaasi tho babaen na imag Cristo. Nem kigwan to i nat manbene-beneg ma iriy Hodjos cha Cristo, no diket memati wa ired si-katho no sa-ki din akow.

Chiwa iren kaonoran a kapitolo, inbilin Paul i maypangkep na panbiyag na naemati, agdalod pansisinemek cha tan pan-iinawatan cha. Kigwan to pay i maypangkep na risponsibilidad na naemati a mengonod na dinteg na gobirno tan mekisa-sa-ki ira no sema pengegwat cha na kosto tan nat kosto, nat man-inges.