Sema Solat Paul Ired Ma Gwared
ROMA
Sema Kapoanan Na Solat
1
Si-kak si Paul a naiyansilbid Jesu Cristo. Pinispis toak Afo Chiyos a manbalin na apostolis, tan chiyotohan toak a mengikasaba na mapteng a chamag a edafod si-katho. 2 Sejay a mapteng a chamag, inkarin Afo Chiyos nontan da babaen iren ma profita tho, tan inpasolat tod ma esantoan a sola-solat. 3 Sema mapteng a chamag, maypangkep na Anak ton si Jesu Criston Afo thayo. Sema kinathoo tho, polin David. 4 Sema kinachiyos to, inpasi-neng Afo Chiyos i si Cristoy Anak to nonta inpanpawil to babaen na panakabalin to. 5 Babaen Jesu Cristo, kiyaasian toak Afo Chiyos tan inpanbalin toak na apostolis say egwisen koy toon mematid Cristo et say mechejaw si Cristod emiin a ili. 6 Angken si-kayo ngo, iyaybilang kayo ired ma toon pinispis Afo Chiyos a mayka-chom cha Jesu Cristo.7 Sejay i solat kod si-kayon emiin a gwared Roma a ensemek Afo Chiyos a tiya-gway ton manbalin na too tho. Sapay koma ta gwared si-kayoy kaasi tan talnen naedafod Afo Chiyos a Awa thayo tan si Jesu Criston Afo thayo.
Piyan Paul A Manbisita Iren Ma Ematin Gwared Roma
8 Say pilmiron piyan kon a-seden, naiyansalamathak cha Afo Chiyos kagol cha si-kayon emiin tep sema mahedsang a pamati yo, naiyaychama-chamag na olay cha intiron dobong. Tan kagol Jesu Cristo, nainki-ngelan Afo Chiyos na olay iyay a nainpansalamat ko. 9 Tep si Afo Chiyos i kowan ipasnek a pansilbian ko babaen na pankasabak na mapteng a chamag maypangkep na Anak to. Tan amta tho i no mankararagak, nainkararagan tahejo na olay. 10 Kowan ibaga i no itolok Afo Chiyos, gwariy gwayak a onkowan ded ta kad-an jo. Kowan ibaga man tep ingkathod niman nagwariy gwayak. 11 Tep piyan kon pasiyen si-nengen tahejo say mengibingayak cha si-kayo na aispiritoan a bindisjon et say maypakedsang pay i pamati yo. 12 Say piyan kon a-seden, say maypakedsang i pamati tayon emiin. Pekedsang toak na pamati yo, tan pekedsang to kayo ngo na pamatik. 13 Aahi, piyan kon amtaen jo i eminchakel a naniyemnem tahejon si-nengen, nem ingkathod niman gwara na olay i naeniped cha si-kak. Piyan tahejon bisitaen say mankasabaak chithan et say metaen koy mapteng a panpa-noan jon inges toy epasamak cha echom a Gentiles. a 14 Tep kafidithan a ikasabak i mapteng a chamag ired emiin a too--sema iren gwared siyo-siyodad tan sema iren gwared chonchontog, sema iren iyan-achal tan sema iren nat iyan-achal. 15 Isonga, piyan kon pasiyen ikasaba i mapteng a chamag cha si-kayo ngon gwared ta Roma.
16 Tep nat enbaing ko ma mapteng a chamag tep si-kathoy panakabalin Afo Chiyos a mengisalakan na emiin a gwariy pamati tho--pilmiro sema iren Hodjos et sema ira wen Gentiles. 17 Tep seja mapteng a chamag, nainpaamta thoy planon Afo Chiyos a pechonong toy tothoo. Sema pengichonong Afo Chiyos na tothoo, kagol na pamati ra bengat. Tep iyaysolat cha esel Afo Chiyos i “Sema toon pechonong Afo Chiyos kagol na pamati tho, gwared si-kathoy biyag a nagwariy pengingkaan to.” b
Sema Kinabasol Na Too
18 Si Afo Chiyos a gwared dangit, inpaamta tho i chosaen ton emiin ira ma nat naematid si-katho tan naengamag na ngaaw. Kagol na kinangaaw cha, eg cha naintolok a maypaamtiy i podno maypangkep cha Afo Chiyos. 19 Tep sema mebedin a maamtaan maypangkep Afo Chiyos, mafoot cha si-kara tep si Afo Chiyos a mismoy engibiybiy cha si-kara. 20 Manipod nonta piyarsowen Afo Chiyos i dobong, inam-ay a igwathan na tothooy maypangkep na kinachiyos to tan panakabalin ton nagwariy pengingkaan to angken eg ira mesi-neng. Tep sema kinachiyos to tan panakabalin to, naesi-neng chiwa piyarso-parsowa tho. Isonga, nagwariy pangbal ton nat mengamta na podno maypangkep Afo Chiyos. 21 Tep angken amta ra i gwares Afo Chiyos, eg cha nachijaw a Afo Chiyos, tan eg ira naiyansalamat cha si-katho, no diket sema nemnem cha, iyanbalin na nagwariy silbi tho tan sema ngaaw a nemnem cha, bimolinget. 22 Nakigwan ched nemnem cha i mathekal ira, nem kimedsel ira. 23 Et imbis nga chejawen ches Afo Chiyos a eg meti-metiy, nachijaw chiy bolto na toon naetiy, sema iren natimayab, sema iren naiyan-ahad, tan sema iren nakimorong.
24 Isonga, in-olay iren Afo Chiyos say tongpalen chiy ngaaw a kamkam a gwared nemnem cha. Say iyanpa-noan to, naengamag ira na ensekig cha echom chen naengibaing na angel cha. 25 Imbis nga patien chiy podnon maypangkep Afo Chiyos, napiyati riy itek. Nachijaw chiy piyarsowen Afo Chiyos, tan naiyansilbi ired man. Nat nachijaw ches Afo Chiyos a naemarsowen mechejaw na ingked ingka! Amen.
26 Kagol niyay, in-olay iren Afo Chiyos say tongpalen chiy kababaing a kamkam na angel cha. Angken sema iren bibii, imbis nga tongpalen chiy koston kamkam na angel cha, natiyongpal chiy nat kosto. Isonga, sema echom a bibii i nachichog cha, nat sema iren daleki. 27 Inges to iriy daleki. Binekan chiy koston penechog na bibii, tan piyan cha ketdin mekicharog cha echom chen daleki. Naengemag i daleki na kababaing cha daleki. Isonga, chiyan da-kamiy chosen iyaybagay cha basol a naimag cha.
28 Nat piyan chen mengikaskason Afo Chiyos, isonga in-olay to ira say itoloy chen mannemnem na ngaaw tan a-magen chiy nat kosto. 29 Naimag cha na olay i ekila-kilasin ngaaw a inges toy pengamkam cha pay a mengeda angken gwara wed si-kara tan pengemag cha na ngaaw cha echom. Naimapal ira na olay, naemono ira, mabekal ira, naenaol ira, napiniyan cha ngon mepesamak i ngaaw cha echom cha. Manotnot pay ira, 30 maomang ira, tan en-owes ches Afo Chiyos. Nagwariy rispiktar ched kompormin too, pahi-tek ira, tan tangsit ira. Naniyemnem cha na olay i ekila-kilasin ngaaw a ma-mag, tan nat napiyati riy awecha tan inecha. 31 Eg cha mahaidasin i mapteng cha ngaaw, tan nat naepiyal ira. Nagwariy semek ched angken pamilja ra ngo, tan nagwariy kaasi red echom. 32 Amta riy dinteg Afo Chiyos a kigwan to i sema iren mengemag na ngaaw a inges to man, bagay chen metiy, nem naintoloy chen a-magen ngorechan. Tan nat setan bengat, nem naiyapolbaran cha ngo iriy naengamag iren ma ngaaw.