Nonta timpon Paul, Corinth i kapital na probinsiya na Achaia a gwared Greece. Banay iwan a siyodad a naiyan-iyanan na Greek, Romano, tan Hodjo. Kagol na ingkay-esop tod baybay, chakel i bapor a naedafod ekila-kilasin ilin nasima-mad chiwan, tan echamag kagol na dahoan tan sema kinabaknang to. Echamag pay tep sema iren toon naiyan-iyan chiwan, nasimekep ired ma ekila-kilasin paganon rilijon. Naenarog ngo pay ira na nat imbaliy cha, tan naimag chiy echom a ensekig a inges to man.

Nontan a maykadgwen biyahin Paul a mankasaba na mapteng a chamag, binisita thoy Corinth. Iyan-iyan chiwan et iyantoro maypangkep Jesu Cristo na chanchanin chegwen tawen, et iyamtik ma.

Idi esolok malen tedon tawen a epalabas nonta A.D. 55 emo, engawat si Paul na solat ired ma ematin gwared Corinth iy maramen mantotoro ngod Ephesus. Sema iren ematid man, gwariy eg cha iyan-iinawatan, et kinchow ches Paul a memidin cha si-kara maypangkep niwan. Gwara pay i echom a kimowan cha Paul a engigwanggwang na echom a problima na ematin gwared Corinth.

Nonta iyamtaan Paul ira jay, insolat to jay say bidinen to ira ma ematin gwared Corinth. Chiyay a solat, siyomdek to ira ma emati tep eg ira naiyan-iinawatan tan eg cha piyan a a-kalen i sa-kin echom chen iyanbii-bii. Siyongbathan Paul iriy salodsod iren ma ematid Corinth maypangkep no kostoy pengimbaliy tan kostoy pengan na mekan a iyaytangdal cha sinan chiyos. Kigwan to pay cha si-kara i maypangkep na olnos no mesa-sa-nop iren manchejaw, sema iren ekila-kilasin daing a nain-i-kan na Ispirito Santo tan sema iren osal to, tan panpawil iren ma iyangketiy.

Say kapitolon 13, si-kathoy toron Paul a mesepol a mesmek i echom tayo. Seja toro, mas echamag a parti na solat tod nemnem na chakel a too.