4 Naiyansalamathak na olay cha Afo Chiyos kagol na kaasi thod si-kayon ekisa-kid Cristo Jesus. 5 Tep kagol na inpakisa-ki yod Cristo, esolok i bindisjon Afo Chiyos cha si-kayo, tan banay i pengamta yon podnon edafod Afo Chiyos, tan pilmiy daing jon mengiesel niwan a podno. 6 Tep podnon piyati yoy intoro wi maypangkep Cristo. 7 Isonga, gwara wed si-kayoy emiin a rigalon aispiritoan niman a timpo na panseked jon pan-oli din Jesu Criston Afo thayo. 8 Pekedkedsang Cristoy pamati yo ingkathod kaonoran a akow say nagwara wiy maypabasol cha si-kayo no seman alin akow a on-oli di. 9 Tep pinispis to kayon Afo Chiyos a mekisa-kid Anak ton si Jesu Criston Afo thayo, et naepiyal si Afo Chiyos.

10 Si-kayon ahik cha pamati, kagol na karebengan Jesu Criston Afo thayon in-i-kan tod si-kak, konen kod si-kayo i pangaasi yo, pan-iinawathi kayon emiin. Enog i si-si-jan, no diket pansa-sa-ki kayod pannemnemnem tan pangkep jo. 11 Kagol na kigwanan kon jay cha si-kayon aahik, gwara ira ma kimowan alid baliy Chloe a engigwanggwang cha si-kak i nat naiyan-iinawatan kayo. 12 Say piyan kon a-seden, gwara kono ira ma naengowan i “Miyan onoris Paul.” Et sema echom, nakigwan cha i “Miyan onoris Apollos.” Et gwara pay i echom a naengowan i “Miyan onoris Peter.” Et sema echom pay, nakigwan cha i “Miyan onoris Cristo.” 13 Sema jowan amaga, nat kosto. Singen bininga-bingay jos Cristo. Et si-kak ayen Paul i etiy cha koros para cha si-kayo? Et ebonjagan kayo aya say maypaamta i si-kak i pematian jo? 14 Mansalamathak cha Afo Chiyos tep nagwariy biyonjagan kod tan, malaksid si Crispus tan si Gaius. 15 Isonga, nagwared si-kayoy mebedin a mengowan i ebonjagan say maypaamta i ematid si-kak. 16 Ay, ahow gayam! Biyonjagan ko ngoy pamiljen Stephanas, pati sema iren naekiiyan cha baliy to, nem ekak amta no gwared si-kayo pay i biyonjagan ko. 17 Tep nat into-no thoak Criston memonjag, no diket into-no thoak a mankasaba na mapteng a chamag. Et no naiyankasabaak, nat naiyosal koy ese-esel a naedafod daing na too, nahol ni sema iren manki-ki-ngel, nat da-kaman chiy panakabalin Criston mengisalakan cha si-kara babaen na ingkathiy tod koros.

18 Tep sema iren eg naematin maysi-jan cha Afo Chiyos, nakigwan cha i sema toro maypangkep na ingkathiy Cristod koros, nagwariy silbi tho. Nem si-kathayon naematin maysalakan, amta thayo wango i sema ingkathiy Cristod koros, si-kathoy pengamtaan na panakabalin Afo Chiyos. 19 Tep iyaysolat chiwa esel Afo Chiyos i:

20 No seman ma, sema daing na iyangkedaing tan mamaistoro na dinteg tan iyangkedaing a man-a-sel niman a timpo, nagwariy silbi tho. Tep inbiybiy Afo Chiyos i sema daing a naedafod ja dobong, nagwariy osal to. 21 Tep kagol na daing Afo Chiyos, nat intolok ton amtaen na tothoos si-katho babaen na daing cha ngo. Say piyan Afo Chiyos et, maysalakan i too babaen na pemati ra na nainkasaba wi maypangkep Cristo, angken nakigwan iren ma eg naemati i sema nainkasaba wi, nagwariy silbi tho. 22 Tep sema iren Hodjo, nainbaga riy milagron pengamtaan na podnoy nainkasaba wi, tan sema iren Greek, nainap chiy echalek a toro-toron naedafod daing na too. 23 Nem sema nainkasaba wi, si Criston iyaydansed koros. Sema iren Hodjo, naiyasnit ired man, tan sema iren Gentile, naniyemnem cha i nagwariy silbi tho. ^b 24 Nem sema iren pinispis Afo Chiyos a manbalin na too tho, angken Hodjo ono Gentile, amta ra i si Cristoy kasi-nengan na panakabalin tan daing Afo Chiyos. 25 Tep angken nakigwan na too i nagwariy silbi na inpangitolok Afo Chiyos a etiy si Cristod koros, sema imag Afo Chiyos, mas edaing gayam iy say sema daing na emiin a too. Tan angken nakigwan ngo na too i ekapsot si Afo Chiyos kagol na ingkathiy Cristod koros, mas mahedsang si Afo Chiyos iy say sema kedsang na emiin a too.

26 Aahi, nemnem joy kasasaad jo nonta pinispis to kayon Afo Chiyos. Manmanod si-kayoy edaing cha pengowinta na tothoo. Manmano ngod si-kayoy ekayang i kasasaad to ono anak na babaknang. 27 Tep sema iren nainbilang na toon nagwariy silbi tho, pinispis iren Afo Chiyos say ipabaing to ira ma iyangkedaing. Sema iren nainbilang na toon nagwariy toray to, pinispis iren Afo Chiyos say ipabaing to ira ma gwariy toray to. 28 Tan sema iren nainbilang na toon ebaba tan naedisjon tan nagwariy pateg to, pinispis iren Afo Chiyos say ibiybiy to i sema napiyategan na too, nagwariy pateg tod si-katho. 29 Imag Afo Chiyos iwan say nagwaren polos i mebedin a mengiki-tek na angel tod sangoanan Afo Chiyos. 30 Tep si Afo Chiyos i engika-chom cha si-kathayod Cristo Jesus, tan si-kathoy engipabalin Criston naedafoan na daing tayo. Babaen Cristo, iyaybilang kiya a maronong, iyanbalin kiyen esantoan a toon Afo Chiyos, tan iyaydibchi kiyed basol tan pathiy. 31 Isonga, onoran tayoy iyaysolat cha esel Afo Chiyos a “Sema toon piyan ton onki-tek, iki-tek to komay imag na Afo.” ^c