Iyankasabes Paul Babaen Na Panakabalin Afo Chiyos
2
No si-kak ngo, aahik, idi kimowanak chithan a mankasaba na inpaamten Afo Chiyos maypangkep Cristo, nat iyosal koy echalek a esel ono daing na too. 2 Tep niyemnem ko i say itorok, maypo-tok cha Jesu Cristo, agdalod ma ingkathiy tod koros. 3 Nonta iyan-iya-iyanak cha kad-an jo, ekapsothak tan nabimayedbedak tep ketahothak i nat mebedin ko emon tongpalen i piyan Afo Chiyos. 4 Nonta natiyoroan tahejo, ekak iyosal i esel a on-awis a naedafod daing na too. No diket sema panakabalin na Ispiriton Afo Chiyos i iyanpaamted si-kayo i podnoy intorok. a 5 Sema inpasing kon iyankasaba, inges to man tep piyan ko i sema pamati yo, nat maybasar komed daing na too, no diket sema panakabalin Afo Chiyos.Sema Podnon Daing A Naedafod Afo Chiyos
6 Nem gwariy echalek a daing a naintoro wi ired ma mahedsang i pamati tho, nem afil chiwed daing na tood ja dobong. Afil pay chiwed daing iren ma naiyantoray chiya dobong a emangkepokaw i pantoray cha. 7 Sema daing a miyan tabtabala, si-kathoy planon Afo Chiyos a mayka-chom kiyed kinakayang to. Nonta aneng pay parsowen Afo Chiyos i dobong, niyemnem to man a plano tho, nem eg to inpaamted too nontan. 8 Sema iren naiyantoray chiya dobong, nagwared si-kariy mahaaw-awat niwan a planon Afo Chiyos tep no igwathan cha koma, eg cha koma inpadansed koros si Criston Afo thayon kahejangan. 9 Seja miyan tabtabala, si-kathoy iyaysolat cha esel Afo Chiyos a:
“Sema nat sini-si-neng na
tothoo
tan nat inki-ki-ngelan cha
tan sema nat iyam-amta ra,
si-kathoy insaganen
Afo Chiyos
para ired ma mahasmek
cha si-katho.” b
10 Nem si-kathayo, inpaamten Afo Chiyos ira jay cha si-kathayo babaen na Ispirito tho. Tep sema Ispiriton Afo Chiyos, amta thon emiin, angken sema iren echalek a nemnem Afo Chiyos. 11 Tep nagwariy mahaamta na nemnem na too, malaksid chiwa too ngo bengat. Inges to ngod Afo Chiyos. Nagwariy mahaamta na nemnem to, malaksid si Afo Chiyos tan Ispirito tho ngo. 12 Nem si-kathayon naemati, nat sema daing a naedafod ja dobong i igwat tayo, no diket sema Ispiriton into-non Afo Chiyos say mebedin a egwathan tayoy emiin a in-i-kan tod si-kathayo. 13 Isonga, no naiyantoro kawi, nat naiyosal miy ese-esel a naedafod daing na too, no diket sema ese-esel a naintoro na Ispiritod si-kawi. Sema toon gwared si-kathoy Ispirito, naintoroan mi iren ma podnon naedafod Ispirito. 14 Nem sema toon nagwared si-kathoy Ispiriton Afo Chiyos, nat naigwat toy toro-toron naedafod Ispirito tep nagwariy banol tod si-katho. Sema too, nat mebedin a egwathan to ma toro-toro tep seman ira, ma-gwathan bengat babaen cha tolong na Ispiriton Afo Chiyos. 15 Nem sema toon gwared si-kathoy Ispiriton Afo Chiyos, egwathan ton emiin angken mapteng iwan ono ngaaw. Nem sema toon nagwared si-kathoy Ispirito, nat egwathan to ma toon gwared si-kathoy Ispirito. 16 Tep iyaysolat chiwa esel Afo Chiyos i:
“Nagwariy mahaamta na nemnem Afo Chiyos,
tan nagwariy mebedin a memidin cha si-katho.” c
Nem si-kathayo, sema nemnem tayo, inges tos Cristo tep gwared si-kathayoy Ispirito.