Chiwa sigod a solat Paul cha gwara ired ma siyodad na Corinth cha probinsiya na Achaia, inseg-ang to ira ma ematid man tep gwariy eg cha pan-iinawathan. Binidin to ira ngo maypangkep na echom a problima ra. Nonta inpaw-it men Paul iwan a solat ired ma ematid Corinth, binisita tho pay ira, nem nat piyan chen onoran i kigwan to, isonga ensahit a pasiyay nemnem to. Et imoli wes Paul cha siyodad na Ephesus cha probinsiya na Asia.

Kecheng niwan, kimowan si Paul a iyankasabed siyodad na Troas cha probinsiya na Mysia tan cha probinsiya na Macedonia pay. Nonta mimothok cha Macedonia, iyaspol tos Titus a edafo did Corinth. Epaladoy chadsak Paul nonta kigwan Titus i inpanbabawi iren ma ematid Corinth, tan mimapteng i nemnem cha maypangkep Paul. Nonta ingwanggwang Titus ira man, insolat men Paul iyay ired ma ematid Corinth emo nonta A.D. 55 ono 56 iy gwara pay si-kathod Macedonia.

Gwariy tedon ainportantin pontos chiya solat. Pilmiro, in-iksplikar Paul no niyana enbel-at i kigwan to nontan cha si-kara, tan kigwan to i kaimdeng men pasiya tep iyanbabawi ira. In-iksplikar to pay i maypangkep na pesing na panbiyag na podnon apostolis tan pansilbi thod Afo Chiyos. Maykadgwa, kigwan Paul ired ma Corinth i itoloy cha komay plano ren meni-nop na alos para ired ma ematid Jerusalem. Maykatdo, tiyakchelan Paul i karebengan ton apostolis tep gwara pay ired ma ematid Corinth i naengowan i nat podnon apostolis si Paul, no diket si-kara bengat i podno.