Sejay a solat, insolat Paul ired ma Gentiles a ematin iyan-iyan cha Galatia a probinsiyen gwared Asia Minor nonta emo A.D. 48. Nonta gwares Paul cha Galatia, inkaskasaba tho ired man a too i mapteng a chamag maypangkep na kaysalakanan. Intoro tho i say pesing bengat a maysalakan, sema pematid Cristo.

Nonta imekal mes Paul cha Galatia, gwara di iriy echom a kimowan cha Galatia a engontra na intoro-toron Paul. Kigwan cha i si Paul, nat agpayson apostolis. Kigwan cha pay i no si Cristo bengat i ematian cha, eg ira maysalakan. Say pesing koma na too no piyan ton pechonong Afo Chiyos, mesepol kono ngon onoran toy bili-bilin cha dinteg Moses a inges toy kogit, nat pengan na iyayparit a mekan, tan ogadi na iyaydasin a akow, bolan, tan piyasta.

Isonga, idi chimag Paul i emangkadingoy chakel a too kagol niwa ngaaw a toro-toro, inpaw-it to ja solat cha ematid Galatia say amtaen chiy podnon edafod Afo Chiyos maypangkep iren jay. Pilmiro, tiyakchelan Paul i kinaapostolis to. Ingwanggwang toy inpasing Afo Chiyos a emispis cha si-kathon mengikaskasaba na minsahi maypangkep na kaysalakanan cha Gentiles. Kigwan to ngo i sema intoro-toro tho, nat edafod ma nemnem na too, no diket si Afo Chiyos. Idi iyakcheng ma iwan, in-iksplikar Paul i say pengichonong Afo Chiyos na too, nat maybasar chiwa pengonod na dinteg Moses, no diket sema pamatid Cristo bengat. Setan i tima niyay a solat.