Sema Iren Kaonoran A Bancha Tan Bilin Paul Ired Ma Ematid Corinth
13
Sejay i maykatdon ikowan kod ta kad-an jo. Nemnem joy nakigwan tod esel Afo Chiyos a “No gwariy mengicharom na echom to, mesepol a gwariy chegwa ono esolok a toon mengipaneknek na podnoy konen to.” a2 Nonta maykafidgwen kimowanak chithan, kigwan ko ired ma manbabasol i chosaen ko ira no eg cha isalcheng ithan. Et niman, angken anengak onkowan ded tan, kowan kona mowan cha si-kara, pati sema kompormin naiyanbasol pay. Kowan banchaani ira i no manbabasol pay laeng ira no onmothohak ded tan, ekak ira kaasian. 3 Nakigwan jo i piyan jon paneknekan ko i si Cristoy naedafoan na nakigwan ko. Sigoradon paneknekan ko man no chosaen ko ira ta manbabasol. Tep nat ekapsot si Criston menosed si-kayo, no diket ibiybiy toy panakabalin to no chosaen to kayo. 4 Tep angken singen ekapsot si Cristo nonta iyaydansed koros et etiy, sibibiyag mowan kagol na panakabalin Afo Chiyos. Tan inges to kawi ngo. Tep angken naekida-kam kawi na kinakapsot a nadiya-kaman Cristo, naekida-kam kawi ngo na panakabalin to tep ekisa-ki kawid si-katho. Et seman a panakabalin to, si-kathoy osalen mi no mesepol a chosaen mi kayo.
5 Nat si-kawi komay bistigalen jo, no diket si-kayo ngon chorog say paneknekan jo no podnoy pamati yo. Panekneki yo ngoy angel jo. Sigoradon amta yo i man-iiyan si Jesu Cristod si-kayo--ono ampet siya iy eg kayo naematin podno? 6 Et no amta yo i naemati kayon podno, sigoradoak a amtaan jo ngo i podnoak a apostolis. 7 Naiyankararag kawid Afo Chiyos i nagwariy a-magen jon ngaaw. Say kagol na naiyankararagan min tan ket, nat say egwathen joy kinaapostolis mi, no diket a-magen joy mapteng tan kosto. Piyan mi tan angken say panbanagan mi ket, ibilang cha kawi na echom a nat podnon apostolis tep nat mesepol a osalen miy karebengan min menosed si-kayo. 8 Tep nat chosaen mi kayo no naiyonoran joy podnon toro-toro. Tep nat mebedin a kontraen miy podno, no diket naimag mi bengat i iyaybagay cha podno. 9 Maradsak kawi no ibilang na too i ekapsot kawi basta mahedsang kayo. Et nainkararag mi i onkosto-kostoy ogadi yo ingkathod nagwariy pankolangan to. 10 Isonga, kowan isolat ira jay niman asanak onkowan ded tan say no onmothohak ded tan, nat mesepol a ibiybiy koy karebengan kon menosed si-kayo. Tep in-i-kan Afo Jesus iyay a karebengan ko, nat say chechalen koy pamati yo, no diket pekedsang ko.
11 Aahik cha pamati, sejay i engingkaan na konen kod si-kayo. Chadsak kayo. Panbalin joy ogadi yon kosto say nagwariy kolang to. Iki-ngeli yon pasiyay inbilin kod si-kayo. Pansa-ki yoy nemnem jo. Pan-iinawathi kayo. Et say si Afo Chiyos a naedafoan na semek tan talna, gwared si-kayo.
12 Pankikinomosta kayon mengibiybiy na semek jod sa-ki tan sa-ki. 13 Chiyan komostai kayo na emiin a toon Afo Chiyos chiyay.
14 Sapay koma ta da-kamen joy kaasin Jesu Criston Afo thayo tan sema semek Afo Chiyos tan sema nainpakikadgwa na Ispirito Santod si-kayon emiin.