Sema Inpaamten Afo Chiyos Cha Paul Babaen Na Singen Kokip
12
Singen mesepol a iki-tek koy angel ko angken nagwariy kanas to. Isonga, konen ko wed si-kayoy inpasi-neng Afo Jesus cha si-kak a singen inges toy kokip tan sema inpaamta tho pay cha si-kak. 2 Gwariy toon amtak a ematid Cristo. Nonta sampolo tan epat a tawen da, inkayang Afo Chiyos cha dangit a naiyan-iyanan to. a Ekak amta no inkayang Afo Chiyos i ispirito tho bengat ono angel to pay. Si Afo Chiyos bengat i mahaamta. 3 Say amtak, inkayang Afo Chiyos iwa tood dangit. Nem ekak amta no inkayang toy angel niwa too ono sema ispirito tho bengat. Si Afo Chiyos bengat i podnon mahaamta. 4 Nonta gwara ma tood kamaptengan a naiyan-iyanan Afo Chiyos, gwara iriy inki-ngelan ton nat mebedin a may-a-sel cha esel na too tan nat maypalobos i mekegwan cha too. 5 Sema toon iyanda-kam niwan, iki-tek ko. Nem si-kak iwa toon iyanda-kam niwan, isonga ekak iki-tek i angel ko. Sema iki-tek ko bengat, sema mengibiybiy na kinakapsot ko. 6 Nem no bilang i piyan kon iki-tek i angel ko, nat egwenggwengak no imag ko man tep podno la ma kigwan ko. Nem ekak onki-tek tep nat piyan kon chejawen chaak na too kagol iren jay. Say piyan ko kitdi, no chejawen chaak, sema kagol na imag kon mita ren mismo tan sema kigwan kon inki-ngelan chen mismo.7 Kagol a nat piyan Afo Chiyos a onpahi-tekak maypangkep iren ma epaladon kaskasdaaw a inpabiybiy tod si-kak, intolok ton ito-non Satanas i bagaen ton mengipadigat cha si-kak. Tan sema digat, singen gwariy sebit a mantetebek cha angel kon towan ipasahit a chili. 8 Emintedon ekiadohak cha Jesus a Afo thayon ipa-kal to. 9 Nem insongbat to i “On-anay i kaasik cha si-kam para cha emiin a nadiya-da-kaman mo tep sema kinabanay na panakabalin ko, naiyaypasi-neng na kolpid toon ekapsot.” Isonga, ekak ma kekchowen i ma-kal iwa digat, no diket kaimdengak a iki-tek koy kinakapsot ko tep no ekapsothak, gwara na olay cha si-kak i panakabalin Criston ontolong cha si-kak. 10 Isonga, maradsahak angken ekapsothak tan nakiyel-ingan chaak, angken edigathanak tan ngaaw i naimag ched si-kak tan chakel i problimak. Maradsahak angken nengoy naepasamak cha si-kak kagol na nainpansilbik cha Cristo. Tep no ekapsothak, agpayson mahedsangak.
Sema Semek Paul Cha Gwara Ired Ma Corinth Tan Sema Pengisahit Tod Si-kara
11 Singen inges toak na toon egwenggweng kagol niyay a ki-tek ko, nem si-kayoy emilithak a a-magen ko jay. Tep si-kayo komay engitakchel cha si-kak ired ma naengowan na ngaaw maypangkep cha si-kak, nem eg joak tiyakchelan. Amta yo i angken nagwariy silbik, nat ebabaak pay laeng iy say sema iren nat podnon apostolis a naengowan i kahejangan ira. 12 Tep mita yo i podnoak a apostolis kagol na sinjal tan kaskasdaaw tan milagron inpa-mag Afo Chiyos cha si-kak iy gwaraak cha kad-an jo. Naemasigak a naimag ko ira jay a emiin angken nadiya-da-kaman koy digat kagol na nainpansilbik cha Cristo. 13 Sema imag kon mapteng cha si-kayo, ampet siya iy nat inges to ngo ma imag kod echom a gropon naemati? Sema iyan-afilan to bengat, eg tahejo piyadigat tep ekak inbaged si-kayoy kasepolan ko. Nem no basol ko man, pakawani yoak!
14 Niman ma, esaganaak a manbisited si-kayod tan, et sejay diy maykatdon biyahik ded tan. Ekak pay manbeked si-kayo na kasepolan ko. Tep say piyan ko, nat seta kokowa yo, no diket si-kayo ngon mismo. Tep singen anak tahejo, et nat sema aanak i mengi-kan cha awecha ni inecha, no diket sema awa ni inay mengi-kan cha aanak cha. 15 Banay koma ngoy chadsak ko no a-posen kon emiin i gwara ngod si-kak tan osalen kon emiin i kedsang kon ontolong cha si-kayo. Angken manda-da-toy semek kod si-kayo, singen mankekesay i semek jo ngod si-kak.
16 Amta yo wa i podno i ekak iyanbaged si-kayo na kasepolan ko, nem gwara pay cha si-kayod tan i naengowan i mathekalak tan iyaboso tahejo. 17 Nengo ayay inpasing kon engabosod si-kayo? Sema iren toon into-nok cha si-kayo, nakigwan jo emo i into-nok iren mengabosod si-kayo. 18 Si Titus ngay a iyawis kon onkowan chithan tan sema ahi tayod pamatin into-nok a kadgwa tho, ampet siya iy iyaboso ra kayo? Enchi met, tep man-inges kawin Titus. Mapteng i aramid tan kakara wi.
19 Kin jo emo i kigwan min emiin ira jay a menakchel na angel mid si-kayo. Nem nat podno tan. Miyan kona jay tep too kawin ekisa-kid Cristod sangoanan Afo Chiyos. Emiin a nakigwan mi tan naimag mi, para cha pengikedsang na pamati yon ensemek mi. 20 Kechanagak i no onkowanak ded tan, doktalan ko i gwariy jowan amagen ekak piyan. No seman, eg jo ngo piyan i a-magen ko. Doktalan ko emoy gwariy bakal, apal, bonget, tan sema naengidagwas na angel cha. Gwara emo ngo pay i omang, notnot, pahi-tek, tan kolo. 21 Kechanagak pay i no onkowanak mowan chithan, baingan toak mowan Afo Chiyos kagol na naimag jon ngaaw. Et ma-ngosak a pasiya kagol na chakel a iyanbasol nontan da iy eg pay laeng ira iyanbabawi na nainpangamag cha na ensekig tan sema nainpakicharog ched nat imbaliy cha tan sema nainpangonod cha na ngaaw a piyan na angel cha.