Si Paul Tan Sema Iren Nat Podnon Apostolis
11
Pangaasi yo, anosi yoy konen kod si-kayo angken singen egwenggwengak a naengisodsodsod na olay na angel ko. Enti anosi yoak pango. 2 Tep sema edem kod si-kayo, inges to ngoy edem Afo Chiyos ired ma iyayka-chom cha si-katho. Tep may-arig kayod marikit a inkarik a mekiimbaliy cha sa-sa-kin imbaliy ton si Cristo. Isonga, nabiyanbantayan tahejo say edinis kayo no akow na pankasal jo. 3 Nem kechanagak i mesaol kayo emon maybalnay kayod afil et iolay joy ainposoan a semek jod Cristo. Et may-arig kayod Eve a esaol babaen na kinatakal na oleg. 4 Tep no gwariy echom a nakimowan chithan a mengaskasaba, inam-ay a naigwat joy nakigwan cha maypangkep Jesus angken afil chiwa nainkaskasaba wi. Et inam-ay pay a naigwat jo ma ispiriton nainkasaba ra angken afil chiwa Ispirito Santon igwat jo nonta emati kayod Cristo. Et inam-ay pay a napiyati yoy naintoro cha angken nat sema mapteng a chamag a intoro wi. 5 Setan iren too, nakigwan cha i si-kariy kahejangan a apostolis, nem cha nemnem ko, nat ekayang ira iy say si-kak. 6 Nat edaingak emod pan-a-sel ko a inges toy nakigwan cha, nem nat naiyankolangak na amtak maypangkep Afo Chiyos. Et amta yo i podno jay a kowan kona tep sini-si-neng jo waliy emiin a ima-imag mi.7 Nonta intorok cha si-kayoy mapteng a chamag a edafod Afo Chiyos, ekak inbaga i dagboan joak. No diket inbabak i angel kon man-obda na panbiyagan ko say mebedin a maykayang kayo no patien jo ma mapteng a chamag. Basol ko aya ma imag ko? 8 Nonta gwaraak chitha kad-an jo, singen mankikibothak ired ma gropon ematid echom a dogad tep si-kariy naengi-kan na tolong cha si-kak iy say si-kayoy naiyansilbian ko. 9 Nonta iyan-iyanak chithan ket, kolang i mesepol ko, nem ekak iyanbaged si-kayo. No diket sema iren aahi thayod pamatin edafod Macedonia, inmothok chiy mesepol ko. Isonga, eg tahejo polos piyadigat maypangkep na kompormi nontan da, et eg tahejo ngo pay pedigathan alin polos. 10 Nagwariy mengisalcheng na pengiki-ki-tek ko na dibchiy pengaskasabak na mapteng a chamag tep ekak manbaga-baga na tolong cha si-kayo ono echom a too ired ma siyo-siyodad cha Achaia. Sejay a kowan kona, podno tep gwared si-kak si Cristo. 11 Kin jo emo i chafot ekak piyan a manbaga na tolong jo, eg tahejo ensemek. Nem amten Afo Chiyos i ensemek tahejo!
12 Nem itolo-toloy kon nat manbaga na tolong jo say seta iren toon nat podnon apostolis, nat mebedin a onki-tek ira na sema pansilbi ra ket, inges toy pansilbi wi. 13 Tep sema toon inges cha tan, nat podno iren apostolis, no diket naenaol na too tan nainbili-biling chen podno iren apostolis Cristo. 14 Nat masdaaw kiya koma maypangkep nithan tep angken si Satanas, mebedin a manparang a singen mandingsin anghil Afo Chiyos. 15 Et no mebedin a a-magen Satanas iwan, nat kaskasdaaw no seta iren naiyansilbid si-katho, mebedin ngon manparang a singen bagaen Afo Chiyos a naiyantoro na kinachonong. Nem say panbanagan to di, mechosa ira ngo, tan sema chosa ra, maybagay cha ngaaw a imag cha.
Inki-tek Paul Iwa Diga-digat To
16 Pidgwaen ko mowan i nat konen jo koma i egwenggwengak tep nainsodsodsod koy angel ko. Nem angken no setan i konen jo, anosi yoak pango nin, et iki-ngeli yo ira jay a otik a iki-tek kon inges toy inpangi-ngel jod echom. 17 Sejay a nainpanki-tek ko, nat inges toy pengowan Afo Jesus, no diket sema toon egwenggweng. 18 Nem chakel chithan i naengiki-tek na kasasaad ched ja dobong, isonga mepidithak ngon manki-ki-tek. 19 Tep maradsak kayon man-anos iren ta toon egwenggweng. Ay, ara! Et nakigwan jo i edaing kayo! 20 Nainpanbalin cha kayon bagaen cha, naimpos chiy kokowa yo, tan naiyaboso ra kayo. Nainkayang chiy angel cha tan nabiyaingan cha kayo iy naiyan-ano-anos kayo pay laeng cha si-kara! 21 Kin jo emo i onbaingak koma iy nat etoledak a mengemag na ngaaw cha si-kayon inges to ira ta tood tan a nat podnon apostolis.
Nem say itoled chen iki-tek, si-katho ngoy itoled kon iki-tek–nem man-eeselak a singen toon egwenggweng. 22 No nakigwan cha i Hodjos ira, angken si-kak, Hodjoak ngo. No nakigwan cha i poli iren Israel, poli thoak ngo. No nakigwan cha i si Abraham i afo ra la, afok ngo si-katho. 23 No nakigwan cha i bagaen iren Cristo, bagaen toak ngon Cristo, nem sema nainpansilbik, mas mapmapteng iy say nainpansilbi ra. Singen egwenggwengak no man-eeselak a inges niyay, nem angkena. Mas masdoak pay a mansilbid Cristo iy say si-kara. Eminchakelak pay a iyaykalebos iy say si-kara kagol na obdak para cha Cristo. Nat mebedin a mebilang i sepdat na tood si-kak. Tan kanayon a chanchanin metiyak. 24 Emindimen siyepdat chaak na echom kon Hodjos na memintedon polo tan siyam. 25 Emintedon piyeg-as chaak. Pinsak a chintog chaak say bonoen chaak. Emintedon iyalned i bapor a iyandoganan ko. Tan pinsak a imayawak cha baybay na san-akow tan sandabi. 26 Naiyan-aha-aharak na olay cha doga-dogad, tan chakel i emanekot a diya-da-kaman ko. Gwara iriy barakan a kolos tan gwara iriy tolisan cha chida-chidan ko. Pidigat chaak na echom kon Hodjos, pati Gentiles pay. a Chakel pay i emanekot a diya-da-kaman ko ired siyodad tan dogad a nagwariy toon naiyan-iya-iyan tan cha baybay. Tan sema iren toon naengibili-biling i naemati ira, pidigat chaak pay ngo. 27 Edigat tan onbediy i obdak. Kanayon a nagwariy jo-kow ko. Inminge-mingel koy ofa tan ekow ko. Eminchakel a nagwariy kakanen ko. Iyak-aktelak pay, tan nagwariy ikalimotmot ko. 28 Tan nat setan bengat ira tep gwiya-gwa-gwen naedigathanak na nemnemnem na kasasaad iren ma naematid emiin a dogad. 29 Tep no gwariy ekapsot i pamati tho, naesahitan ngoy nemnem ko. No gwara pay i aawis a iyanbasol, nainbonget ko ma engawis niwan a toon iyanbasol.
30 Angken ekak piyan a onki-tek, epilithak. Isonga, say iki-tek ko, sema iren nainbiybiy to i nagwariy kabaalan kon mismo. 31 Si Afo Chiyos a Chiyos tan Awen Jesus a Afo thayo, amta tho i nat itek i nakigwan ko. Sapay koma ta mechejaw na ingked ingka. 32 Iistoriyak i sa-kin epasamak a mengibiybiy i nat on-anay i kabaalan ko. Nonta gwaraak cha Damascus, sema gobirnador a chiyotohan Ari Aretas, inpabantay to ma siyodad ired ma sosolcharo say chedmeten chaak. 33 Nem gwara iriy enolong cha si-kak. In-ejan chaak cha basket, et insa-kod chaak alid ma tawed tofing a ekayang a dinigwed to ma siyodad, isonga nahabetihak.