Sema Songbat Paul Ired Ma Iyandisjon Cha Si-katho
10
Si-kak a si Paul, gwariy iadok kod si-kayo. Itha konoy toon naengowan i ketahothak a mengibonget kayo no sisasangoak cha si-kayo iy etoledak bengat no mansolathak cha si-kayo. Nem niman ma, say pesing kon mekiadok cha si-kayo, ekombaba tan dododop a inges tos Cristo. 2 Say kowan iadok, pangaasi yo, pemapteng joy naimag jo say nat mesepol a ibiybiy koy kinatoled ko no onkowanak ded tan. Tep sigoradon ontoledak a mengibonget iren ta toon naengowan i say aramid mi tan pangkep mi ket, inges toy tothood ja dobong a eg ira naematid Afo Chiyos. 3 Podno chechan i too kawi bengat, nem say pandaban mi na ngaaw, nat inges toy too. 4 Tep say almas mi, nat naedafod too, no diket cha Afo Chiyos, tan seja almas, gwara ngoy panakabalin ton on-agwak na emiin a mahakontred Afo Chiyos. 5 Babaen niwa panakabalin, naigwak min emiin i pangbal na toon nabinekan ches Afo Chiyos tan sema kinapahi-tek chen naena-din na podnon pengamta ren Afo Chiyos. Et a-gwahen min emiin i nemnem na toon mahakontred Afo Chiyos say onoran na nemnem chiy piyan Cristo. 6 Et no ibiybiy jo walen jowan patia wes Criston kosto, chosaen mi ira ma gwared si-kayon eg to piyan pay a mematid si-katho.7 Say kamali yo, sema awas na too bengat i nasini-neng jo, nat sema poso tho. Itha ired tan i toon naengowan i si-kariy naengiriprisintar Cristo. Seta iren too, nemnemnemen cha koma mowan i kigwa-kigwan cha tep pinispis to kawi ngon Afo Chiyos a naengiriprisintar Criston inges to ira. 8 Tep angken singen esolok emoy kigwan ko maypangkep na karebengan mi, ekak kebaing tep si Afo Jesus i engi-kan, nat say chechalen miy pamati yo, no diket pekedsang mi. 9 Kowan kona jay say eg jo konen i piyan kon ta-kothen tahejo ired ma sola-solat ko. 10 Tep ithed tan i naengowan i “No mansolat si Paul, nainbiybiy toy karebengan to tan enbel-at i nakigwan to iy no gwared jay, ekapsot i kasi-neng to, tan say pan-a-sel to ket, nagwariy silbi tho.” 11 Sema iren naengowan nithan, nemnemnemen cha koma i sema insolat ko iy nagwaraak chithan, inges to ngoy a-magen ko no ithaak ded tan.
12 Nat piyan min iinges i angel mi ired ta naengiki-tek na angel cha. Singen kolang i nemnem cha. Tep kin cha i mapteng i naima-imag cha, tan nakigwan cha i sema iren aramid chiy onoran koma na echom a too. 13 Nem si-kawi, gwara wangoy naengingkaan na pengiki-tek mi. Tep nagwariy nainki-tek mi, malaksid niyay bengat a obden inpiyal Afo Chiyos cha si-kawi, et say pantoro wid si-kayo, iyayka-chom chiya obda. 14 Isonga, no toroan mi kayo, naimag mi ma engingkaan na obden inpiyal Afo Chiyos cha si-kawi tep iyayka-chom kayo wed jay. Tep sema podno, si-kawiy edagwas a kimowan chithan a engitorod si-kayo na mapteng a chamag maypangkep Cristo. 15 Nat nainki-tek miy obda na echom a singen si-kawiy engamag. Nem miyan namnamaa i onkedkedsang i pamati yo say mahatolong kayod si-kawi no onkowan kawin mantorod echom a dogad a iyay-echom ngod obden inpiyal Afo Chiyos cha si-kawi. 16 Say piyan mi, ikaskasaba wiy mapteng a chamag cha dogad a ar-aragwian iy say si-kayo, a nagwara pay i iyantoro. Tep nat piyan min iki-tek iwa imag na echom a singen si-kawiy engamag. 17 Tep iyaysolat cha esel Afo Chiyos i “Sema toon piyan ton onki-tek, iki-tek to komay imag na Afo.” a 18 Tep sema podnon naaapolbaran, nat sema naengiki-tek na angel to, no diket sema nainki-tek Afo Chiyos.