Sema Iren Mapteng A Panbanagan Na Pengi-kan
9
Amtak chechan i nat mesepol a mansolathak cha si-kayo maypangkep na alos para ired ma tothoon Afo Chiyos cha Jerusalem. 2 Tep amtak i piyan jon pasiyen ontolong, et setan i nainki-ki-tek ko ired ja naematid ja Macedonia. Kigwa-kigwan kod si-kara i si-kayon ithed Achaia, esagana kayo walen ontolong manipod nonta taw-on. Kagol na si-met jon menolong, seja iren gwa-gwa-chen naematid ja Macedonia, simi-met ngo ira pay a menolong. 3 Nem kowan ito-no ngorechan ires Titus chithan say tolongan cha kayo. Kowan amaga man say amtaen na too i podnoy nainki-ki-tek ko maypangkep cha si-kayo, et say esagana ta alos jon inges toy kigwan ko. 4 Nahol ni no gwariy naematid ja Macedonia a may-odop cha si-kak ded tan et doktalan cha i nat esaganay alos jo, onbaingak a pasiya. Et mas onbaing kayo pay tep inki-tek mi wala i insagana yoy alos jo. 5 Isonga, niyemnem ko i mapteng no ito-nok a medebas ira ja aahi tayod pamati say tolongan cha kayon mengisagana na inkari yon alos jo, et say esagana wala no onmothok kawi led tan. Tep no setan, amtaen na too i engi-kan kayo tep piyan jo ngo, nat epilit kayo.6 Nemnem jo jay. Sema naengitanem na otik, otik ngoy enien to. Nem sema naengitanem na chakel, chakel ngo pay i enien to. 7 Isonga sa-ki tan sa-ki, nemnemnemen to koma no piyay i-kan to. Nat mapteng no tepien toy i-kan to ono mepidit a mengi-kan. Tep ensemek Afo Chiyos iwa maradsak a mengi-kan. 8 Et kabaalan Afo Chiyos a mengi-kan na emiin a mapteng cha si-kayo say nat sema mesepol jo bengat i gwara na olay cha si-kayo, nem esolok pay say mebedin a mengemag kayo na mapteng cha echom. 9 Tep setan i inges ton iyaysolat cha esel Afo Chiyos a:
“Maikan cha iyangkebitheg.
Isonga, maynemnemnem i kinamapteng to na ingked ingka.” a
10 Tep si Afo Chiyos a naengi-kan na bothil chiwa mengitanem tan mekan chiwa mengan, si-kathoy naengi-kan tan naengipachakel na itolong jod echom. Tan ipachakel to pay i mapteng a panbanagan na nainpangi-kan jo. 11 A-choman to ngo pay i emiin a gwared si-kayo say onchake-chakel pay i kabaalan jon mengi-kan cha echom. Et sema panbanagan na pengi-kan jo, chakel i mansalamat cha Afo Chiyos kagol na alos jon a-daen mi led si-kara. 12 Tep sema pengi-kan jo, nat para cha tolong iren ma toon Afo Chiyos bengat a naiyankolang, nem si-katho pay i kagol a chakel i mansalamat cha Afo Chiyos. 13 Tep sema pengi-kan jo, nainpaamta tho pay i podnoy pamati yo. Isonga, chakel i manchejaw cha Afo Chiyos tep amtaen cha i naiyonoran joy mapteng a chamag maypangkep Criston ingwanggwang jo i napiyati yo. Chejawen cha pay si Afo Chiyos kagol na banay a tolong jod si-kara, pati echom a too. 14 Et ikararagan cha kayo pay, tan on-esop i poso red si-kayo tep amtaen cha i sema banay a kinamapteng jod si-kara, si-kathoy panbanagan na epaladon kaasin Afo Chiyos cha si-kayo. 15 Isonga, mansalamat kiyed Afo Chiyos tep sema rigalo thod si-kathayo, nagwariy kay-ingesan to.