Menolong Koma Na Olay Ira Ma Naemati Iren Ma Mandigat
8
Niman, si-kayon aahik cha pamati, piyan min ipaamted si-kayo ma mapteng a imag iren ma gropon naematid ja Macedonia kagol na kaasin Afo Chiyos cha si-kara. 2 Tep angken epaladoy digat cha, epalado ngoy chadsak cha. Et kagol na chadsak cha, epalado pay ngoy intolong cha angken nagwaren polos ngoy kebedinan cha. 3 Et kowan tistigoi i sema in-i-kan cha, nat seman a mebedin bengat a i-kan cha, nem esolok pay. Nagwariy emilit ira, no diket si-kara ngoy emiyan. 4 Say kasi-nengan to, iyanpakpakaasi iren itolok mi chen mekitolong ired ma toon Afo Chiyos a mandigat cha Jerusalem. 5 Sema imag cha, mas esolok pay iy say sema niyamnama wi. Tep nat si-katho bengat a in-i-kan cha ma banay a tolong, nem indagwas cha ngon inpiyal chiy biyag ched Afo Chiyos tan cha si-kawi pay say tolongan cha kawi. Tep iyamta ra i seman i piyan Afo Chiyos. 6 Isonga, kagol a si Titus i engipanemnem a sigod i peni-nop na alos, kigwan mid si-katho i on-oli ded tan say tolongan to kayon mengcheng na peni-nop nitha alos jon kasi-nengan na kinamapteng jo. 7 Agpayson nagwariy kolang jo. Tep mahedsang i pamati yo, edaing i pan-a-sel jo, tan banay i pengamta yo. Masdo kayo ngo pay a mansilbi, tan banay i semek jod si-kawi. Isonga, ipahat jo pay i kababaalan jon mengibiybiy na kinamapteng jo ired ma mandigat babaen na penolong jod si-kara.8 Nat kowan kona jay say pidithen tahejon menolong. Kowan ipaamta bengat cha si-kayo i imag na echom a piyan chen menolong say sema si-met jo ket, no inges to ngoy si-met cha, ipaamta tho i ainposoan pay i semek jo. 9 Tep amta yoy kinabanay na kaasin Jesu Criston Afo thayo. Angken baknang a pasiyes Cristod dangit, iyanbalin na ebitheg nonta iyanbalin na tood ja dobong para cha panmaptengan tayo. Kagol niwan a kinabitheg to, mebedin ngon onbaknang kiya na aispiritoan a bindisjon. 10 Isonga sejay i nemnem ko maypangkep nitha alos jo. Mapteng no kekchengen jo niman ithan a inchogi yo na taw-on. Tep si-kayoy pilmiron iyannemnem a mengi-kan na tolong, tan si-kayo ngo pay i pilmiron engichogin meni-nop. 11 Isonga, kecheng jo niman say sema si-met jon mengcheng na plano yon mengi-kan, inges to ngoy si-met jon mengichogi. I-kan joy maybagay cha kebedinan jo. 12 Tep no onsi-met kiyen mengi-kan, kaimdeng si Afo Chiyos niwa mebedin a i-kan tayo. Eg to namnamaen i nat mebedin a i-kan tayo.
13 Nat piyan kon a-seden i i-kan jo komay tolong jod echom ingkathod si-kayo ngoy mandigat. Say piyan ko kitdi, mandidina-kam kayo. 14 Kagol na gwara wiy sobda yo, mapteng no tolongan jo ira ma mankokolang say no onmothok aliy akow a onkolang kayo ngo, tolongan cha kayo ngo na sobda ra. Tep no mandidina-kam kayo, nagwariy mankolang. 15 Inges toy iyaysolat cha esel Afo Chiyos maypangkep na inpangisi-si-nop na Hodjos na kakanen chen edafod dangit a kigwan tod man i:
“Sema eni-nop na chakel, nagwariy sobda tho
iy sema ngon eni-nop na otik, nagwariy kolang to.” a
Into-non Paul Ires Titus A Manbantay Na Peni-nop Na Tolong
16 Mansalamathak cha Afo Chiyos tep sema semek Titus cha si-kayo, inpan-inges Afo Chiyos cha semek kod si-kayo. 17 Tep nonta inbaga wid Titus no mebedin a onkowan mowan chithan, kesi-met a pasiya tep gwara waliy plano thon bisitaen to kayo. 18 Et sema toon pekiolop mid Titus, ahi tayod pamatin narinispiktar na emiin a gropon naemati kagol na nainpankasaba tho na mapteng a chamag. 19 Tan nat setan bengat, nem si-katho pay i pinispis ira na gropon naematin may-odop cha si-kawi no a-daen mi led Jerusalem iwa itolong jo, pati sema tolong na echom a naemati. A-magen mi man say mechejaw si Afo Chiyos et say ipasi-neng miy si-met min ontolong na echom. 20 Natiyanchaanan miy maypangkep na peni-nop tan pengegni wi niyay a banay a tolong say nagwariy mengowan i ngaaw i naimag mi maypangkep niyay. 21 Tep piyan min kostoy pengemag min jay, a nat cha nemnem Afo Chiyos bengat, nem cha tothoo ngo pay.
22 Gwara pay i sa-kin ahi tayod pamatin pekiolop mid Titus. Sini-si-neng mi ja too, et tistigoan min masi-met na olay a mansilbid Afo. Et niman piyan ton pasiyen onkowan chitha kad-an jo tep banay i nainpamiyal tod si-kayo. 23 Si Titus, naekiobded si-kak a naiyansilbid si-kayo. Et seja iren aahi tayon mengadgwed Titus chithan da, si-kariy naengiriprisintar na gropon naematid jay, et naechayaw si Cristo kagol cha si-kara. 24 Isonga, ibiybiy joy semek jo ired ja aahi tayo say amtaen na emiin a naemati i podnoy semek jo tan podno ngoy nainki-ki-tek ko maypangkep cha si-kayo.