2 Pangaasi yo, ibiybiy jo ngoy semek jod si-kawi tep nagwared si-kayoy engamagan mi na ngaaw, nagwariy chichal min too, tan nagwariy iyabo-aboso wi. 3 Nat kowan kona ira jay say ipabasolan tahejo. Tep kigwan ko wala i ensemek mi kayon pilmi. Isonga, angken no manbiyag ono metiy kiya, nat onkapkapsot i semek mid si-kayo. 4 Sigoradoy piyal kod si-kayo, et nainki-tek tahejod echom. Naiyaypakedsang i nemnem ko, et angken chakel i diga-digat mi, epalado ngo chechan i chadsak ko kagol na inki-ngelan ko maypangkep cha si-kayo.

5 Tep angken nonta mimothok kawi alid ja Macedonia, nagwara pay i inana na angel tan nemnem mi tep diya-ka-da-kam miy chakel a digat. Tep gwara iriy engonkontred si-kawi, tan chakel i tiko-tikothan mi. 6 Nem si Afo Chiyos a naengipakedsang na nemnem na toon edismaya, inpakedsang toy nemnem mi nonta mimothok alis Titus chiyay. 7 Tan nat sema inmothok Titus bengat i engipakedsang na nemnem mi, nem sema ingwanggwang to pay cha si-kawi maypangkep na inpangikedsang jo na nemnem to. Tep kigwan to i piyan jo konon pasiyen metaen joak tan iyanbabawi kayo na ngaaw a ima-imag jo nontan. Kigwan to pay i esagana kayo konon chilin mengitakchel ired ma naiyandisjon cha si-kak. Isonga mas inpachadsak toak pay.

8 Tep angken inpa-ngos to kayo niwan a solat ko nontan, ekak iyanbabawi na insolat ko. Iyanbabawiak chechan nonta iyamtaan ko i imengos kayo angken mageno bengat i ingka-ngos jo. 9 Nem niman maradsahak ma. Nat maradsahak tep iya-ngos kayo, no diket maradsahak tep seta iyanbanagan na engos jo, seta inpanbabawi tan inpanbalbaliw jo. Seta engos jo, iyaybagay cha piyan Afo Chiyos. Isonga sema solat ko, para cha panmaptengan jo. 10 Tep sema engos a iyaybagay cha piyan Afo Chiyos, nainpababawi thoy too, et nainpabalbaliw to. Say panbanagan to ket, kaysalakanan, isonga seman a engos, nagwariy mengibabawi. Nem sema engos na toon nat naemati, eg to ira panbabawi, tan eg to ira panbalbaliw. Isonga, say panbanagan to, pathiy a chosen nagwariy pengingkaan to. 11 Sema engos a iyaybagay cha piyan Afo Chiyos, nemnem jo i mapteng a panbanagan to wed biyag jo. Jowan ipaha-pahat men ibiybiy i kostoy jowan amaga. Kebonget kayo tep iyanbasol itha echom jon naematid tan, et ketahot kayo emon mayka-chom a mechosa. Piyan jon pasiyen mansingsingpet kiya cha. Kaagag kayo pay a menosa na kosto ta iyanbasol. Sema emiin a naimag jo, nainbiybiy to i nagwariy iyanbasolan jo maypangkep na basol nithan a tood tan. 12 Isonga, kagol na iyansolathan kod si-kayo, nat kagol nitha toon iyanbasol bengat ono seta ngon toon iyaybasolan. Iyansolathak say ipaamtaan jo i banay i semek jod si-kawid nemnem Afo Chiyos. 13 Isonga, iyaypakedsang i nemnem mi.

Et nat sema iyaypakedsang bengat i nemnem mi, nem dima-to pay i chadsak mi nonta mita win maradsak ngos Titus tep inbiybiy jon emiin i nagwara wiy kagol a panchanagan tod si-kayo. 14 Tep nontan da, inki-tek mi kayod Titus, et nat ebainganak kagol na kigwan ko. Tep iyaypaamta i sema inki-tek mi maypangkep cha si-kayo ket, podnon inges toy podno ngoy emiin a kigwa-kigwan mid si-kayo. 15 Mas banay pay miy semek Titus cha si-kayo tep naniyemnemnem to i piyan jon emiin a a-magen i kigwan to tan rinispiktar jo kagol na tahot jon manbesol kayo emod Afo Chiyos. 16 Et niman ma maradsahak a pasiya tep amtak ma i mebedin a piyalen tahejon kosto-kosto.