Sema Solat Paul Ired Ma Gwared
GALATIA
1
Si-kak si Paul a apostolis. Sema engi-kan na karebengan ko tan sema enotok cha si-kak a manbalin na apostolis, nat too, no diket si ira Jesu Cristo tan si Afo Chiyos a Aweton engipawil cha si-katho. 2 Sejay i solat kod si-kayon naematin naekichayaw cha Galatia. Sema iren echom kod jay a naemati, mekikomosta kawin emiin cha si-kayo. 3 Sapay koma ta gwared si-kayoy kaasi tan talnen naedafod Afo Chiyos a Awa thayo tan si Jesu Criston Afo thayon 4 engi-kan na biyag to say mepekawanan i basol tayo et maybolos kiyed ma ngaaw a gwared ja dobong niman. Sejay a inpasing Cristo, si-kathoy piyan Afo Chiyos a Awa thayo. 5 Sapay koma ta mecheja-chejaw si Afo Chiyos na ingked ingka. Amen.Sa-ki Bengat I Mapteng A Chamag
6 Iyasdaawak a pasiyed si-kayo tep jowan beneki konon chakos si Afo Chiyos a ena-gway kayo babaen na kaasin Cristo. Jowan onori liy afil a toron kin jo i mapteng a chamag. 7 Say podno, nagwariy echom a mapteng a chamag tep sa-ki bengat. Nem gwara kono ira ma naeningod si-kayo tan naengiparas a ondoman niwa mapteng a chamag maypangkep Cristo. 8 Kowan banchaani kayo i angken si-kawi ngo ono anghil a edafod dangit a mengikaskasaba na afil cha mapteng a chamag a nainkaskasaba wid si-kayo nontan, sapay koma ta mechosed inpiyirno na ingked ingka. 9 Sejay i kigwan mid si-kayo nontan, nem ipidgwak ngorechan a no gwariy mengikaskasaba na afil cha mapteng a chamag a chingel jon sigod, sapay koma ta mechosed inpiyirno na ingked ingka. 10 No nemnemnemen jo i nakigwan ko, egwathan jo i sema piyan ko, nat sema apolbar na too, no diket sema apolbar Afo Chiyos. Nat kowan ipahat say mepnek i tood si-kak. Tep no seman ma, nat mebedin a mansilsilbiak cha Cristo.
Sema Penakchel Paul Na Kinaapostolis To Tan Sema Kinapodno Na Inkaskasaba Tho
11 Aahik, piyan kon egwathan jon pasiya i sema mapteng a chamag a inkaskasabak cha si-kayo, nat edafod ma nemnem na too. 12 Tep nat chiwa tooy engamtaan kon jay a mapteng a chamag. Nagwariy engitorod si-kak, no diket si Jesu Criston engipaamted si-kak.
13 Chingel jo pay i sigod a panbiyag ko nonta kowan onoriy ogadi na Hodjos. Amta yo i palado pay i engipadigat ko na toon Afo Chiyos a ematid Jesu Cristo, tan inpaha-pahat koy kabaalan ko say mepokaw koma ira ma ematid si-katho. 14 Edagwasak pay iy say chakel a echom kon Hodjon kaidaran kon engonod na rilijon mi, tan paladon inpahat kon mengonod na ogadi iren ma afo-afo wi la.
15 Nem say planon Afo Chiyos cha si-kak, afil. Tep angken nonta aneng i ingkay-anak ko, pinispis toak da, et babaen na kaasi tho, tiya-gway toak a mansilbid si-katho. 16 Idi mimothok i timpo na piyan ton ibiybiyan toak na Anak to tep say ikaskasabaan kod Gentiles, a nagwaren polos a tooy timbal ko maypangkep niyay. 17 Ekak pay kimowan cha Jerusalem a mekitbal ired ma apostolis a edagwas iy say si-kak, nem kimowanak kitdin chakos cha Arabia, et imoliak cha Damascus.
18 Idi epalabas i tedon tawen, kimowanak cha Jerusalem a memisiten Peter, et iyan-iyanak cha si-katho na sawal na dimen akow. 19 Nagwariy mitak a echom a apostolis, malaksid si James bengat a ahin Jesu Criston Afo thayo. 20 Kowan ipodnod sangoanan Afo Chiyos i seja kowan isolat cha si-kayo, nat itek. 21 Idi iyakcheng iwan, kimowanak cha sahop na Syria tan Cilicia. 22 Nontan a timpo, sema iren gropon ematid Criston gwared Judea, eg chaak pay mita-mita. 23 Gwara bengat i chimag chen sema emadi-padigat cha si-kara nontan, towan ikasaba niman i pamatin inparas ton menagwara. 24 Isonga, chijaw ches Afo Chiyos maypangkep cha si-kak.