Igwat Iren Ma Apostolis Si Paul A Echom Chen Apostolis
2
Idi epalabas i sawal na epat a tawen, kimowanak mowan cha Jerusalem a kiyadgwaan toak Barnabas. Iyodop mi pay si Titus. 2 Kimowanak chiwan tep inpaamten Afo Chiyos cha si-kak i seman komay pesing ko. Idi mimothok kawi, iyaspol ko ira ma iyaybilang a naengibalnay na emati bengat, et in-iksplikar kod si-kara i mapteng a chamag a nainkaskasabak ired Gentiles. Inpasing ko jay say amtaen cha i kosto ma kowan itoro-toro, nahol ni sema nainkaskasabak manipod nontan ingked niman, nagwariy silbi tho. 3 Say iyanpa-noan to, iyannanamongan cha ma kigwan ko tep angken sema kadgwak a si Titus a Gentile, a eg ira emasig a manpakogit angken nakigwan na echom i mesepol a mekogit. b 4 Tep gwared man iriy echom a naengibili-biling i emati ired Cristo. Ekika-chom ired si-kawi say amtaan chiy maypangkep na gwaya-gwayen gwared si-kathayo kagol na pamati thayod Cristo Jesus. Tep say piyan cha, pidithen cha kiyen mengono-onod na dinteg Moses say manbalin kiya mowan na bagaen niwa dinteg. 5 Nem eg kawi timolo-tolok chiwa kigwan cha, angken kedpeng i timpo, say nat mesa-dathan iwa podnon toro maypangkep na mapteng a chamag a piyati yo.6 Si-karen iyaybilang a naengibalnay--ekak nabiniyangan i kasasaad cha tep si Afo Chiyos, eg to naindasin i kasasaad na sa-kin too--sema iren too, nagwariy in-echom ched ma kowan itoro-toro. 7 Tep iyamtaan cha i inpiyal Afo Chiyos cha si-kak i obda na pengikaskasabak na mapteng a chamag ired ma eg ekogit, a sema piyan ton a-seden i Gentiles, a inges to ngoy inpangipiyal tod Peter na obda na pengikaskasaba tho ired ma ekogit, a sema piyan ton a-seden i Hodjos. 8 Tep nabinindisjonan Afo Chiyos i kaskasabak cha Gentiles a inges to ngoy nainpamindisjon to na kaskasaben Peter cha Hodjos. 9 Isonga, si James, Peter, tan si John a iyaybilang a gwariy karebengan to, idi mita riy daing a in-i-kan Afo Chiyos cha si-kak, siyamanoan cha kawin Barnabas say ibiybiy mi i iyan-inawathan kawi maypangkep na obda wid Afo. Iyantothodagan mi i si-kawin Barnabas i mengitolo-toloy na pankaskasaba wid Gentiles iy say si-kara ngoy mengitolo-toloy na pankaskasaba red Hodjos. 10 Say piyan cha bengat a ibaga red si-kawi, itoloy min menolong na iyangkebitheg a Hodjos, et seman i koston sini-methan kon a-magen.
Sema Pengontren Paul Cha Peter
11 Nem idi kimowan alis Peter cha Antioch, c kiyontrak chiwa sangoanan na too tep masi-neng a ngaaw i inpasing to tep insalcheng ton ekipangan cha Gentiles. 12 Tep nonta pilmiron inmothok to, naekipangan cha aahi tayon Gentiles. Nem idi mimothok ira ma echom a Hodjos a echom James, idoniy ton insalcheng, et eg ma ekipangan ired ma Gentiles tep ketahot ired ma Hodjos a naengowan i mesepol a manpakogit i Gentiles. 13 Isonga, sema echom a ematin Hodjos, iyonoran ches Peter angken amta ra i nat kosto ma nainpasing cha. Angken si Barnabas, iyonoran to ngo i ngaaw a nainpasing cha. 14 Idi iyamtaan ko i nat chiyan onoriy podnon toro-toro niwa mapteng a chamag, kigwan kod Peter cha sangoanan chen emiin i “Angken podno ken Hodjo, biyaybayan moy echom a ogadi na Hodjos a singen Gentile ka. Isonga, eg mo koma pidithen i Gentiles a mengonod iren ma ogadi thayon Hodjos.” 15 Si-kathayo, iyay-anak kiyen Hodjos; nat Gentiles kiyen iyaybilang a managbasol tep eg cha onoran i dinteg Moses. 16 Nem amta thayo i nat pechonong Afo Chiyos i too tep naiyonoran toy dinteg, no diket pechonong Afo Chiyos i too tep naematid Jesu Cristo et setan bengat. Isonga, angken si-kathayon Hodjos, naemati kiya ngod Cristo Jesus say pechonong to kiyen Afo Chiyos kagol na pamati thayod Cristo, nat sema pengonod tayo niwa dinteg. Tep sema pengonod na dinteg Moses, nat polos a mebedin a mengipachonong na kompormin tood sangoanan Afo Chiyos.
17 Nem si-kathayon memiyan a pechonong to kiyen Afo Chiyos babaen na pamatid Cristo, no bilang i maybilang kiyen mabesol tep naemati kiyed Cristo bengat tan eg tayo wa pay naiyonoran iwa dinteg. Piyan to ayen a-seden i si Cristoy panbasolan na too? Enchi! Nat mebedin! 18 Nem no on-oliak a mengonod mowan niwa dinteg a binekan ko nontan, ipabiybiy ton mabesolak. 19 Tep idi pichas kon iyonoran iwa dinteg, igwathan ko wa i angken paladoy pengipahat ko, eg toak pechonong cha sangoanan Afo Chiyos. Isonga, ibilang ko i etiyak maypangkep na dinteg say manbiyagak ma para cha Afo Chiyos. 20 Ekipathiyak cha Cristod ma koros say singen nat si-kak i sibibiyag, no diket si Cristo wiy sibibiyag cha si-kak. Sema biyag ko wa niman, iyaybasar cha pamatik cha Anak Afo Chiyos a ensemek toak a engi-kan na biyag ton para cha si-kak. 21 Ekak nainbiyang i kaasin Afo Chiyos a inges to ira ma naemiyal na dinteg. Tep no mebedin a pechonong Afo Chiyos i too babaen na pengonod na dinteg, nagwara nowan miy silbi na ingkathiy Cristo.