Iyaybasar I Kaysalakanan Cha Pamatid Cristo, Nat Sema Pengonod Na Dinteg
3
Si-kayon gwared ta Galatia, eg kayo polos a mahaaw-awat! Masi-neng a gwariy eningo kayo say esaol kayo babaen na afil a toro. Niyana? In-iksplikar min pasiyed si-kayo i maypangkep na ingkathiy Jesu Cristod ma koros. 2 Igwan i sa-ki bengat a piyan kon ibaged si-kayon igwat jo ma Ispirito Santo tep piyati yoy dinteg Moses ono piyati yoy mapteng a chamag a inki-ngelan jo? 3 Ara! Eg kayo gayam polos a mahaaw-awat! Inchogi yoy biyag jo na Kristiyano babaen na panakabalin na Ispirito Santo, nem niman jowan iparas a mengitoloy na biyag jo na Kristiyano babaen na kabaalan jo ngo. 4 Emiin a digat a iyanosan jo tep iyayka-chom kayod Cristo, nagwara emo wiy silbi tho? Sapay koma ta gwara. 5 Nengoy kagol na engi-kanan Afo Chiyos na Ispirito Santod si-kayo tan sema ima-imag ton milagrod si-kayo? Imag to man tep tiyongpal joy dinteg Moses ono sema inpamati yo na mapteng a chamag a chingel jo?6 Nemnem jos Abraham. “Piyatin Abraham i kigwan Afo Chiyos, isonga inbilang Afo Chiyos a maronong.” a 7 Mesepol a egwathan jo i sema iren toon gwariy pamati tho, si-kariy iyaybilang a aanak Abraham. 8 Iyaypadtod esel Afo Chiyos i pechonong Afo Chiyos i Gentiles babaen na pamati ra. Kigwan Afo Chiyos iyay a mapteng a chamag cha Abraham nonta bayag da i “Kagol cha si-kam, Abraham, mabindisjonan i ketoo-tood kaili-ili.” b 9 Isonga, sema toon naemati, bindisjonan ngon Afo Chiyos a inges to ngoy inpamindisjon tod Abraham a ematid si-katho.
10 Nem emiin ira ma naemiyal na pemati red ma dinteg, mechosa ira tep iyaysolat cha esel Afo Chiyos i “Angken siyen toon eg to itolo-toloy a memati-pati na emiin a bilin a iyaysolat chiwa dinteg Afo Chiyos, mechosa na ingked ingka.” c 11 Masi-neng ma ngarod i nagwaren polos i pechonong Afo Chiyos tep napiyati thoy dinteg. Tep iyaysolat cha esel Afo Chiyos i “Sema toon pechonong Afo Chiyos kagol na pamati tho, gwared si-kathoy biyag a nagwariy pengingkaan to.” 12 Nem nat metongpal i dinteg babaen na pamati, no diket sema pengonod na bili-bilin to tep iyaysolat ngod ma esel Afo Chiyos i “Sema toon naengonod na emiin a bili-bilin na dinteg, gwared si-kathoy biyag.” d 13 Nem nagwaren polos i mebedin a memati na emiin a bilin chiwa dinteg. Nem angkena tep indibchi tho kiyen Cristod ma chosen Afo Chiyos nonta intolok ton maydansed ma koros a kasa-dat tayo. Tep iyaysolat i “Sema toon iyaybilay cha kejow, si-kathoy kasi-nengan na inpanosen Afo Chiyos cha si-katho.” e 14 Imag Cristo Jesus iwan say babaen cha si-katho, egwathen na Gentiles i bindisjon a kigwan Afo Chiyos cha Abraham, tan babaen na pamati tayod Jesus, egwathen tayoy Ispirito Santon inkarin Afo Chiyos.
Nat Omasen Na Dinteg I Karin Afo Chiyos
15 Aahik, mengiarigak cha sa-kin ogadi na too. No gwariy tolagan a epilmaan, nat mebedin a maomas ono ma-choman. 16 Inges to ngoy inkarin Afo Chiyos cha Abraham tan sema sa-kin poli tho. Kowan kona i sa-ki tep say kigwan tod esel Afo Chiyos, piyan ton a-seden i nat chakel a polin Abraham, no diket sema sa-kin poli thon si Cristo. 17 Say kowan kona, sejay a gwariy intolag Afo Chiyos cha Abraham babaen na kari tho. Isonga, sema dinteg a in-i-kan Afo Chiyos cha Moses nonta 430 tawen a epalabas ma, nat mebedin a omasen to ma tolagan tan sema karin Afo Chiyos. 18 Tep sema intawid Afo Chiyos, no egwathen na too tep napiyati thoy dinteg, eg to pay ngo egwathen tep inkarin Afo Chiyos. Nem igwat Abraham iwa intawid Afo Chiyos tep inkari wen Afo Chiyos.
Sema Silbi Na Dinteg
19 Nengo ngarod miy silbi na dinteg? In-i-kan Afo Chiyos i dinteg to say amtaen na too i mabesol ira tep eg cha piyati ma dinteg. Ontolo-toloy bengat iwan a dinteg ingkathod onmothok aliy polin Abraham a si Criston intoro na karin Afo Chiyos. Idi in-i-kan Afo Chiyos i dinteg to, engito-no na anghilis a mengowan cha Moses a engowan cha tothoo. 20 Nem idi inkari thod Abraham, nagwariy into-no tho, no diket si Afo Chiyos ngon chorog i engowan.
21 Piyan niyay a a-seden i say dinteg, maykontra ayed ma inkarin Afo Chiyos? Enchi! Nat mebedin! Tep no gwariy in-i-kan Afo Chiyos a dinteg a mengi-kan na biyag, mebedin men pechonong Afo Chiyos i too babaen na pemati thon ma dinteg. 22 Nem nat mebedin tep iyaysolat cha esel Afo Chiyos i emiin a too, iyaykalebos babaen na panakabalin na basol. Si-kathoy planon Afo Chiyos say sema inkari thon iyaybasar cha pamatid Jesu Cristo, may-i-kan bengat cha naemati.
23 Nonta aneng aliy timpo na pemati na tood Cristo, singen balod kiyen intora-torayan na dinteg ingkathod imothok alin Cristo et memati kiya wed si-katho. 24 Sema dinteg, may-arig cha toon naiyantoray na nga-nga tep singen intora-torayan to kiya ingkathod inmothok Cristo et say maypachonong kiyed sangoanan Afo Chiyos kagol na pamati thayod Cristo. 25 Nem niman a mimothok si Cristo et emati kiya wed si-katho, nat mesepol ngon itorayan to kiya na dinteg.
26 Isonga, iyaybilang kayon emiin a anak Afo Chiyos tep iyayka-chom kayod Cristo Jesus babaen na pamati yo. 27 Tep memati kayo wed Jesu Cristo, et ebonjagan kayon kasi-nengan to i ekika-chom kayo wed si-katho. Isonga, singen inbaro yos Criston inges toy baro. Say piyan ton a-seden, jowan onori wiy ogadin Cristo. 28 Nagwariy iyan-afilan na Hodjos tan Gentiles, bagaen tan nat bagaen, dahi tan bii tep sa-ki kayo wen emiin tep ekisa-ki kayo wed Cristo Jesus. 29 Et no ekisa-ki kayo wed Cristo, iyaybilang kayo wen polin Abraham, tan tegwiren joy inkarin Afo Chiyos cha si-katho.