3 Mechejaw si Afo Chiyos a Chiyos tan Awen Jesu Criston Afo thayo tep si-kathoy mahaasin Awa thayo tan Afo Chiyos tayon naedafoan na emiin a tolong. 4 Natiyolongan to kiyed emiin a diga-digat tayo say mahatolong kiya pay na echom a gwariy digat cha. Tep say tolong Afo Chiyos cha si-kathayo, si-katho ngoy maosal a menolong na echom. 5 Tep angken epaladoy naingkadigat tayon inges toy ingkadigat Cristo tep ekisa-ki kiya wed si-katho, epalado ngoy tolong a nain-i-kan Afo Chiyos cha si-kathayo kagol Cristo. 6 Isonga, no da-kaman miy diga-digat, para cha panmaptengan jo tan kaysalakanan jo. Tan no tolongan to kawin Afo Chiyos ket, para ngod panmaptengan jo tep amta wi wen tolongan mi kayo say mahaanos kayo na diga-digat a inges toy diga-digat mi. 7 Isonga, sigoradon chiliy namnama wi maypangkep cha si-kayo tep amta wi i no da-kaman jo ngo ira ja diga-digat a miyan da-kama, tolongan to kayo ngon Afo Chiyos a inges to kawi.

8 Aahid pamati, piyan min ipaamted si-kayoy diga-digat a diya-kam mid probinsiya na Asia. Sema diga-digat mi ket, enbel-at a pasiya ingkathod singen nat mahamingel mi tan nagwariy namnama win manbiyag. 9 Et kin mi i mimothok miy timpo na ketiy mi. Nem epasamak iwan say nat si-kawin chorog i panchinedan mi, no diket si Afo Chiyos a kebedinan ton mengipawil na iyangketiy. 10 Tiyolongan to kawin Afo Chiyos, isonga dimesot kawid ja epaladon diga-digat a chanchanin kagol na ketiy mi, et tolongan to kawi pay no sa-ki din akow. Si-kathoy iyansigoradoan min itoloy toy tolong cha si-kawi. 11 Jowan tolongi kawi pay cha pankararag jo. Et no songbathan Afo Chiyos i chakel a kararag jo et bindisjonan to kawi, chakel ngoy mansalamat cha si-katho.

12 Gwariy mebedin a iki-tek min amta thayo i podno. Sejay. Sema ogadi wid emiin a too, mapteng, agdalod si-kayo. Sema pangkep mi ket, kosto, tan nagwariy ite-itek cha kigwan mi tan imag mi tep si Afo Chiyos i naengitorong cha si-kawi. Emiin a ima-imag mi, nat iyaybasar cha daing na too, no diket cha kaasin Afo Chiyos. 13-14 Sema insola-solat mid si-kayo, nagwariy iyay-emot a banag to tep inam-ay a mebesa tan ma-gwathan. Amtak i eg jo pay laeng egwathan na kostoy nemnem mi tan aramdi mi, nem namnamaen ko i egwathan jo na kolpi no sa-ki din akow. Et no akow a onkowan mowan alis Jesus a Afo thayo, sema pengiki-tek jod si-kawi, inges to ngoy pengiki-tek mid si-kayo.

15 Sinigoradok a igwathan joy pangkep ko et on-imdeng kayo komen si-nengen joak, isonga niyemnem kon bisitaen tahejo na meminchegwa say meminchegwa kayo ngon mebindisjonan. 16 Say sigod a planok, manchedanak cha kad-an jo no onkowanak ded Macedonia. Et no on-oliak alid Macedonia, manchedanak mowan alid kad-an jo say cha-chaan joak na biyahik cha Judea. 17 Nem nat intoloy ko man a planok, isonga kin jo emo i inam-ay a nasiya-dathan koy nemnem ko. Nakigwan jo emo i naimag koy planok a inges toy toon naiyannemnem na panmaptengan cha ngo bengat a nakigwan cha i “ahow,” nem inam-ay a nasiya-dathan cha na “enchi” gayam. 18 Nem nat semanak. Naepiyal si Afo Chiyos tan inges toak ngo. Ekak nakigwan i “ahow” et “enchi.” 19 Tep say si Jesu Criston Anak Afo Chiyos a nainkasaba win Silas tan si Timothy cha si-kayo, nat nakigwan to i “ahow” niman tan “enchi” no megwa-gwa, no diket natiyongpal Criston emiin i nakigwan to. 20 Tep emiin a inkarin Afo Chiyos, etongpal babaen Jesu Cristo. Isonga, babaen Cristo, nakigwan tayo i “Amen, podnoy kigwan Afo Chiyos.” Et no konen tayo man, nachijaw tayo pay si Afo Chiyos. 21 Si Afo Chiyos mismoy naengikedsang na pamati wid Cristo tan inges to ngod si-kayo, et pinispis to kiyen mansilbid Cristo. 22 In-i-kan to pay cha si-kathayoy Ispirito thon sinjal a tothoo tho kiya. Sema nainpan-iyan na Ispirito thod si-kathayo, si-kathoy naengipaamta i sigoradon tongpalen Afo Chiyos a emiin i inkari thod si-kathayo.

23 Niman ma, konen koy kagol a eg tahejo binisita. Et amten Afo Chiyos i podnoy konen ko. Ekak kimowan cha kad-an jod Corinth tep mesepol emon ibonget tahejo, et ekak piyan a onsahit i nemnem jo. 24 Nat piyan kon a-seden i gwariy karebengan min mantoray na pamati yo tep mahedsang miy pamati yo. Piyan mi kayo bengat a tolongan maypangkep na pengonod jod Cristo say koston onchadsak kayo.