2
Isonga, niyemnem ko i nat onkowanak chithan na maykafidgwa tep ekak piyan a onsahit mowan i nemnem jo. 2 Tep siya wangoy mengipaimdeng cha si-kak, no nat si-kayo? Et nengo wangoy pesing jon mengipaimdeng cha si-kak no ipasahit koy nemnem jo? 3 Isonga, insolat kod si-kayo nontan say isingpet jo nin i naimag jo. Et say no onkowanak ded tan, nat onsahit i nemnem ko maypangkep cha si-kayon mengipaimdeng komed si-kak. Tep sigoradoak a no maradsahak, mekichadsak kayo ngon emiin cha si-kak. 4 Isonga, nonta insolat kod si-kayo man, enbel-at a pasiyay nemnem ko tan nimangi-nangisak tep epaladoy sahit na nemnem ko. Nem nat iyansolathak say paengos tahejo, no diket ipaamtak i banay i semek kod si-kayo.Sema Iren Ematid Corinth, Mesepol A Pekawanan Cha Ma Echom Chen Iyanbasol
5 Seta toon iyanbasol chithan, nat si-kak bengat i inpaengos to, no diket si-kayo pay--nem nat si-kayon emiin. Kowan kona i nat emiin kayo tep nat piyan kon ida-kad i basol nitha too. 6 Sema chosen iyantabtabalan na gwa-gwa-ched si-kayo, imanay med si-katho. 7 Niman mesepol a pekawanan jo, et pekedsang joy nemnem to, nahol ni ma-ngos a pasiya, et oltimon medismaya. 8 Isonga, pangaasi yo, ibiybiy jo mowan i semek jod si-katho. 9 Say sa-kin kagol a engisolathan kon man, piyan kon parasen kayo say amtaen ko no patien joy toro-toron Cristo maypangkep na emiin. 10 Amtak men imag joy kigwan ko, isonga no ithed tan i piyakawanan jo, pekawanan ko ngo wa. No ithed tan pay i mesepol a pekawanan ko, piyakawanan ko wed sangoanan Cristo para cha panmaptengan jo. 11 Imag ko man say nat egwahen to kiyen Satanas tep amta thayon pasiyay ngaaw a kakara tho.
Sema Chanag Paul Cha Troas
12 Nonta kimowanak cha siyodad na Troas a mengaskasaba na mapteng a chamag maypangkep Cristo, insagana walen Afo Chiyos i tothood man a manki-ngel na toro-torok. 13 Nem chimanagak tep si Titus a into-nok chithan da, niyamnamak a aspolen ko din edafod tan, nem ekak sipol. Isonga, inpayas koy tothood ma Troas, et timoloyak cha Macedonia.
Sema Iyantongpalan Na Obda Iren Paul
14 Nem banay mangoy salamat kod Afo Chiyos tep kagol na ingkayka-chom mid Cristo, nainbalbalnay to kawin Afo Chiyos na olay a singen ebalod kawin igwak Cristo. Naiyosal to kawin Afo Chiyos a mengipaamta na mapteng a chamag maypangkep Cristod chakel a dogad. Seja mapteng a chamag, singen manbangdon naiyaygwala-gwalak cha emiin a dogad. 15 Tep kagol na kaskasaba wi maypangkep Cristo, singen manbangdo kawin naengipaimdeng Afo Chiyos. Et emiin a naengi-ngel na nainkaskasaba wi, pati sema iren emangkaisalakan tan sema iren nat emangkaisalakan, naingob cha ngo ma manbangdo. 16 Sema iren nat emangkaisalakan, sema nainkaskasaba wi ket, singen enbanget cha si-kara tep naintorong tod pathiy tan chosen nagwariy pengingkaan to. Nem sema iren emangkaisalakan, singen manbangdod si-kara tep naintorong tod biyag a nagwariy pengingkaan to. Enbel-at a pasiya ja obden pankaskasaba na mapteng a chamag. Isonga, singen nagwariy mahaamag niyay. 17 Nem gwara engkawi wangoy kabaalan min mengemag niyay a obda tep si Afo Chiyos i engito-nod si-kawi, tan say pangkep min mantoro, mapteng cha nemnem to tep iyayka-chom kawid Cristo. Tep nat inges to kawi iren ma chakel a toon naengikaskasaba bengat na minsahin Afo Chiyos kagol na pengedaan cha na pilak.