Edafod Afo Chiyos I Daing Iren Paul
3
Kin jo emo i miyan iki-ki-tek mowan i angel mi. Ampet siya iy mesepol min mengi-kan cha si-kayo na solat a mengipaamta i mapteng i ogadi win inges toy echom a toon nakimowan chithan? Tan ampet siya iy mesepol mi pay a mengipasolat kayo say ibiybiy mid echom a too? 2 Nat mesepol mi man tep singen solat kayon mismon iyaysolat cha poso win naenistigod si-kawi. Tep no si-nengen na tooy mapteng a aramid jo, amtaen cha i si-kawin iyantorod si-kayo ket, mapteng ngoy ogadi wi. 3 Et si-nengen cha ngo i singen solat kayon insolat Cristo babaen cha si-kawi tep piyati yoy minsahin inkasaba wi. Say iyosal Criston engisolat, nat sema naiyosal na toon mengisolat, no diket Ispirito na sibibiyag a Afo Chiyos. Et sema engisolathan Cristo, nat echampig a bathon inges to ma iyaysolathan na dinteg Moses, no diket cha nemnem jo.4 Etoled kawin naengowan iren jay tep napiniyal mis Afo Chiyos a menolong kawi babaen Cristo. 5 Nat nakigwan mi i naedafod si-kawi ja daing min mengemag niya obda. Enchi, naedafo kitdid Afo Chiyos. 6 Tep si Afo Chiyos i engi-kan na daing min mengitoro na badon tolagan to. Seja badon tolagan, nat inges toy iyaysolat a dinteg Moses, no diket iyaybasar cha obda na Ispirito Santo. Tep sema iyaysolat a dinteg Moses, naengitorong cha kechosaan a nagwariy pengingkaan to tep nat mebedin a a-magen na tooy emiin a bili-bilin to. Nem say Ispirito Santo, nain-i-kan toy biyag a nagwariy pengingkaan to.
Sema Badon Tolagan, Mas Ainportanti Iy Say Dinteg Moses
7 Niman, nonta in-i-kan Afo Chiyos i dinteg tod Moses, iyalibongbongan na nihal na panakabalin Afo Chiyos si Moses, et inpanihal to pay i dopen Moses. Epalado pay i nihal na dopen Moses nonta ida tho liy dinteg a iyaysolat cha batho ired ma poli-polin Israel. Et angken mankapkapsot i nihal na dopen Moses, onsila pay, isonga nat mahasi-neng i tothood Moses. No inges pay niyay i panakabalin a inbiybiy Afo Chiyos nonta in-i-kan toy dinteg a naengitorong na kechosaan a nagwariy pengingkaan to, 8 mas epalado pay i panakabalin a nainbiybiy Afo Chiyos no nain-i-kan toy Ispiritod naemati na mapteng a chamag. a 9 Tep no iyaypasi-neng i panakabalin Afo Chiyos cha inpangi-kan to na dinteg a naengipaamta i mechosay tothoo, mas epalado pay i panakabalin ton maypasi-neng ngod badon tolagan ton mengipabilang na tothoon maronong. 10 Angken pay ainportanti wango ma dinteg nontan da, singen nat ainportanti wa no iinges tayod kainportantian niwa badon tolagan Afo Chiyos a iyaysa-dat med man. 11 Tep no iyaypasi-neng i panakabalin Afo Chiyos chiwa dinteg a esa-dathan, mas epalado pay i panakabalin ton maypasi-neng ngod badon tolagan ton eg mesa-sa-dathan.
12 Kagol a sigoradoy namnama wi maypangkep na badon tolagan, naintoled min chilin mengikaskasaba na mapteng a chamag. 13 Nat inges mis Moses a nasiya-dinan toy dopa tho say nat si-nengen iren ma poli-polin Israel nonta mankapkapsot i nihal to. 14 Nem singen esa-dinan i nemnem cha tep eg cha igwathan iwa epasamak cha Moses. Angken ingkathod niman, sema iren Hodjos a poli-poli iren ma tothoo nontan da, no iki-ngelan chiy memesa na Chaan a Tolagan, eg cha pay ngo egwathan i banag to tep singen esa-dinan pay ngoy nemnem cha. Tep sema naena-ena-din na nemnem iren ma Hodjo, eg ma-kal ingkathod memati ired Cristo. 15 Ahow, agpayso tan. Tep angken ingkathod niman, no gwariy memesa iren ma insolat Moses, singen esa-dinan pay laeng i nemnem cha. 16 Nem no mematiy tood Afo, sema naena-din na nemnem to ket, ma-kal. 17 Sema Afon timbal kod jay, si-kathoy Ispirito Santo. Sema toon gwared si-kathoy Ispirito Santo, iyaydibchi wa. 18 Isonga, si-kathayon emiin a naemati, nat naesa-dinan i dopa thayo, no diket singen ispiho kiya wen naengibiybiy na nihal tan panakabalin Afo Jesus. Et may-ingchas a ontolo-toloy i kesa-dat tayo say onmapmapteng kiya ingkathod ingesen tayon kosto-kostos Cristo. Seman ira, naepasamak a emiin babaen na panakabalin na Afon Ispirito Santo.