In-iksplikar Iren Paul A Kostoy Mapteng A Chamag Say Mesilowan Ira Ma Gwared Enbolinget
4
Kagol na kaasin Afo Chiyos, inpiyal tod si-kawi ja obda na pantoro na mapteng a chamag, isonga eg kawi edismaya. 2 Nagwariy naimag min iyay-emot tan kababaing. Nat nasiyaol miy too. Tan nat nadiyao-daohan mi pay i esel Afo Chiyos na ite-itek. No diket koston naintoro wiy podno say mafoot. Inges niwan i nainpasing min mantoro say amtaen na tothoo ngo i mapteng tan kosto pay i aramid mi. Tep nasini-neng Afo Chiyos a emiin i naima-imag mi. 3 Et no gwariy echom a nat mahaawat na mapteng a chamag a naintoro wi tep esa-dinan i nemnem cha, si-kariy maysi-jan cha Afo Chiyos na ingked ingka. 4 Nat naemati ira tep si Satanas a naiyantoray chiya dobong ket, siya-dinan toy nemnem cha say nat mesilowan i nemnem cha na silow a naedafod mapteng a chamag maypangkep na kinachiyos Cristo. Tep si Cristoy naengibiybiy na koston kay-ingesan Afo Chiyos. 5 Tep say nainkaskasaba wi, nat maypangkep cha si-kawi, no diket si Jesu Cristo. Tan sema nakigwan mi, si Cristoy Afo, tan singen bagaen jo kawin naiyansilbid si-kayo kagol Jesus. 6 Tep nonta kapkapoanan, si Afo Chiyos i engowan i “Silow ka did enbolinget.” a Et si-katho pay i enilow na nemnem tayo say egwathan tayoy kinachiyos ton naiyaypasi-neng cha Cristo.Angken Nadiya-kaman Iren Paul I Diga-digat, Naemasi-masig Iren Naiyankaskasaba Na Mapteng A Chamag
7 Si-kawi, singen banga kawin inam-ay a naebosak a iyay-ejanan na kokowen ebanol a pasiya. Tep say mapteng a chamag a ebanol a pasiya, inpiyal Afo Chiyos cha si-kawin tothoo bengat. Imag to tan say ipaamta tho i say panakabalin na mapteng a chamag, nat naedafod si-kawi, no diket si Afo Chiyos. 8 Nadiya-ka-da-kaman miy ekila-kilasin digat, nem eg kawi naaagwak. No singka-chom, nat amta wiy pesing mi, nem eg kawi pay simalcheng. 9 Napiyadigat cha kawi, nem eg to kawi nabiyaybay-an Afo Chiyos. Chanchanin bonoen cha kawi, nem eg cha kawi posien. 10 Naekida-kam kawi na olay na digat a inges toy inpandigat tan ingkathiy Jesus say no tolongan to kawin Jesus, si-nengen na tooy panakabalin na biyag tod ja angel mi. 11 Tep basta sibibiyag kawi pay, singen nasingo wi na olay i pathiy tep naiyansilbi kawid Jesus. Naepasamak iyay say sema panakabalin na biyag Jesus ket, maypasi-neng ired ja angel min naetiy. 12 Isonga, nasingo-singo wi na olay i pathiy, nem say pantongpalan to ket, gwared si-kayoy biyag a nagwariy pengingkaan to.
13 Gwariy iyaysolat cha esel Afo Chiyos a kigwan to i “Naematiak cha Afo Chiyos, isonga imeselak.” b Sema pamati wi, inges to man. Tep angken nadiya-kam miy diga-digat, naemati kawi pay cha Afo Chiyos, isonga naimesel kawi maypangkep cha si-katho. 14 Tep amta wi i si Afo Chiyos a engipawil Afo Jesus, panpawil to kawi ngo tep ekisa-ki kawid Jesus. Et panpawil to kayo ngon Afo Chiyos say si-nofen to kiya cha et say mayka-chom kiyed kad-an to. 15 Emiin a nadiya-kaman min diga-digat, para cha panmaptengan jo. Tan sema iren toon naena-kam na kaasin Afo Chiyos, no onchakel ira, sema iren naiyansalamat cha Afo Chiyos, onchakel pay ngo ira say mechejaw a chilis Afo Chiyos.
16 Isonga, nat edismaya kawi. Tep angken mankapkapsot i angel tayo, sema biyag cha si-kathayon eg meti-metiy, gwiya-gwa-gwen nakimedkedsang. 17 Tep seja diga-digat tayo niman, nat onbaya-bayag, et singen nagwariy bel-at tod si-kathayo no may-inges ired ma kongkonen i-kan Afo Chiyos. Tep sejay iren diga-digat, towan isagana kiyen mayka-chom cha kamaptengan a biyag a nagwariy kay-ingesan to tan nagwariy pengingkaan to. 18 Isonga, sema natiyofog tayo, nat sema naesi-neng chiya dobong, no diket sema nat masi-neng a igwed dangit. Tep sema naesi-neng chiya dobong, mepokaw, nem sema nat masi-neng a igwed dangit ket, nat mepoka-pokaw.