Sema Badon Angel A Naniyamnama Iren Ma Naemati
5
Tep seja angel tayod ja dobong, singen tolchen naiyan-iyanan tayo na sankaatihan. Amta thayo i no metiy i angel tayo, mesa-dathan na bado. Sema badon angel, singen baliy a gwara na olay chiwa dangit. Tan sema engamag niwan, nat too, no diket si Afo Chiyos. 2 Niman a ija kiya nin chiya dobong, kekanil kiyen mesa-dathan ira ja angel tayo na badon pan-iyanan tayod dangit. 3 Et say no metiy kiya, singen nat epolpolan i ispirito thayo tep gwariy angel to. 4 Tep basta sibibiyag kiya pay chiya dobong, ebel-athan kiya kagol na kinakapsot tan kinakolang na angel tayo. Nem nat sema piyan tayon metiy say ma-kal i angel tayo, no diket piyan tayon mesa-dathan iyay a angel tayo na bado. Tep no mepesamak iwan, seja biyag a naepohaw, mesa-dathan na kolpi na biyag a eg mepoka-pokaw. 5 Si Afo Chiyos i engisagana kiya say may-i-kanan kiya niwa badon angel a nat meti-metiy, tan in-i-kanan to kiya pay na Ispirito Santon naengipaamta i sigoradon tongpalen Afo Chiyos i emiin a inkari tho.6 Isonga, mahedsang na olay i nemnem mi, angken amta wi i basta gwara kawi pay chiya dobong, nagwara kawi nin cha kad-an Jesus a Afo thayo. 7 Tep say biyag mi niman, iyaybasar cha pamati, nat seja iren naesi-neng chiya dobong. 8 Mahedsang a agpaysoy nemnem mi. Et si-kawi, mapmapteng koma no metiy kawi, et maypayas i angel mid ja dobong say mekiiyan kawid Jesus. 9 Isonga, no angken ija kawid ja dobong ono chiwan a kad-an Jesus a Afo thayo, say nakiya-ka-tigan min a-magen, sema pan-imdengan Jesus. 10 Tep si-kathayon emiin, mesepol a sangoen tayos Cristo say kowisen to kiya cha. Et may-i-kanan i sa-ki tan sa-kid si-kathayo na iyaybagay chiwa imag tayod ja dobong angken mapteng ono ngaaw.
Inpaamta Iren Paul I Pesing Na Toon Maypaolid Afo Chiyos
11 Isonga, kagol a amta win ontahot cha Jesus a Afo thayo, naintoloy min mengegwis na toon mematid si-katho. Amten Afo Chiyos i mapteng i kakara wi, et sapay koma ta amta yo ngo. 12 Nat miyan iki-ki-tek mowan i angel mi. No diket miyan kona jay tep piyan min gwariy kagol jon mengowan na kinamapteng mi tan gwara ngoy isongbat jod tothood tan a naiyandisjon cha si-kawi. Seta iren too, nachijaw chiy kasasaad na too bengat, nat sema igwed nemnem to. 13 Tep no ithed tan i naengowan i singen ebang-ag kawi, angkena tep emiin a naimag mi ket, para cha chayaw Afo Chiyos. Tan no nakigwan cha i kostoy nemnem mi, mapteng tep sema naimag mi ket, para cha panmaptengan jo. 14 Tep sema semek Cristoy naiyantoray na naimag mi. Tep sigorado kawi i say sa-kin toon si Cristo, etiy para cha emiin, isonga singen etiy ngon emiin i too. 15 Etiy si Cristo para cha emiin a too say si-kathayon sibibiyag, nat onoran tayo wiy piyan tayo, no diket sema piyan Criston etiy et iyanpawil para cha si-kathayo.
16 Isonga, sema nainpasing mi wen naengowinta na too, nat iyaybasar na kasasaad tod ja dobong. Nontan, inges niwan i nainpasing min naengowinten Cristo, nem niman esa-dathan i nemnem mi maypangkep cha si-katho. 17 Isonga, sema toon ekisa-kid Cristo, badon parsowa. Tep sema sigod a ogadi thayo, enagwara wa, et esa-dathan na bado. 18 Seja iren emiin, naedafod Afo Chiyos. Tep si Afo Chiyos i engipaoli kiya did si-kathon mismo babaen Cristo, tan si-kathoy engi-kan cha si-kawi na obda na pengipaamted too na pesing chen on-olid si-katho. 19 Say miyan kona, inpaoli din Afo Chiyos i tood si-kathon mismo babaen na ingkathiy Cristod koros. Tep kagol na ingkathiy Cristo, mebedin men ibilang Afo Chiyos i toon nagwariy basol cha tep epakawanan ira. Et pinispis to kawin Afo Chiyos a mengitoro niya minsahi maypangkep na ioli na tood si-katho. 20 Isonga, si-kawiy naengiriprisintar Cristo, tan singen si Afo Chiyos a mismoy naengawis na too babaen na nakigwan mi. Kagol Cristo, nain-adok mi i “Pangaasi yo, oli kayo wed Afo Chiyos.” 21 Tep sejay i imag Afo Chiyos para cha si-kathayo. Inpakaro thoy chosa na emiin a basol tayod Criston nagwaren polos i basol to say ibilang Afo Chiyos a maronong kiya tep ekisa-ki kiya wed Cristo.