Sema Pena-nop Na Alos Para Ired Ma Ematid Jerusalem
16
Niman ma, maypangkep na pena-nop na alos para ired ma toon Afo Chiyos cha Jerusalem, mapteng no onoran jon gwared ta Corinth iwa inbilin kod ma naematid ma probinsiya na Galatia. 2 No Diyomingko, sa-ki tan sa-kid si-kayo, pengidasin kayo na alos jo. Maybagay komay alos jod ma naigwat jo. Amag jo man say nat mesepol a man-alos kayo no onkowanak ded tan. 3 Pemispis kayo ngo na echom jod ta Corinth a naepiyal say no onmothohak chithed kad-an jo, ito-nok ira ma toon mengitolod da na alos jod Jerusalem. Mengipaw-ithak ngo na sola-solat say sema iren gwared Jerusalem, amtaen cha no ngoy pangkep nithan a alos jo. 4 Nem no singen mapmapteng a onkowanak chiwed Jerusalem, angken mekikowan ired si-kak.Sema Iren Planon Paul
5 Say niyemnem kon a-magen, manchedanak nin cha probinsiya na Macedonia et bisitaen tahejo la. 6 Meba-ba-jaganak emon man-iyan chitha kad-an jo, angken ingkatho emo led mekcheng i siteg-inan. Et mebedin a cha-chaan joak a mengitoloy na biyahik cha kompormin konan ko. 7 Isonga, nat bisitaen tahejo nin niman tep kedpeng bengat i timpon pan-iyan ko, et piyan kon mebejag a man-iyan cha kad-an jo no itolok Afo Chiyos. 8 Nem niman, man-iyanak nin chiyed Ephesus ingkathod Akow na Piyasta na Pintikostis. a 9 Tep angken chakel i mahakontred si-kak, chakel ma ngoy gwayak a mansilbid Cristo, et mapteng iriy iyantongpalan niwa obda.
10 No onmothok des Timothy chithed kad-an jo, sintil jo tep naiyan-obda para cha Jesus a Afo thayon inges toak. 11 Nagwara komay menamsis cha si-katho, no diket cha-chai yon mengitoloy na biyahi th o say mapteng i nemnem tod si-kayo et say mebedin a on-oli did kad-an ko. Tep kowan sekera pati sema echom a naematin kadkadgwa tho.
12 Niman ma, maypangkep na ahi tayon si Apollos. Inpahat kon egwisen a mekiolop cha echom a aahi tayod pamatin manbisited si-kayo. Nem say kigwan to, amta tho i nat niman i koston timpon ikowan tod tan. Onkowan ded tan no gwariy gwaya tho kono.
Sema Kaonoran Na Solat
13 Pantanchaan kayo. Petpeti yoy pamati yo. Toled kayo. Kedsang kayo. 14 Ibiybiy joy semek jod echom babaen na emiin a naima-imag jo.
15 Aahi, amta yo i si Stephanas tan pamilja toy pilmiron ematid probinsiya na Achaia. Manipod nonta inpanchogi ren memati ingkathod niman, natimolo-tolong ired ma toon Afo Chiyos. 16 Isonga, sema iren toon inges tos Stephanas tan sema iren echom a masdon naiyan-obda para cha Jesus a Afo thayo, pangaasi yo, amag joy konen cha.
17 Maradsahak a pasiya nonta mimothok ali ches Stephanas, Fortunatus, tan si Achaicus a kaidian jo. Tep iya-kalan i esaw kod si-kayon gwared ta Corinth babaen cha si-kara. 18 Inpakedsang chiy nemnem ko. Tan amtak i pekedsang cha ngoy nemnem jo no on-oli da ired ta kad-an jo. Ibiybiy joy rispikto yo ired ma toon inges iren man.
19 Sema iren naematid ja probinsiya na Asia, chiyan komostai kayo. Et si Aquila ni Priscilla tan echom a naematin naesa-sa-nop a manchejaw cha baliy cha, chiyan komostai kayo ngo. Piyan chen ipaamted si-kayo i ensemek cha kayo tep naemati kayod Jesus a Afo thayo. 20 Emiin a naematid jay, chiyan komostai kayo ngo. Pankikinomosta kayon mengibiybiy na semek jod sa-ki tan sa-ki.
21 Si-kak a Paul, kowan komostai kayo ngo, et si-kak ngon mismoy mansosolat niyay a kaonoran a ese-esel.
22 No gwariy nat ensemek tos Jesus a Afo thayo, sapay koma chosaen Afo Chiyos. Gomali wa, Afo Jesus.
23 Sapay koma gwared si-kayoy kaasin Jesus a Afo thayo.
24 Sapay koma gwara ngoy semek kod si-kayon emiin a naematid Cristo Jesus. Amen.