3 Tep sema iren mas ainportantin iyaytorod si-kak, si-katho ngoy intorok cha si-kayo. Sema iren toro-toro, sejay. Etiy si Cristo say mepekawanan i basol tayon inges to ma iyaypadtod esel Afo Chiyos. 4 Iyaybeka et iyanpawil nonta maykatdon akow a inges to ma iyaypadtod esel Afo Chiyos. 5 Et iyanparang si Cristod Peter et iyanparang ngod emiin a apostolis to. 6 Et idi pinsak, iyanparang cha esolok a dimen dasos a emati. Sibibiyag pay i gwa-gwa-cha iren ma emati, nem iyangketiy diy echom. 7 Et iyanparang ngos Cristod James, et iyanparang mowan cha emiin a apostolis.

8 Sema kaonoran a iyanparangan Cristo ket, si-kak angken inges toak na iyay-ibong. 9 Kigwan ko man tep si-kak i kababaan na apostolis. Nat iyaybagayak a mengaranan na apostolis tep pidigathan ko iriy toon Afo Chiyos. 10 Nem kagol na kaasin Afo Chiyos, inpanbalin toak na apostolis to. Et sema kaasi thod si-kak, mapteng i iyanpa-noan to. Tep mas simedoak iy say emiin a echom a apostolis. Nem nat kagol na kedsang kon mahaamagak niwa obda, no diket sema tolong Afo Chiyos. 11 Isonga, angken si-kak i mankasaba ono sema iren echom a apostolis, man-iinges i nainkasaba wi, et si-katho ngoy piyati yo.

12 Say nainkasaba wi, etiy si Cristo et iyanpawil. Isonga, seta echom cha si-kayo, apay nga nakigwan cha i nat manpawil ira ma iyangketiy? 13 Tep no nat manpawil ira ma iyangketiy, nat iyanpawil ngos Cristo. 14 Et no nat iyanpawil si Cristo, nagwariy silbi na inkasaba wi, tan nagwara ngoy silbi na pamati yo. 15 Tep no podnoy nakigwan jo, say piyan ton a-seden, iyan-itek kawi tep ingwanggwang mi i inpanpawil Afo Chiyos si Cristo. Nem no podnon nat nainpanpawil Afo Chiyos ira ma iyangketiy, nat inpanpawil to ngos Cristo. 16 Tep no nat mebedin a manpawil ira ma iyangketiy, nat iyanpawil ngos Cristo. 17 Et no nat iyanpawil si Cristo, nagwaren polos i silbi na pamati yo, et mechosa kayo pay laeng na ingked ingka kagol na basol jo. 18 Et sema ngo iren iyangketiy a ematid Cristo, mechosa ngo ira na ingked ingka. 19 Et no seman ma, sema namnama thayo i ontolo-toloy a mayka-chom kiyed Cristo, para biyag tayod jay bengat. Tep no nagwariy panpawil iren ma iyangketiy, maysi-jan kiyed Cristo no metiy kiya. Et si-kathayoy mas kakaasin emiin a too.

20 Nem iyanpawil nowan si Cristo, et sema inpanpawil to, si-kathoy naengipasigoradon panpawil ngon Afo Chiyos a emiin ira ma iyangketiy. 21 Tep kagol na imag na sa-kin toon si Adam, naetiy i tothoo. Tan kagol ngo na imag na sa-kin toon si Cristo, manpawil i tothoo. 22 Tep emiin a tooy poli-polin Adam, isonga naetiy ira. Nem emiin ngon iyayka-chom cha Cristo, manpawil ngo ira. 23 Nem manpawil i sa-ki tan sa-ki no koston timpo. Si Cristoy pilmiron iyanpawil. Et sema iren iyayka-chom cha Cristo, manpawil ngo ira no on-oli mowan alis Cristo. 24 Et onmothok aliy kaonoran na akow no omasen Cristoy emiin a gwariy karebengan to tan toray ton naengontred si-katho. Et iawat Criston emiin i intora-torayan tod Afo Chiyos a Aweto. 25 Tep mesepol a mantoray nin si Cristo ingkathod omasen ton emiin ira ma engontred si-katho. 26 Et sema kaonoran a maomas ket, sema pathiy. 27 Tep kigwan tod ma esel Afo Chiyos i “Inpatoray Afo Chiyos i emiin cha Cristo.” Nem nonta kigwan to i “Inpatoray Afo Chiyos i emiin cha Cristo,” egwathan tayo i nat itorayan Cristos Afo Chiyos tep si Afo Chiyos i engipatoray na emiin cha Cristo. 28 No ipatoray malen Afo Chiyos i emiin cha Anak to, si Criston mismo, ipatoray toy angel tod Aweton sema engi-kan cha Cristo na karebengan ton mantoray cha emiin. A-magen Cristo man say si Afo Chiyos i oltimo din mantoray na emiin.

29 Nemnemen tayo mowan iwa panpawil na iyangketiy. No nat podnon manpawil ira ma iyangketiy, apay nga iyanbonbonjag iriy echom a maysa-dat ired ma iyangketiy? No nat manpawil ira ma iyangketiy, nengoy silbi na inpanbonjag chen maysa-dat cha si-kara? 30 Et si-kawi, apay nga nainposta wiy biyag mi na iyoras no nat sigorado kawin manpawil? 31 Aahi, chanchanin metiyak na gwiya-gwa-gwa. Seja kowan kona, podnon inges toy chadsak ko na ingkayka-chom jod Cristo Jesus a Afo thayo. 32 Tep chiyed Ephesus, chakel i digat a diya-da-kaman ko kagol iren ma mahakontred si-kak a inges toy emanekot a animal a piyan chen bonoen chaak. Apay nga ano-anosan ko koma ira jay no say kongkonak, para cha biyag kod jay bengat? Tep no nat manpawil ira ma iyangketiy, magangkana no ma-mag ngorechan i nakigwan na toon “Mengan tan man-inom kiya niman tep no megwa-gwa metiy kiya emo et setan bengat.”

33 Enog i intolok a mesaol tep podnoy nakigwan na toon “No mekikadgwa ked toon ngaaw i ogadi tho, mechechal i mapteng a ogadim.” 34 Oli kayod koston nemnem jo, et salcheng kayon manbesol. Tep gwariy echom cha si-kayon nagwariy amta tho maypangkep Afo Chiyos. Kowan kona jay tep kababaing iyay cha si-kayo.

35 Gwara emoy mengibaga i “Nengoy pesing iren ma iyangketiy a manpawil? Nengoy itsora na angel cha?” 36 Singen kolang i nemnem niwa toon engibaga niwan. Tep nemnem joy bothil. No mengipoyaw ka na bothil, nat onsimit no nat mebojok nin. 37 Et sema inpoyaw mo, nat tanem a bimadeg da, nem sema iren irik ono bothil bengat. 38 Nem sema sa-ki tan sa-kin bothil, pinispis Afo Chiyos i itsora na tanem a medepod man a mismo. Et sema ekila-kilasin bothil, kila-kilasi ngoy itsora na tanem to no onbadeg ma. 39 Et sema iren ekila-kilasin sibibiyag chiya dobong, nat man-iinges i itsora ra. Say too, gwariy itsora tho. Say animal, gwara ngoy itsora tho. Say titit tan paideng, gwara pay ngoy itsora ra. 40 Gwariy piyarsowen Afo Chiyos cha iyaykayang tan gwariy piyarsowa thod ja dobong, nem sema kamapteng na itsora ra, nat man-iinges. 41 Angken sema iren gwared iyaykayang, afi-afil i kamapteng na itsora ra. Tep say akow, afil i nihal to, tan say bolan tan pasingsing, afil ngoy nihal cha. Tan angken sema iren pasingsing, nat man-iinges i nihal cha.

42 Inges to ngod ma angel na toon panpawil Afo Chiyos. Afil med angel tayo niman. Tep sema iren angel tayo niman, naetiy tan naeboyok, nem sema iren angel na toon manpawil, nat meti-metiy. 43 Say angel na etiy, ngaawes i kasi-neng to. Nem say angel ngo na manpawil, mapteng i kasi-neng to di. Sema angel na etiy, nagwariy kedsang to. Nem sema angel ngo na manpawil, banay i toray to di. 44 Sema angel tayo niman, iyaybagay cha biyag chiya dobong, nem sema angel na manpawil, maybagay cha biyag chiwa dangit. Tep no gwariy angel a iyaybagay chiya dobong, gwara ngo chechan i angel a maybagay chiwa dangit. 45 Iyaytonos iyay cha iyaysolat chiwa esel Afo Chiyos a “Sema pilmiron toon si Adam, iyay-i-kanan na biyag,” nem igwan ngoy sa-kin toon iyanngaran na Kaonoran a Adam a si Cristo, et si-kathoy naengi-kan na biyag a nagwariy pengingkaan to. ^a 46 Nem say pilmiron angel a iyay-i-kan cha si-kathayo, si-kathoy iyaybagay cha biyag cha dobong, nem no sa-ki din akow, m niwa iyaybagay cha biyag cha dangit. 47 Sema pilmiron toon si Adam, edafod dobong tep aamag na depok, nem sema maykadgwen toon si Cristo, edafod dangit. 48 Emiin a toon gwared ja dobong, iyay-arig ired Adam a edafod depok. Nem si-kathayon naemati, iyay-arig kiya ngod Criston edafod dangit. 49 Tep say angel tayod ja dobong, singen angel Adam a aamag na depok. Nem no gwara kiya wed dangit, say angel tayo, singen angel Criston gwared dangit.

50 Aahi, gwariy piyan kon konen cha si-kayo. Say angel tayod ja dobong, nat mebedin a mayka-chom cha pantorayan Afo Chiyos. Tep sema angel a naetiy, nat mebedin a mayka-chom cha dangit tep nat meti-metiy i angel chiwan. 51 Ki-ngeli yo! Konen kod si-kayo i nat inpaamten Afo Chiyos nontan. Nat metiy kiyen emiin, nem sema angel tayon emiin, mesa-dathan a chakos. 52 Magenon inges toy kimkim na matha. Mepesamak iyay no kaonoran alin akow cha dobong no onnotheng i trompita. Tep onnotheng iwa trompita et manpawil ira ma iyangketiy a may-i-kanan ira na angel a nat meti-metiy. Tan sema iren sibibiyag pay, mesa-dathan ngoy angel cha. 53 Tep seja angel a naetiy et naeboyok, mesepol a mesa-dathan na nat meti-metiy tan meboyo-boyok. 54 No mesa-dathan miy angel a naetiy et naeboyok na nat meti-metiy tan meboyo-boyok, metongpal miy iyaysolat chiwa esel Afo Chiyos a:

58 Isonga, aahik a ensemek ko, itoloy jon mematin petpeti yoy pamati yo et ipahat jo na olay a man-obda para cha Jesu Criston Afo thayo tep amta yo i nat onkawas i bediy jo para cha si-katho.