Sema Osal Iren Ma Daing A Nain-i-kan Na Ispirito Santo, Para Cha Panmaptengan Na Echom A Naemati
14
Say ipahat jo komen a-magen ket, semek joy echom. Ipasnek jo koma ngon piyan a egwathen ira ma daing a naedafod Ispirito Santo, agdalod ma daing a mengowan na inpaamten Afo Chiyos cha si-kayo. 2 Tep no on-esel i too na ekilasin esel, si Afo Chiyos bengat i tetbalen to, nat too tep nat mahaawat cha. Babaen na panakabalin na Ispirito Santo, man-a-sel na podnon nat ma-gwathan i banag to. 3 Nem sema mengowan cha echom na inpaamten Afo Chiyos cha si-katho, tooy tetbalen to say pekedsang toy pamati ra tan say bidinen to ira tan cha-chaan to iren man-ano-anos na digat cha. 4 Sema man-a-sel na ekilasin esel, pamati tho bengat i pekedsang to. Nem no sema mengowan cha echom na inpaamten Afo Chiyos cha si-katho, pekedsang toy pamati iren ma echom ton naemati. 5 Piyan kon gwared si-kayon emiin i daing a man-a-sel na ekila-kilasin esel, nem say mas piyan ko ket, gwared si-kayoy daing a mengowan cha echom na inpaamten Afo Chiyos cha si-kayo. Tep sema daing a mengowan na inpaamten Afo Chiyos cha esel a ma-gwathan, mas epateg iy say sema daing a on-esel na ekila-kilasin esel a nat ma-gwathan. Tep sema mengowan na inpaamten Afo Chiyos cha esel a ma-gwathan, pekedsang toy pamati iren ma echom ton naemati. Nem sema man-a-sel na ekila-kilasin esel a nat ma-gwathan, nat mebedin a pekedsang toy pamati ra ampet gwara ngoy toon mengowan na banag iren ma towan kona.6 Niman, aahik, no onkowanak ded ta kad-an jo, et on-eselak na ekila-kilasin esel a nat ma-gwathan, nengoy panmaptengan tod si-kayo? Nem no konen kod si-kayo i inpaamten Afo Chiyos cha si-kak ono sema amtak maypangkep Afo Chiyos ono no itorok cha si-kayo ira ma podnon edafod Afo Chiyos, gwariy panmaptengan tod si-kayo. 7 Tep angken sema iren para mosikon nagwariy biyag ton inges to ira ma komising tan gwariy kalchang to, no nat maydasin i ki-ngel to, nat amtaen na too no nengo man a kansiyon to. 8 Inges toy tamboyog a naiyosal iren ma solcharo. No nat maydasin i ki-ngel to, nagwariy mansaganen mekidaban. 9 Inges to ngod si-kayo. No man-a-sel kayo na esel a nat ma-gwathan, nengoy pesing na toon mengegwat niwa jowan kona? Singen chahem bengat i jowan tabtabala. 10 Kila-kilasiy esel chiya dobong, et emiin a esel, gwariy bana-banag cha. 11 Nem no ekak egwathan i esel na too, ekak ibilang iwan a toon kaidian ko, et nat ibilang toak ngon kaidian to. 12 Inges to ngod si-kayo. Isonga, si-kayon piyan ton mengegwat iren ma daing a nain-i-kan na Ispirito Santo, anap jo ira ma daing a mantongpal cha pengikedsang na pamati iren ma naemati.
13 Isonga, sema man-a-sel na ekilasin esel, ikararag to koma i may-i-kanan na daing a mengowan niwa banag na a-seden to. 14 Tep no mankararagak na ekilasin esel, sema ispiritok i mankararag, nem sema nemnem ko, nat iyayka-chom. 15 Nengo wiy a-magen ko? Say a-magen ko, mankararagak na ese-esel a naedafod ispiritok, tan mankararagak ngo na ese-esel a naedafod nemnem kon egwathan na echom. Mankansiyonak na ese-esel a naedafod ispiritok, tan mankansiyonak ngo na ese-esel a naedafod nemnem ko. 16 Tep no bilang i mansalamat kayod Afo Chiyos na ese-esel a naedafod ispirito yo. Sema ira pay a esa-nop chithan, nat mebedin a isongbat cha i “Amen” no mekcheng i kararag jo tep nat egwathan cha wiy jowan kona. 17 Angken mapteng a pasiya ta pansalamat jod Afo Chiyos, nagwariy panmaptengan tod echom jo.
18 Mansalamathak cha Afo Chiyos i nagwared si-kayoy on-agwak cha si-kak maypangkep na nain-esel ko na ekila-kilasin esel a nat amtak. 19 Nem no mekisa-nofak ired ma naematin manchejaw, magangkana no dimen esel bengat i konen kon memidin na echom iy say sema sampolon dibon esel cha ekilasin esel a nat ma-gwathan.
20 Aahik, sema pannemnem jo, nat inges to komay nganga-nga. Nem no maypangkep na ngaaw, mapteng chechan no inges joy ngoyat tep eg cha amten mengemag na ngaaw. Nem no maypangkep iren ja daing a naedafod Ispirito Santo, sema pannemnem jo, inges to komay iyangka-tengan. 21 Tep iyaysolat chiwa esel Afo Chiyos a kigwan Afo Chiyos i:
“Ito-nok ired ma tothook
iriy medepo did afil a dogad
a naimesel na ekilasin esel.
Ipaamta riy piyan kon
konen cha tothook.
Nem nat iki-ngelan chaak
met laeng.” a
22 Isonga, seja iyaysolat, towan ipaamta i sema daing a on-esel na esel a nat ma-gwathan, sinjal ired ma nat naemati say amtaen cha i chosaen iren Afo Chiyos. Nat sinjal ired ma naemati. Nem sema daing a mengowan na inpaamten Afo Chiyos cha esel a ma-gwathan, sinjal ired ma naemati say amtaen cha i gwares Afo Chiyos cha si-kara. Nat sinjal ired ma nat naemati. 23 Isonga, no mesa-sa-nop kayon emiin a manchejaw tan on-esel kayon emiin na ekila-kilasin esel, et no onmothok ali iriy bisiten nat naemati, konen cha emo i ebang-ag kayon naemati tep nat egwathan chiy jowan kona. 24 Nem no man-a-sel kayon emiin na esel a ma-gwathan tan konen jo i inpaamten Afo Chiyos cha si-kayo, et no onmothok aliy bisiten nat naemati, emiin a a-seden jo, egwisen to man a too say amtaan to i mabesol. Egwathan to ngo i ampet a songbathan tos Afo Chiyos. 25 Sema iren ngaaw a iyay-emot cha nemnem to, maypabo-day ali. Et mantalimohod iwa toon manchejaw cha Afo Chiyos a konen to i agpayson gwares Afo Chiyos cha si-kayon naemati.
No Mesa-sa-nop Kayon Manchejaw, Mesepol A Aolnos I Pesing Jo
26 Aahi, nengoy konen ko maypangkep niyay? No mesa-sa-nop kayon manchejaw, mapteng no gwariy mankansiyon, gwariy mantoro, gwariy mengowan na inpaamten Afo Chiyos cha si-katho. Gwara pay emoy man-a-sel na ekilasin esel tan gwara pay i mengowan na banag na konen to. Seja iren emiin, amag jo say onkedsang i pamati iren ma naemati. 27 No gwara iriy man-a-sel na ekila-kilasin esel, mesepol a chegwa ono tedo bengat iren man-a-sel, et nat man-iringkas ira. Et mesepol ngon gwariy mengowan na banag na konen cha. 28 No nagwariy mebedin a mengowan na banag na konen cha, sema iren man-a-sel na ekila-kilasin esel, on-eket koma ira no mesa-sa-nop kayon manchejaw. No engkay iy agos cha, mebedin a tetbalen ches Afo Chiyos niwan a ese-esel. 29 Sema iren mengowan na inpaamten Afo Chiyos cha si-kara, mesepol a chegwa ono tedo bengat iren man-a-sel. Sema iren echom a manki-ki-ngel, nemnemnemen cha no sema kigwan iren ma iyan-esel, edafod Afo Chiyos, ono enchi. 30 Et no gwariy mantoktokkong chithan, et ipaamta wen Afo Chiyos i piyan ton konen niwa too, sema man-a-sel, kekchengen to komen chakos say maysa-dat iwa echom. 31 Tep no seman, sema iren gwariy konen chen inpaamten Afo Chiyos cha si-kara, mebedin a man-a-sel iren emiin no mansina-dat ira. Et metoroan iren emiin tan maypakedsang i nemnem na emiin. 32 Sema gwariy daing ton mengowan na inpaamten Afo Chiyos cha si-katho, kaya thon itorayan i angel to. 33 Tep say piyan Afo Chiyos, nat sema ngalawngaw, nem sema aolnos.
Gwara pay i sa-kin bilin kon naiyonoran na emiin a toon Afo Chiyos cha emiin a dogad. 34 Sema iren bibii, on-eke-eket ira no mekisa-nop ired ma naematin manchejaw. Tep iyayparit iren man-a-sel, no diket mesepol a manpatoray ired daleki tep sejay i iyaysolat cha dinteg Afo Chiyos. 35 No gwariy piyan na biin amtaen, ibagaan to nin komay imbaliy to no gwara ired baliy cha. Tep kababaing cha bii no man-a-sel chiwa naesa-nofan na naemati.
36 Si-kayon tood ta Corinth, nat piyan jo emon egwathen i kigwan ko. Kigwan jo emo i si-kayoy edafoan na esel Afo Chiyos. Ono kigwan jo emo i si-kayo bengat i ekasabaan na esel Afo Chiyos. 37 Nem no bilang i gwariy mengowan na gwariy daing ton mengowan na inpaamten Afo Chiyos cha si-katho ono gwariy afil a daing ton in-i-kan na Ispirito Santo. Mesepol a egwathen ton sejay iren insolat kod si-kayo ket, bili-bilin Jesus a Afo thayo. 38 Nem no eg to piyan a egwathen ira ja bili-bilin, enog ngoy igwat iwan a too.