Semek
13
Angken gwariy daing kon on-esel na ese-esel na too tan angken ese-esel na anghilis, no nagwariy semek kod echom, nagwariy silbi na konen ko, et singen kansaak tan tiktihak a manoteng. 2 Tan angken konen ko i inpaamten Afo Chiyos cha si-kak tan amtak ngon emiin, angken sema iren nat kigwan Afo Chiyos nontan da, tan angken on-anay i pamatik say kebedinan kon mengibonal na chonchontog, no nagwariy semek kod echom ket, nagwariy silbik. 3 Angken i-kan kon emiin i kegwen ko ired ma iyangkebitheg, tan angken itolok kon poolan chiy angel ko say metiy kagol na nainpamatik cha Cristo, no nagwariy semek kod echom ket, nagwariy kongkonak.4 Sema gwariy semek tod echom, inges to jay. Ma-nos tan mahaasi. Nat maapal. Nat iki-tek toy angel to tan nat pahi-tek. 5 Nat mengemag na kababaing. Eg to ipilit i piyan to, nat onbonget a chakos, tan magenon dingdingen toy ngaaw a imag na echom cha si-katho. 6 Nat kaimdeng no ngaaw i ma-mag, no diket maradsak cha podno tan kosto. 7 Sema gwariy semek tod echom, aanos na olay, naemiyal na olay, naniyamnama tho na olay i mapteng i ma-mag, tan mamingel na olay na digat.
8 Nagwariy pengingkaan na semek. Nem sema daing a mengowan na inpaamten Afo Chiyos, menagwara. Sema daing a on-esel na ekila-kilasin esel a eg aamta, onki-to. Tan sema daing a mengamta maypangkep Afo Chiyos, menagwara ngo. 9 Tep sema amta thayo, kolang, tan sema konen tayo ngo i inpaamten Afo Chiyos, kolang tep nat inpaamta nin Afo Chiyos a emiin. 10 Nem no koston metongpal i planon Afo Chiyos, mepokaw ira ma kolang.
11 Kaspangarigan, nonta kanga-ngak, singen nga-ngay inpasing kon iyan-esel, engawat, tan iyannemnem. Nem idi bimadegak, inpayas ko liy ogadi na nga-nga. 12 Et inges to ngo man cha si-kathayon naemati. Tep niman, say nainpasing tayon meni-neng cha Afo Chiyos, nat malinawag a singen emangkesi-neng cha ispihon eborabod. Nem igwan aliy timpon mesangos Afo Chiyos, et mesi-neng a kosto-kosto. Niman, kolang i amtak maypangkep Afo Chiyos, nem igwan aliy timpon nagwara diy kolang na amtak maypangkep cha si-katho tep sema amtak maypangkep cha si-katho, inges to diy amta tho maypangkep cha si-kak. 13 Isonga, ontolo-toloy ira ja tedo na ingked ingka: sema pamati, sema namnama, tan sema semek. Nem say kapategan ired jay ket, sema semek.