Sema Iren Daing A Nain-i-kan Na Ispirito Santo
12
Niman ma, aahi, maypangkep iren ma daing a nain-i-kan na Ispirito Santo, piyan kon amtaen joy podnon maypangkep niwan. 2 Amta yo i nonta aneng kayo pay mematid Cristo, esaol kayo say iyaytorong kayon iyanchayaw na sinan chiyos a nat mahaesel. 3 Isonga, piyan kon egwathan jo i sema toon naintorong na Ispirito Santo, nat mebedin a konen to i “Sapay koma mebotbot si Jesus.” Et sema toon nat naintorong na Ispirito Santo, nat mebedin ngon konen to i “Si Jesus i Afo.”4 Kila-kilasiy daing a iyay-i-kan cha si-kathayo, nem sa-sa-ki bengat i naengi-kan a sema Ispirito Santo. 5 Et kila-kilasiy pesing a mansilbi, nem sa-sa-ki bengat i pansilbian tayon si Jesus a Afo thayo. 6 Kila-kilasi ngoy pantongpalan na panakabalin Afo Chiyos cha biyag na emiin a too, nem sa-sa-ki bengat i naedafoan na emiin a panakabalin a si Afo Chiyos. 7 Sema sa-ki tan sa-kin naemati, iyay-i-kanan na daing a sinjal i naintorong na Ispirito Santo. Iyay-i-kan cha si-kathoy daing say tolongan toy echom a naemati. 8 Cha sa-kin too, i-kan na Ispirito Santoy daing a man-a-sel na minsahin gwariy daing to. Cha echom, setan a mismon Ispirito Santo, i-kan toy daing a man-a-sel na minsahin gwariy amta tho. 9 Et setan ngon mismon Ispirito Santoy mengi-kan cha echom na pamatin mahedsang a pasiya, tan chiwa echom pay, i-kan toy daing a mengkal na sahit. 10 May-i-kanan i sa-ki na daing a mengemag na milagro, may-i-kanan ngoy sa-ki na daing a mengowan na inpaamten Afo Chiyos cha si-katho, tan may-i-kanan i echom pay na daing a mengidasin no sema Ispirito Santoy naengitorong na too, ono dimonyo. Tan sa-ki, may-i-kanan na daing a on-esel na ekila-kilasin esel a nat amta tho, tan sa-ki ngo, may-i-kanan na daing a mengowan na banag iren ma ese-esel. 11 Sema emiin a ekila-kilasin daing, sa-sa-ki bengat i Ispirito Santon naengi-kan, tan si-kathoy naengiap-ap iren ma daing cha sa-ki tan sa-kin toon iyaybasar cha piyan to.
Singen Sa-kiy Angel Na Emiin A Naemati Angken Chakel Ira
12 Tep say angel na too, chakel i parti tho, nem angken chakel i parti tho, sa-sa-ki na olay. Inges tod Cristo, pati sema iren naematid si-katho. 13 Tep si-kathayon emiin a naemati, angken Hodjos ono Gentiles tan angken bagaen ono nat bagaen, ebonjagan kiyen emiin babaen na Ispirito Santo, isonga iyanbalin kiya na sa-kin angel. Et sema Ispirito Santon sa-sa-ki, iyay-i-kan cha si-kathayon emiin.
14 Sema angel na too, nat sa-ki bengat i parti tho, no diket chakel. 15 Nem no bilang i konen na seki i “Nat diwaak, isonga nat partiak niyay a angel.” Nem angken kigwan to man, iyayka-chom ngorechan chiwa angel. 16 Et nem no bilang i konen na ngila i “Nat mathaak, isonga nat partiak niyay a angel.” Angken kigwan to man, iyayka-chom ngorechan chiwa angel. 17 Et nem no matha bengat i angel, nengoy pesing ton mengi-ngel? Et nem no ngila bengat i angel, nengoy pesing ton mengengob? 18 Nem sema angel, nat inges to man tep sema iren parti na angel, in-olnos Afo Chiyos cha kosto-koston kad-an ton iyaybasar cha piyan to. 19 No sa-kiy parti bengat na angel, nat angel iwan. 20 Nem say podno, angken sa-kiy angel, chakel i parti tho.
21 Isonga, nat mebedin a konen na mathed diwa i “Nat mesepol taha.” Tan nat mebedin ngon konen na toktok cha seki i “Nat mesepol taha.” 22 Tep say podno, sema iren partin naiyaybilang a ekapsot, mesepol met laeng ira. 23 Tan sema iren partin naiyaybilang a nat ainportanti, seman iriy naiyaysingpet a pasiya. Tan sema iren parti na angel a nat iyaybagay a maypasi-neng, naesa-dinan a chili 24 iy say sema iren partin iyaybagay a maypasi-neng, nat naesa-dinan. Niman, piyarsowen Afo Chiyos i angel say sema iren parti thon naiyaybilang a nat ainportanti, naiyaysingpet a pasiya. 25 Imag to man say sema iren parti na angel, nat mankikinontra ira, no diket mantitinolong ira. 26 Isonga, no ensahit i sa-kin parti, ensahit ngon emiin i parti. Et no mechejaw i sa-kin parti, mekichadsak ngon emiin i parti.
27 Niman, si-kayo ngo, iyayka-chom kayod angel Cristo, tan sa-ki tan sa-kid si-kayo, si-kayoy ekila-kilasin parti na angel to. 28 Et si-kathayon iyayka-chom cha angel Cristo, in-i-kanan to kiyen Afo Chiyos na ekila-kilasin obda. Pilmiro, igwan ira ma chiyo-tohan Afo Chiyos a apostolis. Maykadgwa, igwan ira ma profiten mengowan na inpaamten Afo Chiyos cha si-kara. Maykatdo, igwan ira ma mantoro na esel Afo Chiyos. Tan igwan ira ma mengemag na milagro, sema iren mengkal na sahit, sema iren ontolong na echom, sema iren mengibalnay iren ma naemati, tan sema iren on-esel na ekila-kilasin esel a eg cha amta. 29 Nem nat emiin a apostolis tan profita tan mantoro. Nat emiin a mengemag na milagro. 30 Nat emiin a gwariy daing ton mengkal na sahit. Nat emiin a on-esel na ekila-kilasin esel a eg cha amta, tan nat emiin mengowan na banag iren ma ese-esel. 31 Isonga, ipasnek jo komen piyan a egwathen i mas epateg a daing a para cha panmaptengan na emiin.
Nem niman, ipaamtak cha si-kayo ma mas kamaptengan pay a maonoran.